Read Alur Ezekiel 17 Bible Online

Ezekiel 17 - Alur bible

Ezekiel 17

¹Man lembe pa Yehova bino i bang’a, m’uwacu kumae,

²Wod dhanu, bol koi, man iyer lembabola ni ot mir Israel;

³man iwac kumae, Rwoth Yehova wacu kumae: Acur ma dit ku bombe m’ulwar man bombe ma bor, yuke de dupa, ma kite tung’ tung’, ubino i Lebanon, man egamu lwith musonge:

⁴etong’o lwithe ma lep lep, man eterogi i ng’om mi kuloka; ekethe i adhura mi kuloka.

⁵Egamu kodhi m’i ng’ombe bende, man epidhe i ng’om ma cek hai; ekethe ng’et pi dupa; ekethe calu yend mbegu.

⁶Man edongo, man edoko ni ulok m’udinyo, ma jange lokre yor i bang’e, man ulage ni i there: kum kumeno edoko ni ulok, man ewodho jange, elodho lwithe de.

⁷Acur mange ma dit bende nuti ku bombe m’uhvar man yuke dupa: man, nen, ulok maeni gomo ulage yor i bang’e, man ewodho jange yor i bang’e, kud i ng’om mi there, kara ekwoi pi i wie.

⁸Jupidhe i ng’om ma ber dhu pi dupa, kara ewodh jange, man kara eceg nyinge, kara ebed ni ulok ma ber.

⁹Wac kumae, Rwoth Yehova wacu kumae: Ebibedo miero? ebifudho ulage ngo, man ebithumo nyinge ngo, kara eneri; kara ithe ma lep lep ceke m’ubeloth uneri? man jubifudhe kud ulage ni kum tego ma dit ungo kadi ni kum dhanu ma dupa de ngo.

¹⁰Eyo, nen, ma judaru pidhe, ebibedo miero? ebiner ceke ngo, kinde ma yamu ma yo nyangu mulo kume? ebiner i the ng’om i ka m’edongo i ie.

¹¹Mange ke lembe pa Yehova bino i bang’a, m’uwacu kumae,

¹²Wac kawono ni ot mi jai kumae, Wung’eyo thelembe mi gin maeni ngo? wac igi kumae, Nen, ubimo mi Babeli bino Yerusalem, man emaku ubimone, ku judongomawijone, man eterogi i bang’e i Babeli.

¹³Man egamu kum kodhi mi ker, e etimo lembariba kude; ekele the kwong’ bende, man ekabu ju ma tek m’i ng’ombe;

¹⁴kara kerne dok ng’ic, kara kud etingre gire malu, ento nia ku woro lembariba pare ecopo cungo.

¹⁵Ento ejai ire ku oro judhulembe pare i Misiri, kara gimi ire riuni man dhanu dupa. Lembe pare bibedo miero? ng’atu m’utimo wadi ginduni bibothi? ebituro lembariba, man ebiboth asu?

¹⁶Calu abedo kwo, Rwoth Yehova wacu, andha i ka m’ubimo bedo i ie m’udwoke ni ubimo, m’ecayu kwong’ pare, man m’eturo lembariba pare, ebitho karacelo kude i kind Babeli.

¹⁷Kadok Farao ku njuru asikari pare ma dit kud udul pare ma dit bikonye ngo i lwiny, kinde ma gidhuro ng’om man gigomo ot ma tek, kara ging’ol dhanu dupa woko.

¹⁸Kum ecayu kwong’ ku turo lembariba; man nen, edaru mio cinge, ento de etimo! gin maeni ceke; ebiboth ungo.

¹⁹Ka kumeno Rwoth Yehova wacu kumae: Calu abedo kwo, andha kwong’ para m’ecayu, man lembariba para m’eturo, abikele cil i wie gire,

²⁰Man abipedho voi para i wie, man jubimake i uwic para, man abikele i Babeli, abimondo i pokolembe de kude kuca kum dubolembe pare m’edubo ira.

²¹Man jung’wec pare ceke i udul pare ceke bipodho ku palamularu, man donge m’udong’ jubiketho yo ba yamu kun ku kun: e wubing’eyo nia an, an a Yehova, ayero maeni.

²²Rwoth Yehova wacu kumae: Abigamu kum lwith musonge ma wiu bende, man abipidhe; abicodo landu withe, man abipidhe wi got ma wiu m’utingre:

²³abipidhe wi got m’utingre mir Israel; man ebilodho jange, ebicego nyinge de, man ebibedo ni musonge ma ber: man winyo ceke mi bomb ma tung’ tung’ bibedo i there; man gibibedo i tipo mi jange.

²⁴Man yedhi ceke mi podho bing’eyo nia an, an a Yehova, ajwigo yen ma wiu, adodo yen m’adundo, atalu yen ma numu, man adwoko yen m’utal lep lep: an a Yehova, ayero man atimo maeni.