Read Alur Ywak 3 Bible Online

Ywak 3 - Alur bible

Ywak 3

¹An a dhanu m’uneno masendi kud uluth mi kwinyo pare.

²Etelo wia man eketho awotho i mudho, i der ungo.

³Andha eloko cinge i kuma kendo kendo ceng’ du.

⁴Etio ring’kuma ku dendkuma; eturo cogona.

⁵Egomo i kuma, man etieka kud ulecu man olo.

⁶Eketho abedo i ka ma col, calu ju m’utho con.

⁷Etieka ku gang’, kara kud awok woko; edwoko nyoro para pek.

⁸Eyo, kinde m’aywak, man alwong’o kony, eciko ba rwo para.

⁹Eciko yo para ku gang’ mi kidi m’apaya; egondo yo para.

¹⁰Ebedo ira calu wai m’ubekanu adhi, calu umvor i ka ma kende.

¹¹Eloko yo para cen, man eyeca nziki nziki; eketho abedo a kenda.

¹²Egomo atum pare, man eketha calu girakila ni athero.

¹³Ekila i piera kud athero m’i tubu pare.

¹⁴Adoko ni jamng’iero ni dhanu para ceke, ku wer migi ceng’ du.

¹⁵Epong’a kud ulecu, man eromo kuma kud adra.

¹⁶Eturo laka bende ku kidi ma tek; euma ku vuru.

¹⁷Man ecoro ng’eyong’ec para cen ku kwiocwiny; wia wil kum mierolembe.

¹⁸Man awacu kumae, Tegona rwinyo, man genogen para de rwinyo ku ba Yehova.

¹⁹Poi kum masendi para ku wundo para, adra kud ulecu.

²⁰Ng’eyong’ec para poi i kumgi asu, man egung’ yor i ia.

²¹Apoi kum lembe maeni; ka kumeno abedo ku genogen.

²²En e kum mer mi bero pa Yehova nia ku wathum, kum ngisi pare rem ungo.

²³Gi nyen ku ba rupiny ku ba rupiny; bedo mandha peri e dit.

²⁴Yehova en e makapiny para, ng’eyong’ec para wacu; ka kumeno abigeno gen ni kume.

²⁵Yehova e ber ni ju m’ukure, ni ng’eyong’ec m’uyenye.

²⁶E ber ya dhanu gen man ekur yo pi both pa Yehova.

²⁷E ber ni dhanu ya eyei mberembere i aradu pare.

²⁸Wek ebed e kende man ebed ling’, kum ekethe i wie.

²⁹Wek eketh dhoge i utur, tek kuno nyo genogen nuti.

³⁰Wek emi limbe ni ng’atu m’ugoye; wek epong’ ku cac.

³¹Kum Rwoth bibayu mi nja ngo.

³²Kadok ekelo can, ento ngisi binege calkud udul mer mi bero pare.

³³Kum enyayu can ungo ku i adundene de, kadok sendo nyithi dhanu.

³⁴Ma nia enyon jukol ceke m’i ng’om the tielo,

³⁵Ma nia elok ng’ol mi dhanu cen i nyim wang’ Ng’atu ma Malu Ngbir,

³⁶Redho dhanu i lembe pare, Rwoth yio ngo.

³⁷Ng’a m’uwacu, man etimbre kakare, ma Rwoth kung’olo re ngo?

³⁸Gin ma ber ku gin ma rac wok kud i dhu Ng’atu ma Malu Ngbir ungo?

³⁹Pirang’o dhanu ma kwo kayu ywaki, pi masendi mi dubo pare en e dhanu?

⁴⁰Wek waponj yo mwa wamul, man walokra kendo ba Yehova.

⁴¹Wek wating’ adundewa ku cingwa ba Mungu i polo.

⁴²Wakadhu ku wi cik man wajai; iweko woko ngo.

⁴³Iumbri ku ng’ecwiny man iriemowa; inego, ngisi negi ngo.

⁴⁴Iumbri kud afuru, kara rwo kud ukadhi.

⁴⁵Idwokowa ni susu man cilo i kind kodhidhanu.

⁴⁶Judegi mwa ceke ng’amu dhoggi lac i kumwa.

⁴⁷Lworo man vur uwok i kumwa, jigo wi piny man nyoth.

⁴⁸Wang’a molo kulo mi pi piny, kum nyoth pa nya dhanu para.

⁴⁹Piwang’a core piny, man ecok ungo, ma kajikne mbe,

⁵⁰Maram Yehova bineno ko piny, man enen kud i polo.

⁵¹Wang’a sendo ng’eyong’ec para, kum nyir mir adhura para ceke.

⁵²Giriema rac calu winyo, gi ju ma gi judegina ma lembe mbe.

⁵³Githumo kwo para woko i vur, man gibolo kidi i kuma.

⁵⁴Pi mol i wia; awacu kumae, Juthuma cen.

⁵⁵Alwong’o nyingi, E Yehova, kud i vur ma thuth.

⁵⁶Iwinjo dwanda; kud ipan ithi ni yuyo para, kum ywak para.

⁵⁷Icoro ceng’ni i ceng’ m’alwong’i; iwacu kumae, Lworo kud unegi.

⁵⁸E Rwoth, icungo kum lembe mi ng’eyong’ec para; iwaru kwo para.

⁵⁹E Yehova, ineno gin ma jutimo i kuma rac; pok lembe para.

⁶⁰Ineno culokwor migi ceke ku lembrieko migi ceke i kuma.

⁶¹Iwinjo cac migi, E Yehova, ku lembrieko migi ceke i kuma,

⁶²Dendhu ju m’uketho wang’gi i kuma, ku lembrieko migi i kuma ceng’ du.

⁶³Nen bedopiny migi, ku ai malu migi; an a wer migi.

⁶⁴Ibiculo kwor i kumgi, E Yehova, calku tic m’i cing’gi.

⁶⁵Ibimio igi abinga mir adunde, en e kwong’ peri i kumgi.

⁶⁶Ibiriemogi ku ng’ecwiny, man ibinyothogi the polo pa Yehova.