Read Alur Yeremia 44 Bible Online

Yeremia 44 - Alur bible

Yeremia 44

¹A Lembe m’ubino ba Yeremia pi e b Juyahudi ceke m’ubedo i ng’om Misiri, m’ubedo i Migdol de, man i Tapanhes, man i Memfis, man i ng’om mi Pathros, m’uwacu kumae,

²Yehova mir udul, Mungu mir Israel, uwacu kumae: Wuneno lem ma rac ceke m’akelo wi Yerusalem, man wi adhura mi Yuda ceke; man, nen, tin gin uvuru, e ng’atu moko mbe m’ubedo i ie,

³kum dubo migi ma gitimo kara unyai ng’ecwiny i ia, kum gicidho kara giwang’ udok ma ng’wice ng’ar, man kara gitim ni mungu mange, ma ging’eyo ngo, kadok gin, kadi wun, kadi kwaruwu.

⁴Ento aoro jutic para ma jubila ceke i beng’wu, m’aai ko pir aorogi de, awacu kumae, A, kud wutim ginmajudagu maeni m’adagu.

⁵Ento giwinjo ngo, kadi giciko ithgi de ngo ya gilokri kud i dubo migi, ya ku giwang’ udok ma ng’wice ng’ar moko ni mungu mange.

⁶Kum kumeno kwinyo para ku ng’ecwiny para konjre woko, man ecwinjre i adhura mi Yuda man i gengi mi Yerusalem; e ginyothri gin uvuru, calu tin.

⁷Ka kumeno kawono Yehova, Mungu mir udul, Mungu mir Israel, uwacu kumae: Pirang’o wutimo lem ma rac dit maeni kum ng’eyong’ec mu giwu, ma wukabu ko co ku mon woko kud i beng’wu, man nyathin ku mukere, kud i die Yuda, ma juweko ko moko ngo m’udong’ iwu;

⁸kum wunyayu ng’ecwiny i ia ku tic m’i cingwu, ma wubewang’u ko udok ma ng’wice ng’ar ni mungu mange i ng’om Misiri, ka ma wucidho i ie ni umondo; kara jukabwu woko, man kara wubed ni kwong’ man cac i kind thek ceke m’i ng’omi?

⁹Wiwu wil kum dubo pa kwaruwu, man dubo mir ubimo mi Yuda, man dubo mi mon migi, ku dubo mu giwu, ku dubo mi mon mu, ma gitimo i ng’om Yuda, man i gengi mi Yerusalemi?

¹⁰Gijwigri ngo cil i ceng’ ma tin, kadok lworo de negogi ngo, kadi giwotho i cik para de ngo, kadi lembang’ola para de ngo, m’aketho i weng’wu man i wang’ kwaruwu.

¹¹Ka kumeno Yehova mir udul, Mungu mir Israel, uwacu kumae, Nen, abiketho wang’a i kumwu mi gin ma rac, en e mi kabu Yuda ceke woko.

¹²E abigamu dong’ Yuda m’udong’, m’uketho wang’gi kum cidho i Misiri ni umondo kuca, e kagi ceke gibithum; gibipodho i ng’om Misiri; gibithum ku palamularu man ku ndru; gibitho, gambre kum ma thindho cil kum ma dongo, ku palamularu man ku ndru; e gibibedo ni lam, ku wang’uic, man kwong’, ku cac.

¹³Kum abisendo ju m’ubedo i ng’om Misiri, calu asendo Yerusalem, ku palamularu, ku ndru, man ku thong’om;

¹⁴ketho nia ng’atu moko mbe mi dong’ Yuda m’udong’, m’ucidho i ng’om Misiri ni umondo kuca, ma biboth kadi ma bidong’, ma gibidwogo i ng’om Yuda, ma ava dok bedo kuca nuti kugi: kum ng’atu moko bidwogo ngo ndhu wadi ju m’uboth.

¹⁵Dhanu ceke m’ung’eyo nia mon migi wang’u udok ma ng’wice ng’ar ni mungu mange, ku mon ceke m’ucungo i vutgi, cokri ma dit, en e dhanu ceke m’ubedo i ng’om Misiri, i Pathros, gilund giloko lembe ni Yeremia, giwacu kumae,

¹⁶Pi lembe m’iyero iwa i nying’ Yehova, wabiwinjo i beng’i ngo.

¹⁷Ento wabitimo lembe ceke kubang’e kubang’e andha m’uai woko kud i dhogwa, mi wang’u udok ma ng’wice ng’ar ni dhaku m’ubimo m’i polo, man mi konjo lam m’amadha ire calu watimo, wan ku kwaruwa, ju m’ubimo mwa ku judongomawijo mwa, i adhura mi Yuda, man i gengi mi Yerusalem; kum i nindo maeca wabedo ku cemo m’uromo, man kumwa leng’, man waneno lem ma rac ungo.

¹⁸Ento ugambre ma waweko wang’u udok ma ng’wice ng’ar ni dhaku m’ubimo m’i polo, ku konjo lam m’amadha ire, can gin ceke negowa, man wathum ku palamularu man ku ndru.

¹⁹E kinde ma wawang’u udok ma ngw’ice ng’ar ni dhaku m’ubimo m’i polo, man wakonjo lam m’amadha ire, watimo kwen m’apada ire ma warwo ko ire, man wakonjo lam m’amadha ire, ma nico mwa mbe e?

²⁰Yeremia lund uwacu ni dhanu ceke, man ni dhanu, ni mon de, en e ni dhanu ceke m’uloko ire lembe maeno, ewacu kumae,

²¹Udok ma ng’wice ng’ar ma wuwang’u i adhura mi Yuda, man i gengi mi Yerusalem, wun ku kwaruwu, ju m’ubimo mu, ku judongomawijo mu, man dhanu m’i ng’om, Yehova paru pigi ngo, man ewok i pidoie ngo?

²²ketho nia Yehova copo ciro kendo ngo, kum lem ma rac mi giratima mu, man kum ginmajudagu ma wutimo; ka kumeno ng’om mu doko ni uvuru, ku wang’uic, man kwong’, ma ng’atu moko mbe m’ubedo i ie, calu ebedo tin.

²³Kum wuwang’u udok ma ng’wice ng’ar, man kum wudubo ni Yehova, man wuworo dwand Yehova ngo, kadi i cik pare de wuwotho ngo, kadi i lembang’ola pare, kadi i lembatuca pare; ka kumeno lem ma rac maeni timbre i kumwu, calu ebedo tin.

²⁴Mange ke Yeremia yero ni dhanu ceke, man ni mon ceke kumae, Wuwinj lembe pa Yehova, Yuda ceke ma ni i ng’om Misiri:

²⁵Yehova mir udul, Mungu mir Israel, uyero kumeni, ewacu kumae, Wun ku mondwu wuyero ku dhogwu, man ku cingwu wuketho etimbre kakare, wuwacu kumae, Andha wabitimo lembang’ola mwa ma wang’olo, mi wang’u udok ma ng’wice ng’ar ni dhaku m’ubimo m’i polo, man mi konjo lam m’amadha ire: ka kumeno wuketh lembang’ola mu cungi, man wutim lembang’-ola mu.

²⁶Ka kumeno wuwinj lembe pa Yehova, Yuda ceke m’ubedo i ng’om Misiri: Nen, akwong’o ku nyinga ma dit, Yehova wacu, nia nyinga bilwongre kendo ngo i dhu ng’atu moko mi Yuda i ng’om Misiri ceke, m’uwacu kumae, Galu Rwoth Yehova bedo kwo.

²⁷Nen, akuro wigi mi lem ma rac, man pi lem ma ber re ngo; e dhanu ceke mi Yuda ma ni i ng’om Misiri bithum ku palamularu man ku ndru, maram gibithum ko pet.

²⁸Man ju m’uboth ni palamularu bi dwogo kud i ng’om Misiri i ng’om Yuda, ma welgi lam; man dong’ Yuda m’udong’ ceke, m’ucidho i ng’om Misiri ni umondo kuca, bing’eyo nia lembe pa ng’a ma bicungo, para, kadi migi.

²⁹E maeni bibedo ni giranyutha iwu, Yehova wacu, nia abisendowu i ka maeni, kara wung’ei nia lembe para bicungo andha i kumwu ni gin ma rac:

³⁰Yehova wacu kumae, Nen, abimio Farao Hofra m’ubimo mi Misiri i cing’ judegi pare, man i cing’ ju m’uyenyo kwo pare; calu amio Zedekia m’ubimo mi Yuda i cing’ Nebukadrezar m’ubimo mi Babeli, ma en e jadegine, m’eyenyo kwo pare de.