Read Alur Ezekiel 12 Bible Online

Ezekiel 12 - Alur bible

Ezekiel 12

¹Lembe pa Yehova bende bino i bang’a, m’uwacu kumae,

²Wod dhanu, ibedo i kind ot mi jai, ma gibedo ku wang’ mi neno, man gineno ngo, ma gibedo ku ith mi winjo, man giwinjo ngo; kum gi ot mi jai.

³Ka kumeno, in i wed dhanu, yik jamni iri mi dak ma judak ko, man idak ku dieceng’ i wang’gi; man idak ku i kakeri i kamange i wang’gi: kuno nyo gibiparu lembe, kadok gi ot mi jai.

⁴Man iwodh jamni peri woko ku dieceng’ i wang’gi, calu jamni mi dak ma judak ko; man iwok woko in giri uthieno i wang’gi, calu ka dhanu cidho i ng’eca.

⁵Ikimy kud i gang’kidi i wang’gi, man ikab ginde woko kudo.

⁶Yeye wi goki i wang’gi, man itere woko i mudho; um weng’i, kara kud inen ng’om: kum akethi ni giranyutha ni ot mir Israel.

⁷Man atimo kumeca calu jung’olo ira: awodho jamni para woko ku dieceng’, calu jamni mi dak ma judak ko, man uthieno akunyo kud i gang’kidi ku cinga; awodho ginde woko kud i mudho, man ayeye wi goka kud i wang’gi.

⁸Man kugweno lembe pa Yehova bino i bang’a, m’uwacu kumae,

⁹Wod dhanu, ot mir Israel, ot mi jai, uwacu iri ngo kumae, Itimo ang’o?

¹⁰Wac igi kumae, Rwoth Yehova wacu kumae: Ewolembe maeni en e pi jaditmawijo mi Yerusalem, ku ot mir Israel ceke ma gini i kindgi.

¹¹Wac kumae, An a giranyutha peri: calu adaru timo, jubitimo igi kumeca; gibicidho i ng’om mange, i ng’eca.

¹²Man jaditmawijo ma ni i kindgi biyeyo wi goke ku diewor, man ebiwok woko: gibikunyo kud i gang’kidi kara gilab kudo ginde: ebiumo wang’e, kum ebineno ng’om ungo ku wang’e.

¹³Abipedho voi para bende i kume, man jubimake i uwic para; man abikele i Babeli i ng’om mi Jukaldayo; ento ebinene ngo, kadok ebitho kuca.

¹⁴Man abilalu dhanu ceke m’utieke gbur m’ukonye, kud udul pare ceke yo ba yamu kun ku kun; man abiwodho palamularu i tokgi.

¹⁵E gibing’eyo nia an a Yehova, kinde m’abilalugi i kind thek, m’abikethogi de kud i ng’om.

¹⁶Ento abiweko dhanu ma nyanok m’i kindgi ni palamularu, man ni ndru, man ni thong’om; kara giyer pi ginmajudagu migi ceke i kind thek ka ma gicidho i ie; e gibing’eyo nia an a Yehova.

¹⁷Mange ke lembe pa Yehova bino i bang’a, m’uwacu kumae,

¹⁸Wod dhanu, cam kwen peri ku mielkum, man madh pi peri ku mielkum man ku lworo;

¹⁹man wac ni dhanu m’i ng’om kumae, Rwoth Yehova wacu kumae, pi dhanu m’ubedo i Yerusalem, man pi ng’om mir Israel: Gibicamu kwen migi ku lworo, man gibimadhu pi migi kud ang’abacwiny, kara ng’om pare bed kende toli, ma juyaku gin ceke ma ni i ie, kum rop mi dhanu ceke m’ubedo i ie.

²⁰Man adhura ma jubedo i ie jubidwoko ni uvuru, man ng’om bidoko ni nyoth; e wubing’eyo nia an a Yehova.

²¹Man lembe pa Yehova bino i bang’a, m’uwacu kumae,

²²Wod dhanu, lembabola maeni ang’o ma wutedo ko i ng’om Israel, ma wuwacu kumae, Nindo ton, man ginmawokiwang’ kubang’e kubang’e ujiki?

²³Ka kumeno yer igi kumae, Rwoth Yehova wacu kumae: Abijigo lembabola maeni, man gibitime kendo ngo calu lembabola i kind Israel; ento wac igi kumae, Nindo ni ceng’ni, ku timbre kakare mi ginmawokiwang’ kubang’e kubang’e.

²⁴Kum ginmawokiwang’ mi ndra moko bibedo nuti kendo ngo kadi ng’eyolembe mi pak yor i ot mir Israel.

²⁵Kum an a Yehova; abiyero, man lembe m’abiyero bitimbre; jubicore cen kendo ngo: kum i nindo mu, E ot mi jai, abiyero lembene, man abitime, Rwoth Yehova wacu.

²⁶Lembe pa Yehova bino i bang’a kendo, m’uwacu kumae,

²⁷Wod dhanu, nen, ju m’i ot mir Israel giwacu kumae, Ginmawokiwang’ m’eneno en e mi nindo dupa ma bibino, man eewo pi nindo ma ni bor.

²⁸Ka kumeno wac igi kumae, Rwoth Yehova wacu kumae: Lembe para moko mbe ma jubicoro cen kendo, ento lembe m’abiyero bitimbre, Rwoth Yehova wacu.