Read Alur Ywak 1 Bible Online

Ywak 1 - Alur bible

Ywak 1

¹E adhura bedo kende, ma naka pong’ ku dhanu mire! Edoko calu dhaku ma cware tho, ma naka bedo dwong’ i kind thek mire! En ma naka e nyar ubimo i kind ng’etker edoko jami ajok mire!

²Eywak hai ku diewor, man piwang’e ni wi limbe; Kind jumer pare ceke moko mbe m’ujuke: Jurimbe ceke gitimo kud abombi i kume; gidoko judegine.

³Yuda cidho i ng’eca kum masendi, man kum muli ku tic m’akeca; Ebedo kind thek, enwang’u yom ungo: Jusend pare ceke girube i ka ma diny.

⁴Yo mi Sayuni ywak, kum ng’atu moko mbe m’ubino ba cokri mi rwo; Dhugang’ pare ceke bedo kende, julam pare gamu cwinygi: Jusendo nyir pare ma ng’won, man en gire eni i adra.

⁵Jusend pare doko ni wie, lembe bedo miero ni judegine; Kum Yehova sende kum udul gondri pare: Nyithindho pare ma thindho gicidho i ng’eca i wang’ jasend.

⁶Man dwong’ pa nya Sayuni uweke ceke: Judongomawijo pare doko calu ruda ma nwang’u kacemo ngo. Man giringo ma tego mbe kugi i wang’ jariem.

⁷Yerusalem upoi i nindo mi masendi pare man mi cur pare pi gin ma ber pare ceke ma yang’ ubedo nuti ugambre con: Kinde ma dhanu pare podho i cing’ jasend, man ng’atu moko mbe m’ukonye. Jusend ginene, gicayu uvuru pare.

⁸Yerusalem udubo dit; ka kumeno edoko calu gin m’ucido; Dhanu ceke m’uyunge gicaye, kum gineno muneru pare: Eyo, egamu cwinye, man elokre cen.

⁹Cilo pare ni i kendi pare; epoi ungo kum kajik pare ma cen: Ka kumeno eloro piny ku wang’uic: jajuk pare mbe: E Yehova, nen masendi para; kum jadegi dodre gire.

¹⁰Jasend urieyo cinge wi gin pare ceke ma ber: Kum eneno nia thek umondo i kamaleng’ pare, M’ing’olo pire nia ku gimond i cokri peri.

¹¹Dhanu pare ceke gamu cwinygi, giyenyo kwen; Gimio gin ma ber migi pi cemo kara udwok cwinygi: Nen, E Yehova man ing’i; kum adoko ni gin ma jucayu.

¹²En e gin moko ngo iwu, wu ju ma wukadhu akadha ceke? Wunen, man wung’i tek can moko nuti ma calku can para, ma jukelo i wia, Ma Yehova senda kudo i ceng’ mi ng’ecwiny pare ma lake tek.

¹³Eoro mac i cogona ku malu, man esagugi; Eciko voi ni tienda, eloka cen: Edwoka lic man m’avoc ceng’ du.

¹⁴Mberembere mi gondri para ubedo atwia ku cinge; Giribri karacelo, giwok wi ng’uta; eketho tegona thum: Rwoth umia i cing’gi, m’acopo ai ungo i kumgi.

¹⁵Rwoth udwoko dhanu para ma jukero ceke i kinda; Elwong’o cokri mi rwo i kuma kara ung’eny awobi para: Rwoth unyono nya Yuda ma ng’won calu i pany mir ulok.

¹⁶Kum gin maeni aywak; wang’a, wang’a molo pi; Kum jajuk ma maku udwok ng’eyong’ec para ni bor kuda: Nyithindha gibedo kendgi, kum jadegi sagu.

¹⁷Sayuni thang’u cinge; ng’atu moko mbe m’ujuke; Yehova ng’olo pi Yakobo, nia ju m’utieke gbur ubed jusend pare, Yerusalem ni i kindgi calu gin m’ucido.

¹⁸Yehova e pwe; kum ajai kum lembang’ola pare: Wuwinji, akwayuwu, wu kodhidhanu ceke, man wunen can para: Nyir para ma ng’won kud awobi para gicidho i ng’eca.

¹⁹Alwong’o jumerna, ento gibomba: Julam para ku judongo para gimwonyo cwinygi i adhura, Kinde ma giyenyo cemo igi kara udwok ng’eyong’ec migi.

²⁰Nen, E Yehova; kum ani i can; adundena ng’abre; Adundena lokre yor i ia; kum ajai rac: Kamange palamularu nego, i pacu lem tho nuti.

²¹Giwinjo nia agamu cwinya; ng’atu moko mbe m’ujuka; Judegina ceke giwinjo pi can para; anyong’a negogi kum itimo maeni; Ibikelo ceng’ m’uyero pire, man gibibedo calu an.

²²Wek dubo migi ceke wok i weng’i; Man itim i kumgi, calu itimo i kuma kum gondri para ceke: Kum gamucwinya gi dupa, man adundena voc.