Read Alur Ezekiel 1 Bible Online

Ezekiel 1 - Alur bible

Ezekiel 1

¹Nie etimbre i rundi pier adege, i dwi mir ang’wende, i ceng’ mir abije mi dwije, kinde m’ani i kind ng’eca dhu kulo Kebar, nia polo yabre, man aneno ginmawokiwang’ pa Mungu.

²I ceng’ mir abije mi dwije, ma en e rundi mir abije mi ng’eca p’ubimo ma Yehoiakin,

³lembe pa Yehova bino ng’beng’ ba Ezekiel ma jalam, ma wod Buzi, i ng’om mi Jukaldayo dhu kulo Kebar; e cing’ Yehova ni i wie kuca.

⁴Man aneno, man, nen, yamu ma wavuvu ai yor ariwa ma malu, afuru ma dit, ku mac ra’uwinjre gire i ie, man rieny m’utieke gbur, man umbu m’urieny ni i kinde, kud i die mac.

⁵Man avi gin ma kwo ang’wen uwok Jcud i kinde. Man maeni en e nen migi: Gibedo kud ayi dhanu;

⁶man kubang’gi kubang’gi wang’gi ang’wen ang’wen, man kubang’gi kubang’gi bombgi ang’wen ang’wen.

⁷Man tiendgi en e tielo m’atira; man tiendgi ma nyono ng’om e calu tiend nyathi dhiang’; man girieny calu mola ma jurudo.

⁸Man gibedo ku cing’ dhanu the bombgi i ng’etgi ang’wen; man gin ang’wen gibedo kubombgiku wang’gi de kumeni:

⁹bombgi ribre kum wadi; gilokri ngo kinde ma gicidho; kubang’gi kubang’gi man ucidho atira i wang’e.

¹⁰Pir ayi wang’gi, gibedo ku wang’gi pa wang’ dhanu; man gin ang’wen wang’gi pa wang’ umvor i ng’etgi ma yor acwic; man gin ang’wen wang’gi pa wang’ koni dhiang’ i ng’etgi ma yor acam; man gin ang’wen wang’gi pa wang’ acur bende.

¹¹Man wang’gi ku bombgi tung’ tung’ ku malu; bombgi ario kubang’gi kubang’gi uribri kum wadi, man ario umo kumgi.

¹²Man kubang’gi kubang’gi man ucidho atira i wang’e: ka ma tipo cidho i ie, gicidho; gilokri ngo kinde ma gicidho.

¹³Pir ayi gin ma kwone, nen migi calu cukmac m’uwang’, calu nen mi dhumac: mac cidho malu ku piny i kind gin ma kwo; man mac urieny, man lukoth wok woko kud i macne.

¹⁴Man gin ma kwone giringo gi dwogo de calu nen mi lukoth.

¹⁵Nie kan aneno gin ma kwo, nen, ukobre acel ni wi ng’om i ng’et gin ma kwo, mi wang’gi ang’wen kubang’e kubang’e.

¹⁶Nen mir ukobrene ku tic migi e calu kidi ma col calu nam: man gin ang’wen ayigi acel; man nen migi ku tic migi bedo calu ukobre yo i ukobre.

¹⁷Kinde ma gicidho, gicidho i migi ang’wen: gilokri ngo kinde ma gicidho.

¹⁸Usau mir ukobre migi gi boco man mi lworo; man gin ang’wen usau mir ukobre migi pong’ ku wang’ gbur.

¹⁹Man kinde ma gin ma kwo cidho, ukobrene de cidho i ng’ete; man kinde ma gin ma kwo tingre malu kud i ng’om, ukobrene de tingre malu.

²⁰Ka ma tek tipo cidho i ie, gin de gicidho; tipo cidho kuca: e ukobrene tingre malu i ng’etgi; kum tipo mi gin ma kwo ni i ukobrene.

²¹Kinde ma maeno cidho, maeni de cidho; man kinde ma maeno cungo, maeni de cungo; man kinde ma maeno tingre malu kud i ng’om, ukobrene de tingre malu i ng’etgi: kum tipo mi gin ma kwo ni i ukobrene.

²²Man gin moko nuti wi gin ma kwo ma calu apokapiny, ma nen calu pei m’uriang’ni m’ubedo arieya ka wigi ku malu.

²³Man bombgi bedo atira ther apokapiny, acel yo ba wadi: kubang’gi kubang’gi gibedo ku bombgi ario ario ma umo kumgi kucel, man kubang’gi kubang’gi gibedo ku bombgi ario ario ma umo ng’et kumgi mucelo.

²⁴Man kinde ma gicidho, awinjo badwand bombgi calu badwand pi ma dit, calu dwand Ng’atu ma Jategokpo, badwal mi yakni calu badwal mir udul: kinde ma gicungo, gikonjo bombgi piny.

²⁵Man dwal nuti wi apokapiny ma ni wi wigi: kinde ma gicungo, gikonjo bombgi piny.

²⁶Man ayi komker ma ni wi apokapiny ma ni wi ka wigi ku malu, calu nen mi kidi ma tek ma ie nen uluga; man ayi nuti wi ayi mi komker calu nen mi dhanu i wie ku malu.

²⁷Man aneno gin ma calu umbu m’urieny, calu nen mi mac yor i ie gbur, ugambre kum nen mi piere man ku malu; man ugambre kum nen mi piere man yo piny aneno calu nen mi mac, man rieny ni i kume gbur.

²⁸Calu nen mi danyu ma ni i afuru i ceng’ mi koth, e nen mi rieny ma gbur ubedo kumeca. Maeni en e nen mir ayi mi dwong’ pa Yehova. Man kinde m’aneno maeni, apodho arieba wang’a, man awinjo dwand ng’atu m’uyero.