Read Alur Yeremia 50 Bible Online

Yeremia 50 - Alur bible

Yeremia 50

¹Lembe ma Yehova yero pi Babeli, pi ng’om mi Jukaldayo, ku dhu Yeremia ma jabila.

²Wuyer i kind thek man wurwei, wuketh abera malu de; wurwei, man kud wumung’: wuwac kumae, Jumaku Babeli, junyayu lewic wi Bel, cwiny Merodak ung’abre; junyayu lewic wi ayi gin m’acwia pare, jurwombo mungu m’araga pare piny.

³Kum thek uidho malu i kume ku yor ariwa ma malu, ma bidwoko ng’om pare ni uvuru, e ng’atu moko mbe ma bibedo i ie: giringo, gicidho, dhanu ku lim bende.

⁴I ceng’ maeca, man i nindo maeca, Yehova wacu, nyithindho mir Israel bibino, gin ku nyithindho mi Yuda karacelo; man gibiwotho i yo migi ku ywak, e gibiyenyo Yehova Mungu migi.

⁵Gibipenjo pi Sayuni ku wang’gi ma yor i bang’e kumae, Wubin, man wuribru giwu kum Yehova i lembariba mi nja ma wijo biwil ungo pire.

⁶Dhanu para gibedo ni rombe m’urwinyo: jukwac migi ketho gikier; gilokogi cen wi gudi; gicidho ugambre kum got cil kum ungulu got; wigi wil kum kayom migi.

⁷Ju m’unwang’ugi ceke gicamugi; man jusend migi wacu kumae, Lembe ni i wiwa ngo, kum gidubo ni Yehova, ma kabedo mi bedopwe, en e Yehova, ma genogen mi kwarugi.

⁸Wuring kud i die Babeli, man wuai woko kud i ng’om mi Jukaldayo, man wubed calu nyogi diegi i wang’ udul lim.

⁹Kum, nen, abithubo man abiketho udul thek ma dit uidh malu i kum Babeli kud i ng’om ma yor ariwa ma malu; e gibitheri gigi i kume; jubikabe ku kuca: athero migi bibedo calu pa ng’atu ma jarukara ma riek; moko mbe ma bidwogo mananu.

¹⁰E Kaldayo bibedo ni amaci: dhanu ceke m’uyake cwinygi bikwio, Yehova wacu.

¹¹Kum wubedo ku mutoro, kum anyong’a negowu, E wun ma wuyaku aba para, kum wucwe calu rwaya m’uyoko cam, man wuywak calu riuni ma tek;

¹²jubinyayu lewic apila wi megwu; cwiny ng’atu m’unyolowu bing’abre: nen, ebidong’ cen ni thek, ebibedo ni langa, ni ng’om m’uthwo, man ni ng’om ngele.

¹³Jubibedo i ie ngo ni kum kwinyo pa Yehova, ento ebibedo ni uvuru ma gwei: ku ba dhanu ceke m’ukadhu i ng’et Babeli ie biwang’ lii, man ebicayu masendi pare ceke.

¹⁴Wutheru giwu kum Babeli gbur, wun ceke ma wugomo atum; wukile, kud wuwek athero moko: kum edubo ni Yehova.

¹⁵Wukok i kume gbur: ejwigre gire; odkur pare podho, juredho gang’kidi pare piny; kum en e culokwor pa Yehova: wucul kwor i kume; calu etimo, e wutim i kume kumeca.

¹⁶Wukab jacoi woko kud i Babeli, ku ng’atu ma ting’o palacam i nindo mi mwoka: ni lworo mi palamularu ma sendo gibilokri kubang’gi kubang’gi ng’atuman ba juthugi, man gibiringo ku ba dhanu ku ba dhanu ng’atuman i ng’om ma thugi ma dhe.

¹⁷Israel en e rombo ma julalu; umvor urieme cen: ma kwong’ane, ubimo mir Ascur ucame; man kawono ma cen Nebukadrezar m’ubimo mi Babeli turo cogone.

¹⁸Ka kumeno Yehova mir udul, Mungu mir Israel, uwacu kumae: Nen, abisendo ubimo mi Babeli ku ng’om pare, calu asendo ubimo mir Ascur.

¹⁹E abikelo Israel kendo i kakwae pare, man ebicamu wi Karmel ku Bacan, man ng’eyong’ec pare biyeng’ wi ungulu gudi mir Efraim man i Gilead.

²⁰I ceng’ maeca, man i nindo maeca, Yehova wacu, jubiyenyo kier mir Israel, e ebibedo mbe; man dubo mi Yuda, e gibinwangri ngo: kum abiweko dubo ni donge m’aweko dong’.

²¹Wuidh malu kum ng’om mi Merathaim, ndhu i kume, man kum ju m’ubedo i Pekod: wunegi man wunyoth kot yo ng’eigi, Yehova wacu, man wutim calku gin ceke m’ang’olo iri.

²²Badwal mi lwiny ni i ng’om, ku nyoth ma dit,

²³Nyondro mi ng’om yu ng’eny man etur mire! Babeli doko ni uvuru i kind thek mire!

²⁴Aketho uwic iri, man jumeki bende, E Babeli, man ing’eyo ngo: junweng’i, man jumeki bende, kum ijai ni Yehova.

²⁵Yehova yabu kakan mi jambali pare, man ewodho jambali mi kwinyo pare; kum Rwoth, Yehova mir udul, ubedo ku tic m’etim i ng’om mi Jukaldayo.

²⁶Wubin i kume ma wuai i kieu ma wi tung’; wuyab udi mi kakan pare; wudhure malu, man wunyothe ma gwei; kud wuwek gin moko ma pare dong’.

²⁷Wuneg thwoni dhiang’ pare ceke; wek gilor piny ba nek: can i wigi! kum ceng’ migi tundo, en e nindo mi lieu migi.

²⁸Dwal mi ju m’uringo man m’uboth kud i ng’om mi Babeli, kara giyer i Sayuni pi culokwor pa Yehova Mungu mwa, en e culokwor mi hekalu pare.

²⁹Wulwong’ weg atum karacelo kum Babeli, dhanu ceke ma gomo atum; wugur hema i kume gbur; kud wuyi ng’atu moko ma pare bothi: wucul i kume calku tic pare; calku gin ceke m’etimo, wutim i kume kumeca; kum etingre ni Yehova, ni Ng’atu Maleng’ mir Israel.

³⁰Ka kumeno awobi pare bipodho i gengi pare, man jubiketho dhanu pare ceke mir ali ling’ i ceng’ maeca, Yehova wacu.

³¹Nen, ani i kumi, E in i ng’atu ma jakuhaya, Rwoth uwacu, Yehova mir udul; kum ceng’ peri bino, en e nindo m’abiliewi ie.

³²E ng’atu ma jakuhaya bikier man ebipodho, man ng’atu moko mbe ma biting’e malu; e abicwinyo mac i adhura pare, man ebiwang’u ceke m’utieke gbur.

³³Yehova mir udul uwacu kumae: Jusendo nyithindho mir Israel ku nyithindho mi Yuda karacelo; man dhanu ceke m’uterogi ni ng’eca gimakugi ki; gikwero weko gicidhi.

³⁴Jawar migi e tek; nyinge Yehova mir udul: ebicungo kum lembe migi cu, kara emi yom ni ng’om, man eketh cwiny ju m’ubedo i Babeli ringi.

³⁵Palamularu ni wi Jukaldayo, Yehova wacu, man wi ju m’ubedo i Babeli, man wi judongomawijo pare, man wi jurieko pare.

³⁶Palamularu ni wi ju m’ululi, e gibidoko ni jukusegu; palamularu ni wi jurukara pare, e cwinygi bing’abre.

³⁷Palamularu ni wi riuni migi, man wi magali migi, man wi dhanu m’ujebre ceke ma ni i kinde; e gibidoko calu mon: palamularu ni wi piny m’akana ma pare, e jubiyakugi.

³⁸Lietho ni wi pi pare, e gibidwono; kum en e ng’om mir ayi gin m’acwia m’ang’ika, e gin abelu ni kum mungu m’araga.

³⁹Ka kumeno yedi m’i thim mi ng’om ngele kud urudi bibedo kuca, man udo bibedo i ie: e jubibedo i ie kendo ngo mi nja; kadok ugambre kum dhanum’utuk cil kum dhanum’utuk de jubibedo i ie ngo.

⁴⁰Calu ka Mungu ng’ielo Sodom ku Gomora kud adhura ma ceng’ni kugi, Yehova wacu, e ng’atu moko mbe ma bibedo kuca kumeca, kadok wod dhanu moko de bibedo ngo i ie ni umondo.

⁴¹Nen, dhanu ai yor ariwa ma malu; jubithubo thek ma dit man ju m’ubimo dupa kud i ng’et ng’om ma wi tung’.

⁴²Gibimaku atum ku tong’; gi jurop, man kisa mbe kugi; dwandgi woi calu nam; man giwotho ku wi riuni, kubang’gi kubang’gi githero, calu ng’atu m’ucidho i lwiny i kumi, E nya Babeli.

⁴³Ubimo mi Babeli winjo rwong’gi, e cinge doko ng’ic: ndiba make, ku remokum calu dhaku m’ubenyol.

⁴⁴Nen, jadegi biidho malu calu umvor ku i kuhaya mi Yordan kum kabedo ma tek: kum abiketho gipiei kud i bang’e pio; e ng’atu ma tek jugoyo wie, abiketho ng’atuca i wie: kum ng’a ma calu ani? man ng’a ma ketho ira nindo? man ng’a ma jakwac ma copo cungo i wang’a?

⁴⁵Ka kumeno wuwinj lemba pora pa Yehova, m’eting’o kum Babeli; man lembakeca pare m’ekeco kum ng’om mi Jukaldayo: Andha gibiywayugi cen, en e nyithindho ma thindho mir udul; andha ebidwoko kabedo migi ni uvuru i wigi.

⁴⁶Ng’om uyengre ni badwal mi maku Babeli, e ywak uwinjre i kind thek.