Read Alur Yeremia 49 Bible Online

Yeremia 49 - Alur bible

Yeremia 49

¹Lembe mi nyithindho mir Amon. Yehova wacu kumae: Wod Israel umbe? jamakpiny pare mbe? ka kumeno nedi Malkam umwonyo Gad, man dhanu pare bedo i adhurane?

²Ka kumeno, nen, nindo bino, Yehova wacu, nia abiketho girapoya mir ali winjre kum Raba mi nyithindho mir Amon; e ebidoko ni udhuru m’uvuru, man jubiwang’u nyige ku mac: Israel bilund mwonyo ju m’umwonye, Yehova wacu.

³Wugoi nduru, E Hecbon, kum judwoko Ai ni uvuru; wuywak, wu nyig Raba, wutwiru ku gonia: wuywaki, man wuring kun ku kun kind gang’; kum Malkam bicidho i ng’eca, julam pare man judongomawijo pare karacelo.

⁴Pirang’o iyungri i poga, poga peri m’upong’, E nyaku m’ucoro ceni? m’ugeno piny m’akana pare, m’uwacu kumae, Ng’a ma bibino i bang’a?

⁵Nen, abikelo lworo i wii, Rwoth, Yehova mir udul, uwacu, ku ba dhanu ceke m’utieki gbur; man jubiriemowu woko kubeng’wu kubeng’wu cen, man ng’atu moko mbe ma bicoko ju m’utagu.

⁶Ento yo ng’eye abidwoko ng’eca mi nyithindho mir Amon, Yehova wacu.

⁷Lembe mir Edom. Yehova mir udul uwacu kumae: Rieko mbe kendo i Temani? lembapora rwinyo ni jurieko? rieko migi rwinyo?

⁸Wuringi, wudok cen, wubed i ka ma thuth, E wu ju m’ubedo i Dedan; kum abikelo ruvwa pa Esau i wie, en e nindo m’abiliewe i ie.

⁹Tek jupon ulok ubino i beng’i, giweko kund ulok ungo’ tek jukwo ku diewor, ginyotho maram eromo kogi ngo?

¹⁰Ento adwoko Esau muneru, ayabu ka ma mung’ mung’ pare, e ebicopo pondo gire ngo: kodhine nyothre, ku utumin mire, man wat pare; man embe.

¹¹Wek nyithindho peri ma kic, abiweko gibedo kwo; man wek mon peri ma coggi tho gigena.

¹²Kum Yehova wacu kumae: Nen, gin ma juketho mi madhu kikombe ngo gibimadhu andha; in i ng’atu ma bibedo ndhu umbe masendi’ ibibedo m’umbe masendi ngo, ento ibimadhu andha.

¹³Kum akwongra kuda gira, Yehova wacu, nia Bozra bidoko ni wang’uic, man ni cac, kud uvuru, man kwong’; e adhurane ceke bibedo ni uvuru ma gwei.

¹⁴Awinjo rwonglembe m’uai ba Yehova, man juoro jakwenda i kind thek, m’uwacu kumae, Wucokru karacelo, man wubin i kume, man wuai ba lwiny.

¹⁵Kum, nen, adwoki nok i kind thek, man ma jucayu i kind dhanu.

¹⁶Pi ndiri peri, kuhaya mir adundeni bombi, E in m’ibedo i odcana, m’imaku ka m’utingre mir ungulu got: kadok itimo odi malu calu acur, abigemi piny ku kuca, Yehova wacu.

¹⁷E Edom bidoko ni wang’uic: ku ba dhanu ku ba dhanu m’ukadhu i bang’e ie biwang’ lii, man ebicayu kum masendine ceke.

¹⁸Calu i ng’iel mi Sodom ku Gomora man adhura ma ceng’ni kude, Yehova wacu, ng’atu moko mbe ma bibedo i ie, kadok wod dhanu moko de bibedo ni umondo ngo i ie.

¹⁹Nen, ebiidho malu calu umvor ku i kuhaya mi Yordan kum kabedo ma tek: kum abiketho gipiei kud i bang’e pio; man ng’atu ma tek jugoyo wie, abiketho ng’atuca i wie: kum ng’a ma calu ani’ man ng’a ma biketho ira nindo’ man ng’a ma jakwac ma bicungo i wang’a?

²⁰Ka kumeno wuwinj lembapora pa Yehova, m’eting’o kum Edom; man lembakeca pare, m’ekeco kum ju m’ubedo i Teman kumae: Andha gibiywayugi cen, cil nyithindh udul rombe; andha ebidwoko kabedo migi ni uvuru i wigi.

²¹Ng’om uvengre ni kum badwal mi podho ma gipodho ko; ywak nuti, badwalne winjre i Nam Makwar.

²²Nen, ebiidho malu man ebiringo calu acur, man ebirieyo bombe kum Bozra: man adunde jurukara mir Edom i ceng’ maeca bibedo calu cwiny dhaku ma ni i remokum pare.

²³Lembe mi Dameski. Junyayu lewic wi Hamath, kud Arpad; kum giwinjo lembe ma rac, giloi: can ni wi nam; ecopo bedo yo ngo.

²⁴Dameski doko ng’ic, elokre gire kara eringi, man mielkum umake: ndiba ku can umake, calu dhaku m’ubenyol.

²⁵Juweko adhura mi pak ungo nedi, adhura mi mutoro para?

²⁶Ka kumeno awobi pare bipodho i gengine, man jubiketho dhanu mir ali ceke ling’ i ceng’ maeca, Yehova mir udul uwacu.

²⁷Man abicwinyo mac i gang’kidi mi Dameski, man ebiwang’u udi mi ker pa Ben-hadad.

²⁸Lembe mi Kedar, man mi ker mi Hazor, ma Nebukadrezar m’ubimo mi Babeli goyo. Yehova wacu kumae: Wuai, wuidh malu ba Kedar, man wunyoth nyithindho ma yo nyangu.

²⁹Gibimaku hema migi kud udul rombe migi; gibiyaku bongu m’ang’aba migi, kud agulu migi ceke, man ngamia migi, igi gigi; e gibikok igi kumae, Ndiri ni kun ku kun mire!

³⁰Wuringi, wucidh bor, wubed i ka ma thuth, E wu ju m’ubedo i Hazor, Yehova wacu; kum Nebukadrezar m’ubimo mi Babeli poro lembe i kumwu, man ekeco lembe i kumwu.

³¹Wuai, wuidh ba thek m’ubedo yo, m’ubedo museme, Yehova wacu; m’ubedo ku dhugang’kadi utwindi de ngo, m’ubedo kendgi.

³²E ngamia migi bibedo ni ayeki, man udul lim migi ni ayeki: man abilalu ju m’unyaru semba tikgi ni yamu ceke; man abikelo ruvwa migi kud i ng’etgi kun ku kun, Yehova wacu.

³³Man Hazor bidoko ni kabedo mir utho, uvuru mi nja: ng’atu moko mbe ma bibedo kuca, kadok wod dhanu moko de bibedo ngo i ie ni umondo.

³⁴Lembe pa Yehova m’ubino ba Yeremia ma jabila pi Elam, i thekri mi camuker pa Zedekia m’ubimo mi Yuda, m’uwacu kumae,

³⁵Yehova mir udul uwacu kumae: Nen, abituro atum mir Elam, dit mi tego migi.

³⁶Man abikelo yamu ang’wen wi Elam kud i gund polo ang’wen, man abilalugi yo ba yamu maeno ceke; man thek moko bibedo umbe ma ju ma juriemo kubitundo i ie ngo.

³⁷Man abiketho cwiny Elam ng’abre i wang’ judegi migi, man i wang’ ju m’uyenyo kwo migi; man abikelo lem ma rac i wigi, en e ng’ecwiny para ma lake tek, Yehova wacu; man abioro palamularu i tokgi, maram adaru kogi:

³⁸man abiketho komker para i Elam, man abinyotho ubimo ku judongomawijo ku kuca, Yehova wacu.

³⁹Ento ebitimbre i nindo ma cen, nia abidwoko ng’eca mir Elam, Yehova wacu.