Read Alur Ezekiel 20 Bible Online

Ezekiel 20 - Alur bible

Ezekiel 20

¹Man etimbre i rundi mir abirone, i dwi mir abije, i ceng’ mir apaje mi dwije, nia judongo moko mir Israel gibino penjo lembe ba Yehova, man gibedo i wang’a.

²E lembe pa Yehova bino i bang’a, m’uwacu kumae,

³Wod dhanu, yer ni judongo mir Israel, man iwac igi kumae, Rwoth Yehova wacu kumae: Wubino kara wupenj i bang’a? Calu abedo kwo, Rwoth Yehova wacu, ayio ngo wupenj i bang’a.

⁴Ibipoko lembe migi, wod dhanu, ibipoko lembe migi? Keth ging’ei ginmajudagu mi kwarugi;

⁵man iwac igi kumae, Rwoth Yehova wacu kumae: I nindo m’agoyo ie wi Israel, man akwong’o ni kodhi mi ot pa Yakobo, man ang’eira igi i ng’om Misiri, kinde m’akwong’o igi, m’awacu kumae, An a Yehova Mungu mu;

⁶i nindo maeca akwong’o igi, ya akelgi woko kud i ng’om Misiri i ng’om m’ayenyo igi, ma molo cak man kic, ma en e dwong’ mi ng’om ceke.

⁷E awacu igi kumae, Kubeng’wu kubeng’wu ng’atuman ubai ginmajudagu kud i wang’e, man kud wucidru giwu ku mungu m’araga mi Misiri; an a Yehova Mungu mu.

⁸Ento gijai ira, man giyio ngo giwinj dwanda; ku ba dhanu ku ba dhanu ng’atuman ubayu ginmajudagu mi wang’e ngo, kadi giweko mungu m’araga mi Misiri de ngo. Alund awacu nia abikonjo kwinyo para i wigi, kara udar ng’ecwiny para i kumgi i die ng’om mi Misiri.

⁹Ento atimo pi nyinga, kara kud ecidre i wang’ thek, ma gini i kindgi, m’ang’eira igi i wang’gi, kukelogi woko kud i ng’om Misiri.

¹⁰Kum kumeno aketho giwok woko kud i ng’om Misiri, man aterogi i langa.

¹¹Man amio igi cik para, anyutho igi lembapoka para de, ma tek dhanu timo, ebibedo kwo ni kumgi.

¹²Mange ke amio ceng’ sabatu para bende igi, kara ubed ni giranyutha i kindwa wakugi, kara ging’ei nia an a Yehova m’udwokogi leng’.

¹³Ento ot mir Israel ujai ira i langa: giwotho i cik para ngo, man gikwero lembapoka para, ma tek dhanu woro, ebibedo kwo ni kumgi; man gicido ceng’ sabatu para dit. Alund awacu nia abikonjo kwinyo para i wigi i langa, kara adargi.

¹⁴Ento atimo pi nyinga, kara kud ecidre i wang’ thek, m’awodhogi woko i wang’gi.

¹⁵Mange ke akwong’o igi i langa bende, nia abikelogi i ng’om m’amio igi ngo, ma molo cak ku kic, ma en e dwong’ mi ng’om ceke;

¹⁶kum gikwero lembapoka para, man giwotho i cik para ngo, gicido ceng’ sabatu para de: kum adundegi lubo tok mungu m’araga migi.

¹⁷Ento wang’a wekogi, man anyothogi ngo, kadi ajigogi i langa ma gwei ngo.

¹⁸Man awacu ni nyithindho migi i langa kumae, Kud wuwoth i cik mi kwaruwu, kadi kud wutim lembapoka migi, kadi kud wucidru giwu ku mungu m’araga migi.

¹⁹An a Yehova Mungu mu: wuwoth i cik para, man wuwor lembapoka para, wutimgi de;

²⁰man wudwok ceng’ sabatu para leng’; e gibibedo ni giranyutha i kindwa wakudu, kara wung’ei nia an a Yehova Mungu mu.

²¹Ento nyithindho gijai ira; giwotho ngo i cik para, kadi giworo lembapoka para de ngo ya gitimgi, ma tek dhanu timo, ebikwo ni kumgi; gicido ceng’ sabatu para. Alund awacu nia abikonjo kwinyo para i wigi, kara adar ng’ecwiny para m’i kumgi i langa.

²²Ento adolo cinga, man atimo pi nyinga, kara kud ecidre i wang’ thek, m’awodhogi woko i wang’gi.

²³Mange ke akwong’o igi i langa, nia abilalugi i kind thek, man abikethogi i kind ng’om;

²⁴kum gitimo lembapoka para ngo, ento gikwero cik para, man gicido ceng’ sabatu para, man wang’gi lubo tok mungu m’araga pa kwarugi.

²⁵Mange ke amio igi cik bende ma ber ungo, man lembapoka ma maku ku gibed kwo i ie;

²⁶man acidogi i giramia migi gigi, kum giketho dhanu ceke m’uyabu ic ukadh kud i mac, kara adwokgi ni uvuru, kara ging’ei nia an a Yehova.

²⁷Ka kumeno, wod dhanu, yer ni ot mir Israel, man iwac igi kumae, Rwoth Yehova wacu kumae: Ni kum maeni bende kwaruwu cida, kum gitimo kier ira.

²⁸Kum kinde m’akelogi i ng’om, m’akwong’o Ya ami igi, gilund gineno ungulu gudi ma wiu kubang’e kubang’e, man yen m’udinyo kubang’e kubang’e, e githiero lam migi keca, man githiero nyayung’ecwiny mi lam migi keca; e gitimo ng’wic piny migi ma ng’ar bende keca, man gikonjo lam m’amadha migi bende keca.

²⁹Alund awacu igi kumae, Thelembe mi ka ma malu ma wucidho i bang’e en e ang’o? Kum kumeni julwong’o nyinge Bama cil i ceng’ ma tin.

³⁰Kum kumeni wac ni ot mir Israel kumae, Rwoth Yehova wacu kumae: Wucidru giwu tok kura mi kwaruwu? man wutimo asara tok ginmajudagu migi?

³¹man kinde ma wuthiero girathiera mu, kinde ma wuketho wotwu kadh kud i mac, wucidru giwu ku mungu m’araga mu ceke cil i ceng’ ma tini? man wubipenjo i bang’a, E ot mir Israeli? Calu abedo kwo, Rwoth Yehova wacu, wubikwayu i bang’a ngo;

³²man gin m’ubino i pidoiwu bitimbre ki ngo, ma nia wuwacu kumae, Wabibedo calu thek calu wat m’i ng’om, kara watim ni yen man kidi.

³³Calu abedo kwo, Rwoth Yehova wacu, andha ku cing’ ma tek, man ku bot m’arieya, man ku kwinyo ma jukonjo, abibedo ni ubimo i wiwu.

³⁴Man abiwodhowu woko ku ba kodhidhanu, man abicokowu kud i ng’om ma wulal i ie, ku cing’ ma tek, man ku bot m’arieya, man ku kwinyo ma jukonjo,

³⁵man abikekwu i langa mi kodhidhanu, e abimondo i pokolembe kudu wang’ ku wang’ keca.

³⁶Calu amondo i pokolembe ku kwaru mu i langa m’i ng’om mi Misiri, e abimondo i pokolembe kudu kumeca, Rwoth Yehova wacu.

³⁷Man abiketho wukadhu the dul, man abikelowu i twic mi lembariba;

³⁸man abihvoko ju ma jai kud i kindwu, ku ju m’udubo ira; abiwodhogi woko kud i ng’om ma gibedo i ie, ento gibimondo i ng’om mir Israel ungo: e wubing’eyo nia an a Yehova.

³⁹Piwu, E ot mir Israel, Rwoth Yehova wacu kumae; Wucidhi, wutim kubeng’wu kubeng’wu ng’atuman ni mungu m’araga pare, man yo ku ng’ei maeni bende, tek wubiwinjo dwanda ngo; ento kud wucid nyinga ma leng’ kendo ku giramia mu, man ku mungu m’araga mu.

⁴⁰Kum i got para ma leng’, i got mi tingri mir Israel, Rwoth Yehova wacu, ot mir Israel ceke, kagi ceke, gibitimo ira keca i ng’ombuca: abijologi keca, man abilwong’o lam mu keca, man mwoka mi girathiera mu, ku gin ma leng’ mu ceke.

⁴¹Abijolowu calu ng’wic piny ma ng’ar, kinde m’akelowu kud i kind kodhidhanu, man acokowu kud i ng’om ma julaluwu i ie; e jubidwoka leng’ i iwu i wang’ thek.

⁴²E wubing’eyo nia an a Yehova, kinde m’akelowu i ng’om mir Israel, i ng’om m’akwong’o ya ami ni kwaruwu.

⁴³E wubipoi kum yo mu keca, ku giratima mu ceke, ma wucidru giwu i ie; man wubidegru i weng’wu giwu kum dubo mu ceke ma wudubo.

⁴⁴E wubing’eyo nia an a Yehova, kinde m’atimo kudu pi nyinga, calku yo mu ma rac ungo, kadi calku giratima mu ma rac de ngo, E wu ot mir Israel, Rwoth Yehova wacu.

⁴⁵Lembe pa Yehova de bino i bang’a, m’uwacu kumae,

⁴⁶Wod dhanu, keth weng’i yor ariwa ma piny, man iton lembe yor ariwa ma piny, man ieu lembe kum luli m’i thim i yor ariwa ma piny:

⁴⁷man iyer ni luli ma yor ariwa ma piny kumae, Winj lembe pa Yehova: Rwoth Yehova wacu kumae, Nen, abicwinyo mac i ii, man ebiwang’u yen m’uluk ii kubang’e kubang’e, ku yen m’uthwo kubang’e kubang’e: lebmac m’ubogre binegre ngo man wang’ ceke ugambre yor ariwa ma piny cil kum yor ariwa ma malu biwang’ kudo.

⁴⁸Man weg kum ceke bineno nia an, an a Yehova, acwinyo maeni; ebinegre ngo.

⁴⁹Alund awacu kumae, A Rwoth Yehova! giwacu pira kumae, En e jayer lembabola ngo?