Read Alur Ezekiel 16 Bible Online

Ezekiel 16 - Alur bible

Ezekiel 16

¹Lembe pa Yehova bino i bang’a kendo, m’uwacu kumae,

²Wod dhanu, keth Yerusalem ung’ei ginmajudagu pare;

³man iwac kumae, Rwoth Yehova wacu kumae ni Yerusalem; Thekri peri man nyol peri en e mi ng’om pa Jakanani; Jaamori en e wuru, man meru en e Nyahiti.

⁴Man pi nyol peri, i ceng’ ma junyoli i ie juthumo thol peri ngo, kadi julwoki i pi de ngo kara udwoki leng’; juketho kadu i kumi ki ngo, kadi juboi ku bongu de ki ngo.

⁵Ngisi nego wang’ moko ngo i kumi, kara jutim gin maeni moko i kumi, kara jutim ku ngisi i kumi; ento jubei woko i podho ma ngbeng’, kum jucayu kumi, i ceng’ ma junyoli i ie.

⁶Man kinde m’akadhu kud i ng’eti, man aneni mhbesendri i rimo peri, awacu iri kumae, Kadok ini i rimo peri, bed kwo; eyo, awacu iri kumae, Kadok ini i rimo peri, bed kwo.

⁷Aketho imedri calu gin m’utwi i podho, man inyai idoko dit de, man itundo kum giraruka ma ber hai; thunoni cungo, man yukwii wobo; ento ibedo muneru man mananu.

⁸Nie kinde m’akadhu kud i beng’i, man aneno kumi, nen nindo peri en e nindo mi mer; man apedho dhu kendi para i kumi, e aumo muneru peri: eyo, akwong’o iri, man amondo i lembariba kudi, Rwoth Yehova wacu, man idoko para.

⁹Alund ajomi ku pi; eyo, alwoko rimo peri cen kud i kumi mii, man awiri ku mo.

¹⁰Aronyi bende ku bongu m’aruka, man aroyo dend yedi m’i nam i tiendi, man atwii gbur ku bongu ma nwang’ ma ber, aumi de ku bongu mi thondh ukoko.

¹¹Man aruki ku jambruko, man aketho gwang’ i cingi, ku nyoro i ng’uti,

¹²Man aketho gwilo i umi, ku nzir i ithi, man jamkermiwic ma ber i wii.

¹³Kum kumeno juruki ku mola ma kwar ku mola ma tar; man kendi peri en e bongu ma nwang’ ma ber, ku bongu mi thondh ukoko, man bongu m’aruka; icamu mogo ma yom, ku kic, man mo; man kumi leng’ apila, man lembe peri bedo miero cil kum bedo mi ker.

¹⁴Man rwongi yik i kind thek kum leng’kumi; kum ebedo ndhu cu, ni kum dwong’ para m’aketho i wii, Rwoth Yehova wacu.

¹⁵Ento igeno leng’kumi, man itimo tarwang’ kum pak peri, man ikonjo asara peri wi dhanu ceke kubang’gi kubang’gi m’ukadhu akadha; en e pare.

¹⁶Man igamu kum kendi peri, man itimo iri ka ma malu ma juruko ku kit piny ma tung’ tung’, man itimo tarwang’ i kumgi: wadi gin maeni bibino ngo, kadok ebibedo kumeni de ngo.

¹⁷Igamu jambruko peri ma ber bende mi mola ma kwar para man mi mola ma tar para, m’amio iri, man itimo iri ayi gin m’acwia mi dhanu, man itimo tarwang’ kugi;

¹⁸man igamu kendi peri m’aruka, iumogi de, man iketho mo para kud udok ma ng’wice ng’ar para i wang’gi.

¹⁹Kwen para bende m’amio iri, en e mogo ma yom, ku mo, ku kic, m’akeki kudo, ikethe i wang’gi ni ng’wic piny ma ng’ar; e ebedo kumeno, Rwoth Yehova wacu.

²⁰Mange ke igamu woti ku nyigi, m’inyolo ira, man ilamu maeni igi ya jucam. Asara peri en e lembe ma noki,

²¹nia inego nyithindho para, man imiogi, ku ketho gikadh kud i mac i bang’gi?

²²Man i ginmajudagu peri ceke kud asara peri ipoi kum nindo mir aradu peri ngo, kinde m’ibedo muneru man mananu, man m’ibesendri i rimo peri.

²³Man etimbre yo ng’ei dubo peri ceke (can, can i wii! Rwoth Yehova wacu),

²⁴nia igomo iri ka m’utingre, man itimo iri ka ma wiu i gengi kubang’e kubang’e.

²⁵Iguro ka ma wiu peri i wi yo kubang’e kubang’e man idwoko leng’kumi ni ginmajudagu, man iyabu tiendi ni dhanu ceke kubang’gi kubang’gi ma gikadhu akadha, man imedo asara peri.

²⁶Itimo tarwang’ ku Jumisiri bende, ma gi judhugola peri, ma gi judongo mi kum; man imedo asara peri, kara unyai ng’ecwiny i ia.

²⁷Ka kumeno nen, arieyo cinga i wii, man ajwigo cemo peri ma thiri thiri, man amii ni yeny ma ju m’udegi yenyo, en e nyig Jufilisti, ma lewic unegogi kum yo peri ma rac.

²⁸Itimo asara bende ku Juascuri, kum icopo yeng’ ungo; eyo, itimo tarwang’ kugi, man fodi eromi ngo.

²⁹Man kendo imedo asara peri cil kum ng’om mi kuloka, ba Kaldayo; ento fodi cwinyi kwio kudo ngo.

³⁰Adundeni ng’ic mire, Rwoth Yehova wacu, kum itimo gin maeni ceke, en e tic pa won asara ma rieko mbe kude;

³¹kum igomo ka m’utingre peri i wi yo kubang’e kubang’e, man itimo ka ma wiu peri i gengi kubang’e kubang’e, man ibedo calu won asara ngo, kum icayu sukulia.

³²Dhaku ma dubre swa mire! ma gamu juwirok ka cware mire!

³³Gimio giramia ni weg tarwang’ ceke ento imio giramia peri ni jumerni ceke, man imio jamblembe igi, kara gibin i beng’i i ng’eti kun ku kun mir asara peri.

³⁴Man i tung’ ku mon mange ni asara peri, kum ng’atu moko mbe m’ulubi kara utim tarwang’; man kum imio sukulia, e sukulia moko mbe m’umire iri, ka kumeno i tung’.

³⁵Kum kumeno, E won asara, winj lembe pa Yehova:

³⁶Rwoth Yehova wacu kumae, Kum cilo peri konjre woko, man muneru peri bedo ayafca ni kum asara peri ku jumer peri; man kum mungu m’araga peri ceke mi ginmajudagu peri, man kum rimo mi nyithindho peri, m’imio igi;

³⁷ka kumeno nen, abicoko jumerni ceke, m’itimo anyong’a wukugi, ku dhanu ceke m’imaru, karacelo ku dhanu ceke m’idagu; abicokogi i kumi kun ku kun, man abiyabu muneru peri igi, kara ginen muneru peri ceke.

³⁸Man abipoko lembe i wii, calu jupoko lembe wi mon m’ukadhu ku wi lembe mi gambri man m’ucwiro rimo; man abikelo rimo mi kwinyo ku nyeko i wii.

³⁹Abimii bende i cing’gi, e gibirwombo ka m’utingre peri piny, man gibirwombo ka ma wiu peri piny; man gibiwanyu kendi peri, man gibigamu jambruko peri ma ber de; e gibiweki muneru man mananu.

⁴⁰Gibikelo njuru dhanu bende i wii, man gibicenyi ku kidi, gibicobi plu de ku palamularu migi.

⁴¹Man gibiwang’u udi peri ku mac, gibitimo lembapoka i wii de i wang’ mon dupa; man abiketho iweko timo tarwang’, man sukulia bende ibimio kendo ngo.

⁴²Kum kumeno abiketho kwinyo para ma yor i beng’i yom, man nyeko para biai kud i beng’i, man abibedo yo, e ng’ecwiny binega kendo ngo.

⁴³Kum ipoi ungo kum nindo mir aradu peri, ento ikethri i kuma kum gin maeni ceke; ka kumeno, nen, an bende abikelo yo peri i wii, Rwoth Yehova wacu: man ibitimo lem ma rac maeni ku ginmajudagu peri ceke ngo.

⁴⁴Nen, ku ba dhanu ku ba dhanu m’ubolo lembabola gibibolo lembabola maeni i kumi, gibiwacu kumae, Calu min ubedo, e nyare bedo kumeca.

⁴⁵In i nyar meru, m’udagu cware ku nyithindhe; in i nyamin nyimeru, m’udagu coggi ku nyithindhgi: meru en e Nyahiti, man wuru en e Jaamori.

⁴⁶Man nyameru ma jadit en e Samaria, m’ubedo yo ku cingi ma yor acam, en ku nyige; man nyameru ma nok, m’ubedo yo ku cingi ma yor acwic, en e Sodom ku nyige.

⁴⁷Ento iwotho i yo migi ngo, kadi itimo tok ginmajudagu migi de ngo; ento, calu tek maeno en e gin ma nyathigi, in inyothri ma sagu gin i yo peri ceke.

⁴⁸Calu abedo kwo, Rwoth Yehova wacu, Sodom ma nyameru timo ngo, en kadi nyige, calu itimo, in ku nyeri.

⁴⁹Nen, maeni kier pa nyameru ma Sodom: kuhaya, man dhir mi kwen, ku bedoyo mi mierolembe ni i ie man i nyige; kadok mio tego ni cing’ jacan kadi jacanpiny de emio ngo.

⁵⁰Man gitingri, man gitimo ginmajudagu i wang’a: ka kumeno akabugi cen calu aneno ber.

⁵¹Kadok Samaria de etimo ng’et dubo peri ngo; ento imedo ginmajudagu peri ma sagu joca, man ikabu lembe m’i wi nyimeru ku ginmajudagu peri ceke m’itimo.

⁵²In bende, yei lewic peri ma dhe, kum imio lembapoka ni nyimeru, ni kum dubo peri m’itimo ma judagu hai ma sagugi, gi pwe ma sagu in: eyo, dong’ cwinyi bende ng’abre, man iyei lewic peri, kum igonyo lembe ma wi nyimeru.

⁵³Man abiloko ng’eca migi kendo, ng’eca mi Sodom ku nyige, man ng’eca mi Samaria ku nyige, man ng’eca mi ng’eca peri i kindgi;

⁵⁴kara iyei lewic peri ma dhe, man kara lewic unegi kum gin ceke m’itimo, kum in i jajuk igi.

⁵⁵Man nyimeru, Sodom ku nyige, gibidwogo ba bedo migi ma kwong’a; man Samaria ku nyige bidwogo ku nyige ba bedo migi ma kwong’a; man in ku nyigi wubidwogo ba bedo mu ma kwong’a.

⁵⁶Kum dhogi yero pi nyameru ma Sodom ungo i ceng’ mi kuhaya peri,

⁵⁷ma fodi dubo peri kuyabre ngo, calu i nindo mi cac mi nyig Cami, man mi ju m’utieke gbur, nyig Jufilisti, ma gisendi kun ku kun.

⁵⁸Iyeyo tarwang’ peri man ginmajudagu peri, Yehova wacu.

⁵⁹Kum Rwoth Yehova wacu kumae: An bende abitimo i kumi calu itimo, m’icayu kwong’ ku turo lembariba.

⁶⁰Ento abipoi kum lembariba para ma kudi i nindo mir aradu peri, man abiketho lembariba mi nja cungo iri.

⁶¹E ibilund poi kum yo peri, man lewic binegi, kinde m’ibijolo nyimeru, nyimeru ma dongo man nyimeru ma thindho; man abimiogi iri ni nyir, ento ku lembariba peri ngo.

⁶²Man abiketho lembariba para ma kudi cungo; man ibing’eyo nia an a Yehova;

⁶³kara ipoi, man cwinyi ng’abre, man kara kud iyab dhogi kendo ki, kum lewic peri, kinde m’aweko iri gin ceke m’itimo, Rwoth Yehova wacu.