Read Alur Ywak 2 Bible Online

Ywak 2 - Alur bible

Ywak 2

¹E rwoth uumo nya Sayuni kud afuru i ng’ecwiny pare mire! Ebayu gin ma ber mir Israel piny i ng’om kud i polo, Man epoi ungo kum kom mi tiende i ceng’ mi ng’ecwiny pare.

²Rwoth umwonyo kabedo ceke pa Yakobo, man ngisi nege ngo: Eredho ka ma tek pa nya Yuda piny ku kwinyo pare; Eredhogi piny i ng’om; ecido ker ku judongomawijone.

³Eng’olo tung ceke mir Israel ku ng’ecwiny pare ma lake tek; Edolo cinge ma yor acwic kud i wang’ judegi: Man ewang’u Yakobo calu mac m’uliel, ma wang’ gbur.

⁴Egomo atum pare calu jadegi, ecungoku cinge ma yor acwic calu jasend, Man enego dhanu ceke ma nyayu mutoro i wang’: I hema pa nya Sayuni ekonjo kwinyo pare calu mac.

⁵Rwoth udoko calu jadegi, emwonyo Israel; Emwonyo udi mi ker pare ceke, enyotho ka ma tek pare; Man emedo ywak ku goyonduru i nya Yuda.

⁶Man ekabu otbak pare ku kero, calu en e mi podho; enyotho ka mi cokri pare: Yehova ketho wi jo wil kum cokri mi rwo man sabatu i Sayuni, Man ecayu ubimo ku jalam i kwinyo mi ng’ecwiny pare.

⁷Yehova bayu pemblam pare, edagu kamaleng’ pare; Emio gang’kidi mi udi mi ker pare i cing’ jadegi: Giwoi i ot pa Yehova, calu mi cing’ cokri mi rwo.

⁸Yehova keco ya enyoth gang’kidi pa nya Sayuni; Erieyo thol, edolo cinge ngo ni nyoth; Eketho ka ma tek ku gang’kidi giywak; cwinygi dieng’ karacelo.

⁹Dhugang’ pare mwony i ng’om; enyotho man eturo utwindine: Ubimo pare ku judongomawijo pare gini i kind thek ka ma cik umbe i ie; Eyo, jubila pare gineno ginmawokiwang’ ungo m’uai ba Yehova.

¹⁰Judongo pa nya Sayuni bedo wi ng’om, gibedo ling’; Gikiro utur i wigi; gitwiri gigi ku gonia; Nyir ma ng’won mi Yerusalem gikulo wigi i ng’om.

¹¹Wang’a ol ku piwang’, cwinya ng’abre; Cwiny mi kuma konjre woko wi ng’om, kum nyoth pa nya dhanu para, Kum ju ma nyithindho ku mukere givoc i gengi mir adhura.

¹²Giwacu ni meggi kumae, Cam ku pigulok ni kani? Kinde ma givoc calu ju m’unwang’u lero i gengi mir adhura, Kinde ma ng’eyong’ec migi konjre woko i kor meggi.

¹³Abituco ang’o iri? abipori kud ang’o? E nya Yerusalemi? Abipori kud ang’o, kara ajuki, E nyaku ma ng’won ma nya Sayuni? Kum giratura peri e dit calu nam: ng’a ma copo cengi?

¹⁴Jubila peri gineno iri ginmawokiwang’ mi ndra man mi kasegu; Man giyabu kier peri ngo, kara gidwok ng’eca peri, Ento giewo lembajoga mi ndra iri ku lembe mi dak.

¹⁵Dhanu ceke m’ukadhu akadha giteng’o cing’gi iri; Gicwio nya Yerusalem man giyengo wigi ire, giwacu kumae, Maeni adhura ma dhanu lwong’o kumae, Gin ma ndhu cu mi leng’, Anyong’a mi ng’om ngung’i?

¹⁶Judegi peri ceke ging’amu dhoggi i kumi; Gicwic ther man ging’enjo lakgi; giwacu kumae, Wamwonye; Maeni ceng’ ma wakio andha; wanwang’e, wanene.

¹⁷Yehova timo maeno m’ekeco; etimo lembe pare kakare m’eng’olo i nindo ma con; Eredho piny, man ngisi nege ngo: Man eketho anyong’a nego jadegi i kumi; eyungo tung pa jusend peri.

¹⁸Adundegi lwong’o ba Rwoth: E gang’kidi pa nya Sayuni, wek piwang’ umol piny calu kulo ma dit dieceng’ ku diewor; Kud iyom giri; kud iwek nying weng’i ling’.

¹⁹Ai, kok ku diewor, i thekri mi kur; Konj adundeni woko calu pi i wang’ Rwoth: Thang’ cingi yor i bang’e pi kwo mi nyithindho peri ma thindho, m’uvoc ku kec dhu gengi kubang’e kubang’e.

²⁰Nen, E Yehova, man nen ng’a m’itimo kumeno i kume! Mon bicamu nying’gi, en e nyithindho ma juthang’u i cing’i? Jubinego jalam ku jabila i kamaleng’ pa Rwothi?

²¹Jalawobi ku ng’atu m’uti givuto i ng’om i gengi; Nyir para ma ng’won kud awobi para m’aradu gipodho ku palamularu: Inegogi i ceng’ mi ng’ecwiny peri; inego, man ngisi negi ngo.

²²Ilwong’o ndiri para yo kun ku kun, calu i ceng’ mi cokri mi rwo; E ng’atu moko mbe m’uboth kadi m’udong’ i ceng’ mi ng’ecwiny pa Yehova: Dhanu m’athang’u man atungo jadegina daru.