Read Alur Ezekiel 13 Bible Online

Ezekiel 13 - Alur bible

Ezekiel 13

¹Man lembe pa Yehova bino i bang’a, m’uwacu kumae,

²Wod dhanu, cu lembe kum jubila mir Israel ma giewo lembe, man iwac ni ju ma ewo lembe ku i adundegi gigi kumae, Wuwinj lembe pa Yehova:

³Rwoth Yehova wacu kumae, Can ni jubila ma kitgi mbe, ma gilubo tok tipogi gigi, man ma gineno gin moko ngo mire!

⁴E Israel, jubila peri gibedo calu kaki wi uvuru.

⁵Wuidho malu i ka m’umor ungo, kadi wugomo gang’kidi mi ot mir Israel de ngo, kara gicung i lwiny i ceng’ pa Yehova.

⁶Gineno ndra ku ng’eyolembe mi ndra, m’uwacu kumae, Yehova wacu kumae; ento Yehova orogi ngo: man giketho dhanu geno nia lembe bitimbre.

⁷Wuneno ginmawokiwang’ mi ndra ngo, man wuyero ng’eyolembe mi ndra ngo, kum wuwacu kumae, Yehova wacu; ento ayero ngo?

⁸Ka kumeno Rwoth Yehova wacu kumae: Kum wuyero ndra, man wuneno ndra, ka kumeno, nen, an a jadhogwu, Rwoth Yehova wacu.

⁹Man cinga bibedo kum jubila m’uneno ginmawokiwang’ mi ndra, man m’ung’eyo ndra: gibibedo i kind juporlembe mi dhanu para ngo, kadi jubikiewogi de ngo i lembakiewa mi ot mir Israel, kadi gibimondo i ng’om Israel de ngo; e gibing’eyo nia an a Rwoth Yehova.

¹⁰Kum en e kum gibombo dhanu para, giwacu kumae, Kwiocwiny; e kwiocwiny moko mbe; man kinde ma ng’atu moko gomo gang’, nen, gifuye kud uza:

¹¹wac ni ju m’ufuye kud uza, nia ebipodho: koth ma dit bicwi; man wun, E kidi mi pei ma dit, wubipodho; man yamu mi wavuvu biyece.

¹²Nen, kinde ma gang’ upodho, jubiwacu iwu kumae ngo, Fui ma wufuye ko ni kani?

¹³Ka kumeno Rwoth Yehova wacu kumae: Abiyece ku yamu mi wavuvu i kwinyo para; man koth ma dit bibedo nuti i ng’ecwiny para, man kidi mi pei ma dit i kwinyo para kara udare.

¹⁴E abirwombo gang’ ma wufuyo kud uza kumeca, man abirwombe piny i ng’om, ketho nia there bibedo ngbeng’; man ebipodho, man wubinyothru i kinde: e wubing’es’o nia an a Yehova.

¹⁵Abidaru kwinyo para wi gang’ne kumeca, man wi ju m’ufuye kud uza; man abiwacu iwu kumae, Gang’ne mbe kendo, kadok ju m’ufuye de;

¹⁶thelembene, jubila mir Israel m’uewo pi Yerusalem, man m’uneno ginmawokiwang’ mi kwiocwiny pire, man kwiocwiny umbe, Rwoth Yehova wacu.

¹⁷Man in, wod dhanu, keth weng’i kum nyig dhanu peri, ma giewo ma i adundegi gigi; man ieu lembe i kumgi,

¹⁸man iwac kumae, Rwoth Yehova wacu kumae: Can wi mon ma kwoyo usau ma yom wi the bot ceke, man ma timo kitambala m’i wie ni dhanu mi kadongo ma tung’ tung’ kara uyeny ng’eyong’ec! Wubiyenyo ng’eyong’ec mi dhanu para, man wubibodho ng’eyong’ec ma kwo iwu giwu?

¹⁹E wucida i kind dhanu para pi nganu ma tung’ ma pong’ cing’ man pi lungu kwen, kara wuneg ng’eyong’ec ma maku ku githo, man kara wubodh ng’eyong’ec ma kwo ma maku ku gikwo, ku cwayundra mu ni dhanu para m’uwinjo ndra.

²⁰Kum kumeno Rwoth Yehova wacu kumae: Nen, an a jadhu usau ma yom mu, ma wuyenyo kudo ng’eyong’ec kara wuketh giringi, man abiyecogi kud i botwu; man abiweko ng’eyong’ecne cidho, en e ng’eyong’ec ma wuyenyo kara wuketh giringi.

²¹Kitambala mu bende abiyeco, man abibodho dhanu para kud i cingwu, kara ku gibed i cingwu kendo kara wuyenygi; e wubing’eyo nia an a Yehova.

²²Kum ku ndra wunyayu can i adunde ju ma pwe, m’aketho can uneggi ngo, man wumio tego ni cing’ jadubo, kara kud edwog kud i yo pare ma rac, man kud eboth ma kwo;

²³ka kumeno wubineno ginmawokiwang’ mi ndra kendo ngo, kadi wubing’eyo girang’eya de ngo: man abibodho dhanu para kud i cingwu; e wubing’eyo nia an a Yehova.