Read Alur Yeremia 48 Bible Online

Yeremia 48 - Alur bible

Yeremia 48

¹Lembe mi Moab. Yehova mir udul, Mungu mir Israel, uwacu kumae, Can wi Nebo! kum judwoke ni uvuru; Kiriathaim junyayu lewic i wie, jumake; junyayu lewic wi Misgab man jurwombe piny.

²Pak mi Moab umbe kendo; giporo lembe ma rac i kume i Hecbon kumae: Wubin, wek wakabe cen kud ebed ni thek. In bende, E Madmen, jubidwoki ling’; palamularu biriemi.

³Badwal mi ywak m’uai Horonaim, uvuru man nyoth ma dit!

⁴Junyotho Moab; nyithindho pare ma thindho ketho ywak uwinjre.

⁵Kum gibiidho malu ku ywak kwa ku ka m’utingre ni Luhith; kum i ka m’alura mi Horonaim giwinjo lem ma tek mi ywak mi nyoth.

⁶Wuringi, wubodh kwo mu, man wubed calu yen m’udinyo m’ubedo kende i langa.

⁷Kum, kum igeno tic peri man piny m’akana peri, jubimeki bende: man Kemoc bicidho woko i ng’eca, julam pare ku judongomawijo pare gikugi.

⁸E janyoth biidho malu wi adhura kubang’e kubang’e, e adhura moko mbe ma biboth; poga bende birwinyo, man jubinyotho pambu; calu Yehova yero.

⁹Mi bomb ni Moab, kara ering epiei: e adhura pare bidoko ni uvuru, ma ng’atu moko mbe m’ubed i ie.

¹⁰Kwong’ wi ng’atu m’utimo tic pa Yehova ma k’eparu pire ngo; man kwong’ wi ng’atu m’ucero palamularu pare ni rimo.

¹¹Moab ubedo yo ugambre i aradu pare, man ebedo wi thing’ pare, man jukonje ngo ku i agulu wadi, kadok i ng’eca de ecidho ngo: ka kumeno girabilane dong’ i ie, man ng’wice lokre ngo.

¹²Ka kumeno, nen, nindo bino, Yehova wacu, nia abioro ju m’akonjo i bang’e e gibikonje; e gibikonjo agulu pare, man gibituro cupa migi nziki nziki.

¹³E lewic binego Moab kum Kemoc, calu lewic unego ot mir Israel kum Beth-el ma genogen migi.

¹⁴Wuwacu nenedi kumae, Wan wa jurukara, man jukero mir ali?

¹⁵Judwoko Moab ni uvuru, man giidho malu i adhura pare, man awobi pare m’aradu ma jugoyo wigi giloro piny ba nek, Ubimo wacu, ma nyinge Yehova mir udul.

¹⁶Ruvwa mi Moab ni ceng’ni bino, man masendi pare bino pio.

¹⁷Kewu ceke ma wutieke, wuywage, man kewu ceke ma wung’eyo nyinge; wuwac kumae, Uluth ma tek utur mire ma, uluth ma leng’!

¹⁸E in i nyaku m’ubedo i Dibon, lor piny ku ba dwong’ peri, man ibed i rieu; kum janyoth mi Moab ubino i kumi, enyotho ka ma tek peri.

¹⁹E ng’atu m’ubedo i Aroer, cung i yo, man ikur: penj ng’atu m’uringo, man ng’atu m’uboth; wac kumae, Jutim ang’o?

²⁰Junyayu lewic wi Moab; kum jurwombe piny: wugoi nduru, man wuywaki; wuyer maeni dhu Amon, nia judwoko Moab ni uvuru.

²¹Man lembapoka bino wi ng’om pambu, wi Holon, man wi Yaza, man wi Mefath,

²²man wi Dibon, man wi Nebo, man wi Beth-diblathaim,

²³man wj Kiriathaim, man wi Beth-gamul, man wi Beth-meon,

²⁴man wj Kerioth, man wi Bozra, man wi adhura ceke m’i ng’om mi Moab, ma bor ku ma ceng’ni.

²⁵Juthumo tung Moab cen, e bote tur, Yehova wacu.

²⁶Wuketh emer: kum etingre kum Yehova: e Moab birudre i ng’ok pare, man en bende ebibedo i cac.

²⁷Kum Israel ubedo ni cac iri ngo? junwang’e i kind jukwo? kum ku ba yer m’iyero ko pire, iyengo wie.

²⁸E wun ma wubedo i Moab, wuwek adhura, man wubed i odcana; man wubed calu akuru m’utimo ode wi dhu longro.

²⁹Wawinjo pi kuhaya mi Moab, nia en e jakuhaya dit; dodri pare, ku kuhaya pare, man foiri pare, ku tingri mir adundene.

³⁰Ang’eyo kwinyo pare, Yehova wacu, nia en e mananu; kulula pare timo gin moko ngo.

³¹Ka kumeno abigoyo nduru pi Moab; eyo, abiywak pi Moab ceke: gibiywak pi dhanu mi Kirheres.

³²Abiywak piri ma sagu ywak ma pi Yazer, E yendulok mi Sibna: jengi kadhu wi nam, gitundo cil kum nam mi Yazer: janyoth upodho wi nying’piny mi dwij lietho peri, man wi nyingulok peri.

³³Man anyong’a ku mutoro kabre woko kud i podho ma cek hai man kud i ng’om Moab: man aketho pigulok ujik ni pany mir ulok: ng’atu moko mbe ma binyono ku kok; kok bibedo ni kok ungo.

³⁴Ugambre kum ywak mi Hecbon cil kum Eleyale, cil kum Yahaz giwodho dwandgi, ugambre Zoar cil kum Horonaim, ba Eglath-celicia: kum pi mi Nimrim bende bidoko ni uvuru.

³⁵Mange ke abiketho ng’atu ma lamu i ka ma malu, man ng’atu ma wang’u udok ma ng’wice ng’ar ni mungu pare ujik i Moab, Yehova wacu.

³⁶Ka kumeno adundena ywak pi Moab calu usegu, man adundena ywak calu usegu pi dhanu mi Kirheres: ka kumeno dit m’egamu rwinyo.

³⁷Kum wie uwang’ kubang’e kubang’e, man tik ubedo anyara kubang’e kubang’e: thum ni wi cing’ ceke, man gonia ni wi pier ceke.

³⁸Wi udi ceke mi Moab man i gengine ywak nuti i kaka ceke; kum aturo Moab calu agulu ma anyong’a nego ng’atu moko ngo i kume, Yehova wacu.

³⁹Erwombre piny mire ma! gigoyo nduru mire ma! Moab uloko ng’ec ku lewic mire ma! kum kumeno Moab bidoko ni cac man ndiri ni dhanu ceke m’utieke gbur.

⁴⁰Kum Yehova wacu kumae: Nen, ebiringo calu acur, man ebirieyo bombe kum Moab,

⁴¹jumaku Kirioth, man jumaku ka ma tek, man adunde jurukara mi Moab i ceng’ maeca bibedo calu adunde dhaku i remokum pare.

⁴²E jubinyotho Moab kud ubed ni thek, kum eyungre gire kum Yehova,

⁴³Lworo, man vur, kud uwic, gini i wii, in i ng’atu m’ubedo i Moab, Yehova wacu.

⁴⁴Ng’atu m’uringo ni lworo bipodho i vur; man ng’atu m’uai kud i vur jubimake i uwic; kum abikelo i wie, en e Moab, rundi mi lieu migi, Yehova wacu.

⁴⁵Ju m’uringo gicungo m’umbe tego the tipopiny mi Hecbon; kum mac uai kud i Hecbon, man lebmac kud i die Sihon, man ewang’u gund Moab, man die wi ju m’uwoi.

⁴⁶Can i wii, E Moab! dhanu mi Kemoc uvoc; kum jumaku woti ni ng’eca, man nyigi i ng’eca.

⁴⁷Ento abidwoko ng’eca mi Moab i nindo ma cen, Yehova wacu. Lembapoka mi Moab en e kumeni.