Read Alur Yeremia 52 Bible Online

Yeremia 52 - Alur bible

Yeremia 52

¹Rundi pa Zedekia pier ario wi acel kinde m’emaku camu ker; man ecamu ker rundi apar wi acel i Yerusalem: man nying’ min mire Hamutal ma nya Yeremia ma Libna.

²Man etimo gin m’ubedo rac i wang’ Yehova, calku gin ceke ma Yehoiakim utimo.

³Kum etimbre i Yerusalem, ku Yuda ni kum ng’ecwiny pa Yehova, maram ebayugi ko woko kud i vute. E Zedekia jai ni ubimo mi Babeli.

⁴Man etimbre i rundi mir abung’wende mi camuker pare, i dwi mir apaje, i ceng’ mir apaje mi dwije, nia Nebukadrezar m’ubimo mi Babeli bino, en ku njuru asikari pare ceke kum Yerusalem, man egonjo i kume; man gigomo ot ma tek mir ali i kume gbur.

⁵Kum kumeno adhura bedo atieka kud ali cil kum rundi apar wi acende mi camuker p’ubimo ma Zedekia.

⁶I dwi mir ang’wende, i ceng’ mir abung’wende mi dwije, can cemo dit i adhurane, ketho nia kwen moko mbe ni dhanu m’i ng’ombe.

⁷Julund jurwombo adhurane, e dhanu mir ali ceke giringo, e giwok woko kud i adhurane ku diewor ku ba dhugang’ i kind gang’kidi ario, ma ni ng’et podho p’ubimo (nwang’u Jukaldayo gini i kum adhurane gbur); e gicidho yo bang’ Araba.

⁸Ento njuru asikari mi Jukaldayo gilubo tok ubimo, man girubo Zedekia i pambu mi Yeriko; man njuru asikari pare ceke lal i kume.

⁹E gilund gimaku ubimo, man gitere malu bang’ ubimo mi Babeli i Ribla i ng’om mir Hamath; man emio pokolembe i wie.

¹⁰E ubimo mi Babeli nego wot Zedekia i wang’e: enego judongomawijo mi Yuda ceke bende i Ribla.

¹¹Man eloyo wang’ Zedekia; man ubimo mi Babeli twic ku gwang’, man etere i Babeli, man ekethe i odkol cil i ceng’ mi tho pare.

¹²Nie i dwi mir abije, i ceng’ mir apaje mi dwije, ma en e rundi apar wi abung’wende p’ubimo ma Nebukadrezar, m’ubimo mi Babeli, Nebuzaradan ma jego mi jukur, ma cungo i wang’ ubimo mi Babeli, bino i Yerusalem.

¹³Man ewang’u ot pa Yehova, ku ot p’ubimo, ku udi ceke mi Yerusalem, en e udi ma dongo kubang’e kubang’e, ewang’u ku mac.

¹⁴Man njuru asikari ceke mi Jukaldayo ma ni karacelo ku jego mi jukur, girwombo gang’kidi ceke mi Yerusalem gbur.

¹⁵Nebuzaradan ma jego mi jukur elund etero kind dhanu ma jucan ni ng’eca, man dong’ dhanu m’udong’ i adhurane, ku ju m’upodho cen, m’umondo ni ubimo mi Babeli, ku dong’ dhanu mir udul.

¹⁶Ento Nebuzaradan ma jego mi jukur uweko ju ma jucan ma gwei mi ng’om kara ubed ni julwer kum ulok man jugwok podho.

¹⁷Man mbegi mi mola nia ni i ot pa Yehova, man thepiny ku nam mi mola ma ni i ot pa Yehova, Jukaldayo turo nziki nziki, man gitero molane i Babeli.

¹⁸Man gicidho kud agulu bende, man lupau mi ketho ng’om, ku makasi, man atangla, ku lupau, ku jamni ceke mi mola, ma gitimo kudo tic.

¹⁹Ku kikonibe, man dekle mi mac, man atangla, kud agulu, ku thethala, man lupau, ku tabu; gin ma mi mola ma kwar, i mola ma kwar, man gin ma mi mola ma tar, i mola ma tar, jego mi jukur ucidho ko.

²⁰Mbegi ario, ku nam acel, ku thwoni dhiang’ mi mola apar wi ario ma ni there, m’ubimo ma Suleman utimo mi ot pa Yehova, mola mir agulu maeni ceke por mi pekne mbe.

²¹Man pi mbegi, kaboi mi mbegi acel en e bot apar wi abora; man thol ma hot apar wi ario tieke gbur: kar ariwane en e lwet ang’wen: ie thwolo.

²²Man jambruko mi mola ni i wie; man kabor mi jambruko acel en e bot abic, ku tic mi voi man ulemo wi jambruko gbur, ceke mi mola: man mbegi mir arionde ceke calu maeni, kud ulemo.

²³Man ulemo pier abung’wen wi abusiel ni i ng’ete ceke; ulemo ceke ma ni wi voi gbur en e dak acel.

²⁴Man jego mi jukur ugamu Seraya ma jalam ma jadit, ku Zefania ma jalam mir arionde, ku jukur dhugola adek:

²⁵man egamu jego acel ku i adhura ma juketho wi dhanu mir ali; man dhanu abiro ma kind ju m’uneno wang’ ubimo, ma junwang’u i adhurane; ku jagorcik mi jego mir udul, ma goro nying’ dhanu m’i ng’ombe; man dhanu pier abusiel m’i kind dhanu mi ng’ombe, ma junwang’u i kind adhurane.

²⁶Man Nebuzaradan ma jego mi jukur ugamu gi, man etero gi bang’ ubimo mi Babeli i Ribla.

²⁷E ubimo mi Babeli goyogi, man enego gi i Ribla i ng’om mir Hamath. E jutero Yuda ni ng’eca kud i ng’om pare kumeni.

²⁸Maeni dhanu ma Nebukadrezar utero ni ng’eca: i rundi mir abirone Juyahudi rubanga adek ku pier ario wi adek;

²⁹i rundi apar wi aborane mi camuker pa Nebukadrezar etero dhanu dak abora ku pier adek wi ario kud i Yerusalem ni ng’eca;

³⁰i rundi pier ario wi adege mi camuker pa Nebukadrezar, Nebuzaradan ma jego mi jukur utero dhanu mi Juyahudi dak abiro ku pier ang’wen wi abic ni ng’eca: dhanune ceke gi rubanga ang’wen ku dak abusiel.

³¹Man etimbre i rundi pier adek wi abiro mi ng’eca pa Yehoiakin m’ubimo mi Yuda, i dwi mir apar wi arionde, i ceng’ pier ario wi abije mi dwije, nia Evilmerodak m’ubimo mi Babeli, uting’o wi Yehoiakin m’ubimo mi Yuda, i rundi ma kwong’ane mi camuker pare, man ewodhe woko kud i odkol;

³²e eweco ber i bang’e, man eketho komker pare malu wi komker mir ubimo ma ni karacelo kude i Babeli.

³³Man eloko kendi pare mi kol. Man Yehoiakin ucamu kwen i wang’e thiri thiri i nindo ceke mi kwo pare:

³⁴man pir ajok pare, ubimo mi Babeli mio ire ajok ma thiri thiri ku ba ceng’ ku ba ceng’ makapiny cil i ceng’ mi tho pare, i nindo mi kwo pare ceke.