Read Alur Ywak 4 Bible Online

Ywak 4 - Alur bible

Ywak 4

¹Mola ma kwar urieny ungo mire! mola ma kwar ma leng’ m’usagu lokre mire! Kidi mi kamaleng’ ukonjre woko i gengi kubang’e kubang’e.

²Wot Sayuni ma pire tek, ma juporo ku mola ma kwar ma leng’, Jukwanugi calu cupa mir ulobo, tic m’i cing’ jacwiagulu mire!

³Cil utho giwodho thuno gimio cak ni nyithindhgi: Nya dhanu para cwinye doko kwar, calu udo i langa.

⁴Leb nyathin ma dhoth umoko kum dande ni rieu: Nyithindho ma thindho gipenjo kwen, e ng’atu moko mbe m’ung’wenye igi.

⁵Ju ma camu cemo ma mit hai gibedo kendgi i gengi: Ju ma jutungogi ku kendi ma kwar gigwaku udhuru mi weyo.

⁶Kum kier pa nya dhanu para e dit ma sagu dubo mi Sodom, Ma juredho calu i nindo ma nyagwil, e cing’ moko mbe ma juketho i kume.

⁷Ju pare m’ung’olo lembang’ola naka gi tar ma sagu pei, gi tar ma sagu cak; Kumgi leng’ ma sagu kidi mi ruko, rieny migi calu kidi m’ulweku.

⁸Kumgi doko col ma sagu bilo; jung’eyogi ngo i gengi: Dendkumgi moko kum cogogi; eduny, edoko calu apoka piny.

⁹Ju ma junego ku palamularu ber sagu ju ma junego ku kec; Kum maeni gimok gital, gigwendri, kum can mi nying’ podho m’unegogi.

¹⁰Cing’ mon ma jungisi gitedo nyithindho migi ma dhe; Gin gi cemo migi i nyoth pa nya dhanu para.

¹¹Yehova daru kwinyo pare, ekonjo ng’ecwiny pare ma lake tek woko, Man ecwinyo mac i Sayuni, m’uwang’u there.

¹²Ju m’ubimo mi ng’om uyio ngo, kadok dhanu ceke m’ubedo i ng’om, Nia jasend ku jadegi bimondo i dhugang’ mi Yerusalem.

¹³En e kum dubo mi jubila pare, ku kier mi julam pare, M’ucwiro rimo mi ju ma pwe i kinde.

¹⁴Giwiri calu dhanu m’abinga i gengi, gicidri ku rimo, Ketho nia dhanu copo mulo kendi migi ngo.

¹⁵Wuai, gikok i bang’gi, Leng’ ungo! wuai, wuai, kud wumul! Kinde ma giringo man giwiri, dhanu wacu kumae, i kind thek, Gibibedo keni kendo ngo.

¹⁶Ng’ecwiny pa Yehova kethogi; ebiparu pigi kendo ngo: Giparu pi wang’ julam ungo, ginyutho bero ngo ni judongo.

¹⁷Wang’wa jony kum kio kony mwa mananu: I kur mwa wakuro thek ma copo bodho ngo.

¹⁸Gidwaru ba tiendwa, ketho nia wacopo mondo ngo i gengi mwa: Kajik mwa ni ceng’ni, nindo mwa daru welne: kum kajik mwa tundo.

¹⁹Ju m’uriemowa gi jung’wec ma sagu acur m’i polo: Giriemowa wi gudi, gikanu adhi iwa langa.

²⁰Yuyo mi odiumwa, wa ju ma Yehova wiro, jumaku i vur migi; Ma wawacu pire kumae, Wabikwo kind thek the tipopiny pare.

²¹Anyong’a negi man ibed ku mutoro, E nyar Edom, m’ubedo i ng’om Uz: Kopo bikadhu i beng’i bende; ibimer amera, man ibidwokri muneru.

²²Masendi mi kier peri timbre, E nya Sayuni; ebiteri cen i ng’eca kendo ngo: Ebiliewo kier peri, E nyar Edom; ebiyabu dubo peri.