Read Alur Yeremia 51 Bible Online

Yeremia 51 - Alur bible

Yeremia 51

¹Yehova wacu kumae: Nen, abiting’o yamu m’anyotho kum Babeli, man kum ju m’ubedo i Leb-kamai.

²Man abioro juwirok i Babeli ma bipiedhe; e gibiweko i ng’om pare nanu: kum i ceng’ mi can gibibedo i kume gbur.

³Wek won atum ugom atum pare kum ng’atu m’ugomo, man kum ng’atu m’utingre gire malu i jamtho pare: man kud wuwek awobi pare; wunyoth udul pare kot.

⁴E gibipodho piny ma junegogi i ng’om mi Jukaldayo, man ma jucobogi plu i gengi pare.

⁵Kum Israel uwekre ngo, kadi Yuda, ni Mungu pare, ni Yehova mir udul; kadok ng’om migi pong’ ku dubo kum Ng’atu Maleng’ mir Israel.

⁶Wuring kud i die Babeli, man ku ba dhanu ku ba dhanu ng’atuman ubodh kwo pare; kud wukebru woko ni kum kier pare: kum en e nindo mi culokwor pa Yehova; ebiculo kwor i kume.

⁷Babeli bedo ni kikombe ni mola ma kwar i cing’ Yehova, ma mero ng’om ngung’: thek madhu kum pigulok pare; ka kumeno thek gin abelu.

⁸Babeli podho pio man enyothre: wugoi nduru pire; gam mo ma yath pi remokum pare, tek nyo ecopo cangu.

⁹Kuno di wacangu Babeli, ento ecangre ngo: wuweke, man wek wacidh kubang’wa kubang’wa ng’atuman i ng’om thugi ma dhe; kum lembapoka pare tundo kum polo, man juting’e malu cil kum afuru.

¹⁰Yehova wodho bedopwe mwa woko: wubin, man wek wayeru pi tic pa Yehova Mungu mwa i Sayuni.

¹¹Pak athero, mak ban ki: Yehova thubo cwiny ju m’ubimo mi Jumedi; kum lembakeca pare en e kum Babeli, kara unyothe: kum en e culokwor pa Yehova, culokwor mi hekalu pare.

¹²Keth abera malu kum gang’kidi mi Babeli, dwok kume tek, keth jukurne, yik kapondo; kum Yehova keco man etimo gin m’eyero pi ju m’ubedo i Babeli.

¹³E in m’ibedo wi pi dupa, ma piny m’akana dit, kajik peri bino, mukero mi ketho cwinyi hai kum piny.

¹⁴Yehova mir udul ukwongre gire, ewacu kumae, Andha abipong’i ku dhanu, calu kud ukoko; man gibiting’o kok i kumi.

¹⁵Etimo ng’om ku tego pare, eketho ng’om ucungo ku rieko pare, man erieyo polo ku ng’eyothelembe pare.

¹⁶Kinde m’ewodho dwande, udul pi m’i polo thore, man eketho afuru idh kud i tung’ ng’om; etimo lukoth mi koth, man ewodho yamu woko kud i kakanpiny pare.

¹⁷Ku ba dhanu ku ba dhanu ng’atuman udoko va lim ma ng’eyong’ec umbe kude: junyayu lewic wi jubodho mi mola ma kwar ni kum ayi gin m’acwia pare; kum ayi gin m’acwia pare m’atwaga en e ndra, man yuyo moko mbe i igi.

¹⁸Gi gin ma ie nanu, gi tic mir abombi: i nindo mi lieu migi gibirwinyo.

¹⁹Makapiny pa Yakobo calu maeni ngo; kum en e ma kwong’a ni gin ceke; man Israel en e suru mir aba pare: nyinge Yehova mir udul.

²⁰In i lei mi lwiny para man jamtho mir ali: man abituro thek nziki nziki ni kumi; man abinyotho ker ni kumi;

²¹man abituro riuni ku won riuni nziki nziki ni kumi;

²²man abituro magali ku ng’atu m’uwotho i ie nziki nziki ni kumi; man abituro co ku mon nziki nziki ni kumi; man abituro jadit kud aradu nziki nziki ni kumi; man abituro jalawobi ku nyaku ma sumba nziki nziki ni kumi;

²³man abituro jakwac kud udul rombe pare nziki nziki ni kumi; man abituro jatipodho ku mberembere pare mi koni dhiang’ nziki nziki ni kumi; man abituro jego ku jubim nziki nziki ni kumi.

²⁴Man abiculo kum Babeli man kum ju m’ubedo i Kaldayo ceke lem ma rac ceke ma gitimo i Sayuni i weng’wu, Yehova wacu.

²⁵Nen, an a jadhogi, E got ma nyotho, Yehova wacu, ma nyotho ng’om ngung’; e abirieyo cinga i kumi, man abing’ieli piny kud i cana, man abidwoki ni got ma wang’.

²⁶Man gibigamu kidi mi gul ungo i beng’i, kadi kidi mi thepiny; ento ibibedo ni uvuru mi nja, Yehova wacu.

²⁷Wuketh abera malu i ng’om, wukudh agwara i kind thek, wuyik thek i kume, wulwong’ ker mir Ararat, ku Mini, man Ackenaz karacelo i kume: wuketh jego i kume; wuketh riuni idh malu calu ukoko ma juyuke.

²⁸Wuyik thek i kume, ju m’ubimo mi Medi, ku jegone, man jubimne ceke, ku ng’om ceke mi bim migi.

²⁹E ng’om uyengre man eni i remokum; kum lembakeca pa Yehova ma kum Babeli cungo, kara udwok ng’om Babeli ni uvuru, ma ng’atu moko mbe m’ubed i ie.

³⁰Jurukara mi Babeli giweko kiedo, gidong’ i ka ma tek migi; tego migi voc; gidoko calu mon: jucwinyo mac kum kabedo pare; utwindine tur.

³¹Jang’wec acel biringo kara uromb ku wadi, man jakwenda acel kara uromb ku wadi, kara unyuth ni ubimo mi Babeli nia jumaku adhura pare kun ku kun ceke:

³²man jumaku kakadhu, e juwang’u lum mi poga ku mac, man lworo nego dhanu mir ali.

³³Kum Yehova mir udul, Mungu mir Israel, uwacu kumae: Nya Babeli calu lelacam i nindo ma juyoko ie cam; nindo dong’ nok, e nindo mi mwoka bibino ire.

³⁴Nebukadrezar m’ubimo mi Babeli cama, man enyona, edwoka ni agulu ma ie nanu, emwonya calu nyang’, epong’o ie ku gin ma mit para; ebaya woko.

³⁵Rop m’utimbre i kuma man kum ring’kuma ubed wi Babeli, ng’atu m’ubedo i Sayuni biwacu; man kumae, Rimba bed wi ng’atu m’ubedo i Kaldayo, Yerusalem biwacu.

³⁶Ka kumeno Yehova wacu kumae: Nen, abicungo kum lembe peri, man abiculo kwor piri; man abidwono nam pare, man abidwono kulo pare.

³⁷E Babeli bidoko ni uvuru, man kabedo mir utho, ku wang’uic, man cac, ma ng’atu moko mbe m’ubed i ie.

³⁸Gibirundo karacelo calu nyithindh umvor; gibing’ang’ni calu nyithindh umvor ma thindho.

³⁹Kinde ma gidoko lieth, abitimo agba migi, man abimerogi, kara anyong’a neggi, man ginind nindo ma nja, man ku giceu, Yehova wacu.

⁴⁰Abikelogi piny calu nyithi rombe ba nek, calu nyogi rombe karacelo ku nyogi diegi.

⁴¹Jumaku Cecak mire! man jumaku pak mi ng’om ngung’ mire! Babeli doko ni uvuru i kind thek mire!

⁴²Nam uidho malu wi Babeli; juume kud udul mukurane.

⁴³Adhura pare doko ni uvuru, ni ng’om m’uthwo, man ng’om ngele, ng’om ma ng’atu moko mbe m’ubedo i ie, kadok wod dhanu moko de kadhu ngo kud i ng’ete.

⁴⁴Man abitimo lembapoka wi Bel i Babeli, e abiwodho gin m’emwonyo woko kud i dhoge; man thek bimol kendo ngo i bang’e; eyo gang’kidi mi Babeli bipodho.

⁴⁵Dhanu para, wuai woko kud i kinde, man wubodhru giwu ku ba dhanu ku ba dhanu ng’atuman ni ng’ecwiny ma lake tek pa Yehova.

⁴⁶Man kud wuyi adundewu voci, kadok rwonglembe ma biwinjre i ng’om de kud wulwor; kum rwonglembe bibino i rundi acel man yo ng’ei maeno rwonglembe bibino i rundi mange, man rop i ng’ombe, jabim kum jabim.

⁴⁷Ka kumeno, nen, ceng’ ubino, m’abitimo ko lembapoka wi ayi gin m’acwia m’apaya mi Babeli; e jubinyayu lewic wi ng’om pare dho; e ju ma junego pare ceke bipodho i kinde.

⁴⁸E polo ku ng’om, ku gin ceke ma ni i ie, bilund wero ni mutoro wi Babeli; kum junyoth m’uai yor ariwa ma malu bibino i bang’e, Yehova wacu.

⁴⁹Calu Babeli ketho ju ma junego mir Israel upodho, e ju ma junego i ng’om ceke bipodho kumeca i Babeli.

⁵⁰Wun ma wuboth ni palamalaru, wucidhi, kud wucung ling’; wupoi kum Yehova ku bor, man wuwek Yerusalem umond i pidoiwu.

⁵¹Cwinywa ng’abre, kum wawinjo cac; lewic uumo wang’wa, kum juwirok umondo i kamaleng’ mi ot pa Yehova.

⁵²Kum kumeno, nen, ceng’ ubino, Yehova wacu, nia abitimo lembapoka wi ayi gin m’acwia pare m’ang’ika; e ju ma jutong’o lero i kumgi gibicur acura i ng’om pare mba mba.

⁵³Kadok Babeli idh malu i polo, man kadok edwok ka m’utingre mi tego pare tek, ento junyoth m’uai i bang’a bibino i bang’e, Yehova wacu.

⁵⁴Badwal mi ywak m’uai Babeli, man mi nyoth ma dit m’uai i ng’om mi Jukaldayo mire!

⁵⁵Kum Yehova nyotho Babeli, man enyotho dwal ma dit kud i ie; man mukura migi woi calu pi dupa, badwal mi dwalgi wodhxe;

⁵⁶kum janyoth ubino i wie, en e wi Babeli, e jumaku jurukara pare, juturo atum migi nziki nziki; kum Yehova en e Mungu mi culokwor, ebiculo kwor andha.

⁵⁷Abimero judongomawijo pare ku giramadha, man jurieko pare, ku jego pare, man jubim pare, ku jurukara pare; man gibinindo ku nindo mi nja, man gibiceu ngo, Ubimo, ma nyinge Yehova mir udul, uwacu.

⁵⁸Yehova mir udul uwacu kumae: Jubirwombo gang’kidi ma lac mi Babeli kot, man dhugang’ pare ma wiu jubiwang’u ku mac; man kodhidhanu bimuli ku tic mi gin ma ie nanu, man thek ke pi mac; e gibiol.

⁵⁹Lembe ma Yeremia ma jabila ng’olo ni Seraya ma wod Neria, ma wod Maseya, kinde m’ecidho karacelo ku Zedekia m’ubimo mi Yuda i Babeli i rundi mir ang’wende mi camuker pare. Nwang’u Serayane en e jawiot p’ubimo ma jadit.

⁶⁰E Yeremia goro lembe ma rac ceke ma bibino wi Babeli i kitabu, en e lembe maeni ceke m’ugore pi Babeli.

⁶¹Man Yeremia wacu ni Seraya kumae, Kinde m’ibino i Babeli, Lund inen nia isomo lembe maeni ceke,

⁶²man iwac kumae, E Yehova, iyero pi ka maeni, ya ibikabe woko, kara ng’atu moko mbe ma bibedo i ie, kadok dhanu kadi lim, ento nia ebibedo ni uvuru mi nja.

⁶³E ebitimbre, kinde m’idaru somo kitabu maeni, nia ibitwio kidi i kume, man ibibole i die Frati:

⁶⁴man ibiwacu kumae, Babeli bimwony kumeni, man ebiai kendo ngo kum lem ma rac m’abikelo i kume; man gibiol. Lembe pa Yeremia tundo kumeni.