Read Alur Ezekiel 18 Bible Online

Ezekiel 18 - Alur bible

Ezekiel 18

¹Lembe pa Yehova bino i bang’a kendo, m’uwacu kumae,

²Wuwacu ang’o, ma nia wutim lembabola maeni pi ng’om mir Israel, ma wuwac ko kumae, Wego camu nyingulok ma wac, man lak nyithindho tho nding’i?

³Calu abedo kwo, Rwoth Yehova wacu, lembe bibedo umbe kendo ma biketho wutimo lembabola maeni i Israel.

⁴Nen, ng’eyong’ec ceke gi para, calu ng’eyong’ec pa wego, e ng’eyong’ec mi wodo bende e para: ng’eyong’ec m’udubo, ebitho.

⁵Ento tek dhanu bedopwe, man etimo gin ma cik uyio man m’atira de,

⁶man ecamu ngo wi gudi, kadi eting’o wang’e malu ba mungu m’araga mi ot mir Israel de ngo, kadi ecido dhaku pa wadi de ngo, kadi ecoro ceng’ni dhaku de ngo i koiri pare,

⁷man etimo rac kum ng’atu moko ngo, ento edwoko mukwatu pare ba jabanja, man egamu gin moko ngo ku kuvuga, emio kwen pare de ba ng’atu ma kec unege, man eumo jamuneru ku kendi;

⁸man e ng’atu ma mio kuloka mir azindi ngo, kadi ma gamu nyai moko ngo, ma dolo cinge ku ba kier, m’etimo lembapoka mandha i kind dhanu ku dhanu,

⁹m’ewotho i cik para, man m’eworo lembapoka para, ya etim mandha; en e pwe, ebibedo kwo andha, Rwoth Yehova wacu.

¹⁰Tek enyolo nyathin ma nico ma en e won ayeki, m’e jacwir rimo, man m’etimo kind gin maeni acel,

¹¹man m’etimo gin maeni moko ngo ma maku jutim, ento ecamu wi gudi, man ecido dhaku pa wadi,

¹²man etimo rac kum jacan ku jacanpiny, egamu de ku kuvuga, man edwoko mukwatu de ngo, man eting’o wang’e malu ba mungu m’araga, etimo ginmajudagu,

¹³emio piny mir azindi de, man egamu nyai; ebilund bedo kwo? ebibedo kwo ngo: etimo ginmajudagu maeni ceke; ebitho andha; rimo pare bibedo i wie.

¹⁴Nie, nen, tek enyolo wode, m’uneno dubo pa won ceke m’etimo, man elworo, man etimo wadi ma kumeno ngo;

¹⁵m’ecamu ngo wi gudi, kadi eting’o wang’e de ngo malu ba mungu m’araga mi ot mir Israel, m’ecido dhaku pa wadi de ngo,

¹⁶kadi etimo rac ba ng’atu moko de ngo, m’egamu gin moko de ngo ni mukwatu, kadi egamu ku kuvuga de ngo, ento emio kwen pare ni ng’atu ma kec unege, man eumo jamuneru ku kendi;

¹⁷m’edolo cinge ku ba jacan, m’ejolo azindi kadi nyai de ngo, m’etimo lembapoka para, m’ewotho i cik para; ebitho ngo pi kier pa won, ebikwo andha.

¹⁸Pi won mire, kum esendo ma kisa mbe, evugo umin mire, man etimo gin m’ubedo ber ungo i kind juthugi, nen, ebitho i kier pare.

¹⁹Ento wuwacu kumae, Pirang’o wod uyeyo kier pa won ungo? Kinde ma wod utimo gin ma cik uyio m’atira de, man eworo cik para ceke, m’etimogi de, ebikwo andha.

²⁰Ng’eyong’ec m’udubo, ebitho; wod biyeyo kier pa won ungo, kadi wego de biyeyo kier pa wodo ngo; bedopwe pa won bedopwe bibedo i wie, man dubo pa jadubo bibedo i wie.

²¹Ento tek jadubo weko dubo pare ceke m’etimo, man eworo cik para ceke, man etimo gin ma cik uyio m’atira de, ebikwo andha, ebitho ngo.

²²Jubipoi ungo pire kum dubo pare moko m’etimo: i bedopwe pare m’etimo ebibedo kwo.

²³Anyong’a nega kum tho pa jadubo? Rwoth Yehova wacu; man esagu ngo ya edwog kud i yo pare, man ebed kwo?

²⁴Ento kinde ma ng’atu ma pwe lokre cen kud i bedopwe pare, man etimo kier, etimo calku ginmajudagu ceke ma jadubo timo, ebibedo kwo? Jubipoi ungo pi tic pare ma pwe moko m’etimo: i kier pare m’ekier, man i dubo pare m’edubo, ebitho i igi.

²⁵Ento wuwacu kumae, Yo pa Rwoth en e atira ngo. Wuwinj kawono, E ot mir Israel: Yo para atira ngo? yo mu e m’atira ngo ngo?

²⁶Kinde ma ng’atu ma pwe lokre cen kud i bedopwe pare, man etimo kier, e etho i ie; ebitho i kier pare m’etimo.

²⁷Kendo, kinde ma jadubo lokre cen kud i dubo pare m’etimo, man etimo gin ma cik uyio man m’atira, ebibodho ng’eyong’ec pare ma kwo.

²⁸Kum ie pido, man elokre cen ni dubo pare m’edubo ceke, ebibedo kwo andha, ebitho ngo.

²⁹Ento ot mir Israel uwacu kumae, Yo pa Rwoth en e atira ngo. E ot mir Israel, Yo para atira ngo? yo mu e m’atira ngo ngo?

³⁰Ka kumeno abipoko lembe i wiwu, E ot mir Israel, ku ba dhanu ku ba dhanu ng’atuman calku yo pare, Rwoth Yehova wacu. Wudwogi, man wulokru giwu ni dubo mu ceke; kara kier kud ubed ni nyoth mu.

³¹Wubai dubo mu ceke cen kud i kumwu, ma wudubo i ie; man wutim adunde ma nyen iwu ku tipo ma nyen: kum wubitho nedi, E ot mir Israel?

³²Kum anyong’a nega ngo kum tho pa ng’atu m’utho, Rwoth Yehova wacu: kum kumeno wulokru giwu, man wubed kwo.