Read Alur Ezekiel 11 Bible Online

Ezekiel 11 - Alur bible

Ezekiel 11

¹Mange ke Tipo ting’a malu, man etera ba dhugang’ ma yo nyangu mi ot pa Yehova, ma neno yo nyangu: man nen, i dhugola mi dhugange dhanu pier ario wi abic; man aneno Yazania ma wod Azur i kindgi, man Pelatia ma wod Benaya, ma gi judongomawijo mi dhanu.

²Man ewacu ira kumae, Wod dhanu, maeni dhanu m’upido pi kier, man m’umio lembapora mi dubo i adhura maeni;

³m’uwacu kumae, Nindo mi gomo udi ni ceng’ni ngo: adhura maeni en e ajiku ma dit, man wan wa ring’kum.

⁴Ka kumeno cu lembe i kumgi, cu, E wod dhanu.

⁵E Tipo pa Yehova podho i wia, man ewacu ira kumae, Yer, Yehova wacu kumae: E ot mir Israel, wuwacu kumeni; kum ang’eyo gin m’ubino i pidoic mu.

⁶Wumedo ju ma junego mu i adhura maeni, man wupong’o gengine ku ju ma junego.

⁷Ka kumeno Rwoth Yehova wacu kumae: Ju ma junego mu ma wuketho i kinde, gin gi ring’kum, man adhura maeni en e ajiku ma dit; ento jubiwodhowu woko kud i kinde.

⁸Wulworo palamularu; e abikelo palamularu i kumwu, Rwoth Yehova wacu.

⁹Man abiwodhowu woko kud i kinde, man abimiowu i cing’ juwirok, man abitimo lembapoka i kindwu.

¹⁰Wubipodho ku palamularu; abipoko lembe mu i kieu mir Israel; e wubing’eyo nia an a Yehova.

¹¹Adhura maeni bibedo ajiku ma dit mu ngo, kadok wun de wubibedo ring’kum i kinde ngo; abipoko lembe mu i kieu mir Israel;

¹²e wubing’eyo nia an a Yehova: kum wuwotho i cik para ngo, kadi wutimo lembapoka para de ngo, ento wutimo tok lembapoka mi thek ma ni i ng’etwu gbur.

¹³Man etimbre, kinde m’aewo, nia Pelatia ma wod Benaya tho. Alund apodho piny arieba wang’a, man akok ku dwanda ma tek, awacu de kumae, A Rwoth Yehova! ibijigo dong Israel ma gwei?

¹⁴Man lembe pa Yehova bino i bang’a, m’uwacu kumae,

¹⁵Wod dhanu, utumeru, en e utumeru, dhanu mi wat peri, ku ot mir Israel ceke, kagi ceke, gi ju ma ju m’ubedo i Yerusalem giwacu igi kumae, Wucor cen kum Yehova; jumio ng’om maeni iwa ni piny.

¹⁶Ka kumeno wac kumae, Rwoth Yehova wacu kumae: Kadok adakugi bor i kind thek, man kadok alalugi i kind ng’om, ento abibedo igi ni kamaleng’ nindo ma nok i ng’om ma gicidho i ie.

¹⁷Ka kumeno wac kumae, Rwoth Yehova wacu kumae: Abicokowu ba kodhidhanu, man abicokowu kud i ng’om ka ma julaluwu i ie, man abimio ng’om mir Israel iwu.

¹⁸Man gibibino kuca, e gibikabu gin ceke ma racne ku ginmajudagune ceke ku kuca.

¹⁹Man abimio igi adundegi acel, man abiketho tipo ma nyen yor i iwu; man abikabu adunde mi kidi kud i ring’kumgi, man abimio igi adunde mi ring’kum;

²⁰kara giwoth i cik para, man giwor lembapoka para, gitimgi de: man gibibedo dhanu para, man abibedo Mungu migi.

²¹Ento pi ju ma adundegi wotho tok adunde mi ginmarac migi ku ginmajudagu migi, abikelo yo migi i wigi gigi, Rwoth Yehova wacu.

²²Kerubi lund uting’o bombgi, man ukobre ni i ng’etgi; man dwong’ pa Mungu mir Israel ni i wigi ku malu.

²³Man dwong’ pa Yehova idho malu ku kind adhurane, man ecungo wi got ma ni i ng’et adhurane ma yo nyangu.

²⁴Man Tipo ting’a malu, man etera i ginmawokiwang’ ku Tipo pa Mungu i Kaldayo, ba ju mi ng’eca. Kum kumeno ginmawokiwang’ m’aneno idho malu kud i bang’a.

²⁵Alund ayero gin ceke ma Yehova nyutho ira ni ju mi ng’eca.