Read Alur Yeremia 46 Bible Online

Yeremia 46 - Alur bible

Yeremia 46

¹Lembe pa Yehova m’ubino ba Yeremia ma jabila pi thek.

²Lembe mi Misiri: pi njuru asikari pa Farao-neko m’ubimo mi Misiri, man ni ng’et kulo Frati i Karkemic, ma Nebukadrezar m’ubimo mi Babeli goyo i rundi mir ang’wende pa Yehoiakim ma wod Yosia, m’ubimo mi Yuda.

³Wuyik thungu man ban, man wucor ceng’ni lwiny.

⁴Wurony jambwoth wi riuni, man wuai, wu weg riuni, wuther ku sabu m’i wie; wurud tong’, wurony jamgwok mir ali.

⁵Pirang’o aneno maeni? cwinygi ng’abre man gilokri cen; e juredho jurukara migi, man giringo, e gineno yor i ng’eigi ngo: ndiri ni i ng’etgi kun ku kun, Yehova wacu.

⁶Ng’atu ma jang’wec kud uringi, kadi jatego de kud ubothi; yor ariwa ma malu ng’et kulo Frati gikier man gipodho.

⁷Maeni ng’a m’uai malu calu kulo Nil, ma pige thore calu kulo ma diti?

⁸Misiri ai malu calu Nil, man pige thore calu kulo ma dit: e ewacu kumae, Abiai malu, abiumo ng’om; abinyotho adhura man ju m’ubedo i iene.

⁹Wuidh malu, wu riuni; man kwinyo makwu, wu magali; e wek dhanu ma jurukara gicidhi: Kuc man Put, ma maku ban; man Juludi, m’umaku m’ugomo atum de.

¹⁰Kum ceng’ maeca en e ceng’ pa Rwoth, Yehova mir udul, ceng’ mi culokwor, kara ecul kwor kum jusendne: e palamularu bicamu man ebiyeng’, man ebimadhu m’eyeng’ ko kum rimbgi; kum Rwoth, Yehova mir udul, ubedo ku lam i ng’om ma yor ariwa ma malu ng’et kulo Frati.

¹¹Idh malu i Gilead, man igam yath ma mo, E nya Misiri ma sumba: itimo ku yath dupa mananu; cang umbe iri.

¹²Thek uwinjo pi lewic peri, man ng’om upong’ ku ywak peri; kum jarukara kier kum jarukara, gipodho karacelo.

¹³Lembe ma Yehova yero ni Yeremia ma jabila, maram Nebukadrezar m’ubimo mi Babeli bibino ko man maram ebigoyo ko ng’om mi Misiri.

¹⁴Wuyer i Misiri, man wurwei i Migdol, man wurwei i Memfis, man i Tapanhes: wuwac kumae, Cungi, man iyikri; kum palamularu camu i ng’eti gbur.

¹⁵Nedi jukabu jukero peri ceni? gicungo ngo, kum Yehova riemogi.

¹⁶Eketho dupa kier, eyo, gipodho acel wi wadi: man giwacu kumae, Ai, man wek wadok kendo ba dhanu mwa ma dhe, man ba ng’om mwa ma junyolowa i ie, ku ba palamularu ma sendo.

¹⁷Gikok kumae kuca, Farao m’ubimo mi Misiri en e woi kende, eweko nindo ma juketho kadhu.

¹⁸Ubimo, ma nyinge Yehova mir udul, uwacu kumae, Calu abedo kwo, andha calu Tabor i kind gudi, man calu Karmel dhu nam, ebibino kumeca.

¹⁹E in m’ibedo ku nya Misiri, yikri giri mi cidho i ng’eca; kum Memfis bidoko ni uvuru, man jubiwang’e kot, ma ng’atu moko mbe m’ubedo i ie.

²⁰Misiri en e rwaya ma leng’ hai; ento nyoth m’uai yor ariwa ma malu bino, ebino.

²¹Man dhanu pare mi sukulia i kinde bende gi calu nyithi dhiang’ m’i dwol; kum gin bende gilokri cen, giringo karacelo, gicungo ngo: kum ceng’ mi ruvwa migi wok i kumgi, en e nindo mi lieu migi.

²²Badwalne bicidho calu thwol; kum gibiwotho ku njuru asikari, man gibibino i kume ku lei, calu jutong’yen.

²³Gibing’olo luli pare piny, Yehova wacu, kadok eyenjre ngo; kum welgi sagu bonyo, man gikiwandri ngo.

²⁴Jubibayu lewic i wi nya Misiri; jubimie i cing’ dhanu ma yor ariwa ma malu.

²⁵Yehova mir udul, Mungu mir Israel, uwacu kumae: Nen, abisendo Amon mi No, ku Farao, man Misiri, karacelo ku mungu pare, man ju m’ubimo pare; en e Farao, ku ju m’ugene:

²⁶man abimiogi i cing’ ju m’uyenyo kwo migi, man i cing’ Nebukadrezar m’ubimo mi Babeli, man i cing’ jutic pare; e yo ku ng’eye jubibedo i ie, calu i nindo ma con, Yehova wacu.

²⁷Ento lworo kud unegi, E Yakobo ma jatic para, kadok cwinyi de kud ung’abre, E Israel: kum, nen, abibodhi ku bor, man kodhini kud i ng’om mi ng’eca migi; man Yakobo bidwogo, ebibedo museme de man yo, e ng’atu moko mbe ma binyayu lworo i ie.

²⁸Lworo kud unegi, E Yakobo ma jatic para, Yehova wacu; kum wanuti wakudi: kum abijigo wi thek ceke m’ariemoi i ie; ento abijigo wii ma gwei ngo, ento abiponji ku pokolembe, man abiweki ngo ma ponji mbe.