Read Alur Ezekiel 14 Bible Online

Ezekiel 14 - Alur bible

Ezekiel 14

¹Jumoko ma kind judongo mir Israel gilund gibino i bang’a, man gibedo i wang’a.

²Man lembe pa Yehova bino i bang’a, m’uwacu kumae,

³Wod dhanu, dhanu maeni giketho mungu m’araga migi i adundegi, man giketho ginmaredhojo mi kier migi i wang’gi: maku gipenj lembe moko i bang’a?

⁴Ka kumeno yer igi, man iwac igi kumae, Rwoth Yehova wacu kumae: Ku ba dhanu ku ba dhanu mi ot mir Israel m’uketho mungu m’araga pare i adundene, man m’uketho ginmaredhojo mi kier pare i nyim wang’e, man m’ubino ba jabila; an a Yehova abiloko lembe ire i ie calkud udul mungu m’araga pare;

⁵kara agara ot mir Israel i adundegi gigi, kum kagi ceke gikoc kuda ni kum mungu m’araga migi.

⁶Ka kumeno wac ni ot mir Israel kumae, Rwoth Yehova wacu kumae: Wudwogi, man wulokru giwu ku ba mungu m’araga mu; man wulok weng’wu cen ku ba ginmajudagu mu ceke.

⁷Kum ku ba dhanu ku ba dhanu mi ot mir Israel, kadi mi juwirok m’ubedo ni umondo i Israel, m’ukoire gire kud i bang’a, man m’uketho mungu m’araga pare i adundene, man m’uketho ginmaredhojo mi kier pare i wang’e, man m’ubino ba jabila kara epenj pire gire i bang’a; an a Yehova abiloko ire lembe an gira:

⁸man abiketho wang’a kum ng’atu maeno, man abidwoke ni wang’uic, man ni giranyutha ku lembabola, man abikabe cen kud i kind dhanu para; e wubing’eyo nia an a Yehova.

⁹Man tek jubombo jabilane man eyero lembe, an a Yehova, abombo jabila maeno, man abirieyo cinga i kume, man abinyothe kud i kind dhanu para Israel.

¹⁰E gibiyeyo kier migi: e kier pa jabilane bibedo calu kier pa ng’atu m’uyenyo i bang’e;

¹¹kara ot mir Israel kud ukier kendo kud i bang’a, kadi ku gicidri gigi kendo ku gondri migi ceke; ento kara gibed dhanu para, man kara abed Mungu migi, Rwoth Yehova wacu.

¹²Man lembe pa Yehova bino i bang’a m’uwacu kumae,

¹³Wod dhanu, kinde ma ng’om udubo ira ku timo kier, man arieyo cinga i wie, man aturo jambjeng’ mi kwende, man aoro ndru i wie, man akabu dhanu ku lim i bang’e;

¹⁴kadok dhanu adek maeni, Noa ku Daniel, man Yob, gini i ie, gibibodho ng’eyong’ec migi gigi kende ku bedopwe migi, Rwoth Yehova wacu.

¹⁵Tek aketho yedi ma rac ukadh kud i ng’ombe, man ginyothe, man judwoke lic, ketho nia ng’atu moko kud ukadh ni kum yedine;

¹⁶kadok dhanu adek maeni gini i ie, calu abedo kwo, Rwoth Yehova wacu, gibibodho nyithindho ma co kadi nyithindho ma nyir de ngo; gibiboth gi kendgi, ento ng’ombe bibedo ni uvuru.

¹⁷Kadi tek akelo palamularu wi ng’ombe, man awacu kumae, Palamularu, kadh kud i ng’om; kara akab dhanu ku lim woko kud i bang’e;

¹⁸kadok dhanu maeni adek gini i ie, calu abedo kwo, Rwoth Yehova wacu, gibibodho kadok nyithindho ma co kadi nyithindho ma nyir de ngo, ento gibiboth gi kendgi.

¹⁹Kadi tek aoro thong’om i ng’om maeno, man akonjo kwinyo para i wie i rimo, kara akab dhanu ku lim kud i bang’e;

²⁰kadok Noa, ku Daniel, man Yob, gini i ie, calu abedo kwo, Rwoth Yehova wacu, gibibodho kadok nyathin ma nico kadok nyathin ma nyaku de ngo; gibibodho ng’eyong’ec migi gigi kende ku bedopwe migi.

²¹Kum Rwoth Yehova wacu kumae: Ma sagu dit kinde m’aoro pokolembe para ma rac ang’wen wi Yerusalem, en e palamularu, ku ndru, ku yedi ma rac, ku thong’om, kara ukab dhanu ku lim kud i bang’e mire!

²²Ento, nen, jubiweko donge dong’ i ie ma jubitero cen, en e nyithindho ma co ku nyithindho ma nyir bende: nen, gibibino i beng’wu, e wubineno yo migi ku giratima migi; man wubibedo ajuka kum lem ma rac m’akelo wi Yerusalem, en e pi gin ceke m’akelo i wie.

²³E gibijukowu, kinde ma wuneno yo migi ku giratima migi; man wubing’eyo nia atimo gin m’umbe lembe ngo gin ceke m’atimo i ie, Rwoth Yehova wacu.