Read Alur Yeremia 43 Bible Online

Yeremia 43 - Alur bible

Yeremia 43

¹Man etimbre nia, kinde ma Yeremia daru weco ni dhanu ceke lembe ceke pa Yehova Mungu migi, ma Yehova Mungu migi ore pire i bang’gi, en e lembe maeni ceke,

²Azaria ma wod Hocaya, man Yohanan ma wod Kareya, ku dhanu ma jukuhaya ceke, gilund giwacu ni Yeremia kumae, Icwayu ndra: Yehova Mungu mwa ori ngo ya iwac kumae, Kud wucidh i Misiri ni umondo kuca;

³ento Baruc ma wod Neria piko lembe ii i kumwa, kara emiwa i cing’ Jukaldayo, kara ginegwa, man giyakwa ni ng’eca i Babeli.

⁴Kum kumeno Yohanan ma wod Kareya, ku jego ceke mi njuru asikari, man dhanu ceke, giworo dwand Yehova ngo, ya gibed i ng’om Yuda.

⁵Ento Yohanan ma wod Kareya, ku jego ceke mir udul asikari, gigamu dong’ Yuda ceke, m’uai kud i thek ceke ka ma juriemogi i ie, kara gibed ni umondo i ng’om Yuda;

⁶dhanu, ku mon, man nyithindho, ku nyig ubimo, man dhanu ceke kubang’gi kubang’gi ma Nebuzaradan ma jego mi jukur uweko ba Gedalia ma wod Ahikam, ma wod Cafan; ku Yeremia ma jabila, man Baruc ma wod Neria.

⁷E gibino i ng’om Misiri; kum giworo dwand Yehova ngo: man gibino ba Tapanhes.

⁸Lembe pa Yehova lund ubino ba Yeremia i Tapanhes, uwacu kumae,

⁹Gam kidi ma dit i cingi, man ipan-gi i ulobo mi tic mi biriki, ma ni i kamondo mi ot pa Farao i Tapanhes, i wang’ dhanu mi Yuda;

¹⁰man iwac igi kumae, Yehova mir udul, Mungu mir Israel, uwacu kumae: Nen, abioro man abimaku Nebukadrezar m’ubimo mi Babeli, ma jatic para, man abiketho komker pare wi kidi maeni m’akanu; man ebipedho hema pare mi ker i wigi.

¹¹Man ebibino, e ebigoyo ng’om mi Misiri; wadi ma mi tho bimire ni tho, man wadi ma mi ng’eca bimire ni ng’eca, man wadi ma mi palamularu bimire ni palamularu.

¹²Man abicwinyo mac i udi mi mungu mi Misiri; e ebiwang’ugi, man ebiyakugi ebiterogi i ng’eca: man ebirukre gire ku ng’om Misiri, calu jakwac ronyo kendi pare; e ebiai ku kuca ku kwiocwiny.

¹³Ebituro mbegi mi Beth-cemec bende, ma ni i ng’om Misiri; man ebiwang’u udi mi mungu mi Misiri ku mac.