Read Alur Ezekiel 22 Bible Online

Ezekiel 22 - Alur bible

Ezekiel 22

¹Mange ke lembe pa Yehova bino i bang’a, m’uwacu kumae,

²Man in, wod dhanu, ibipoko lembe, ibipoko lembe wi adhura mi rimo? ka kumeno keth eng’ei ginmajudagu pare ceke.

³Man iwac kumae, Rwoth Yehova wacu kumae: Adhura ma cwiro rimo i kinde, kara nindo pare bin, man ma timo mungu m’araga i kume gire kara ucide mire!

⁴Idoko ma lembe ni i wii ni kum rimo m’icwiro, man icido ni kum mungu m’araga peri m’itimo; man iketho ceng’ peri ucoro ceng’ni man itundo cil kum rundi peri: ka kumeno adwoki ni cac ni thek, man ni lele ni ng’om ceke.

⁵Ju ma ni ceng’ni, man ju ma gini bor kudi, gibisasu lele i kumi, in i ng’atu m’ucido m’upong’ ku yakni.

⁶Nen, judongomawijo mir Israel, kubang’gi kubang’gi ng’atuman calku tego pare, ubedo ii kara ucwir rimo.

⁷Gicayu weggi ku meggi ii; giyenyo umondo ku rop i kindi; man gitimo kic ku dhaku ma cware tho rac i kindi.

⁸Icayu gin ma leng’ para, man icido ceng’ sabatu para.

⁹Dhanu ma juyernying’ ubedo ii mi cwiro rimo; man gicamu wi gudi ii: gitimo tarwang’ i kindi.

¹⁰Giyabu muneru pa weggi ii; gijwigo dhaku m’ucido i koiri pare.

¹¹Man ng’atu acel utimo ginmajudagu ku dhaku pa wadi; man ng’atu mange cido ci wode ku tarwang’; man ng’atu mange, jwigo nyamin mire, ma nya won ii.

¹²Gigamu jamblembe mi cwiro rimo ii; igamu kuloka ku nyai, man igamu kuloka ba wedu ma kisa mbe, man wii wil pira, Rwoth Yehova wacu.

¹³Ka kumeno, nen, agoyo cinga kum kuloka peri mi gondri m’ilimo, man kum rimo m’ubedo i kindi.

¹⁴Adundeni copo ciro, kadi cingi copo bedo tek, i nindo m’abitimo i kumi? An a Yehova, ayero maeni, man abitime.

¹⁵Man abileli kind thek, man abikethi i ng’om mba mba; man abijigo cilo peri kud ii.

¹⁶Man ibicidri ni kumi giri, i wang’ thek; man ibing’eyo nia an a Yehova.

¹⁷Man lembe pa Yehova bino i bang’a, m’uwacu kumae,

¹⁸Wod dhanu, ot mir Israel udoko ni usau mola ira: kagi ceke gi mola ku lunjanja ku nyunyu man risasi, i dier uka; gin usau mola mi mola ma tar.

¹⁹Ka kumeno Rwoth Yehova wacu kumae: Kum kewu ceke wudoko ni usau mola, ka kumeno, nen, abicokowu i die Yerusalem.

²⁰Calu gicoko mola ma tar ku mola man nyunyu ku risasi man lunjanja i dier uka, kara uvuk mac i wie, kara ulenye; e abicokowu i ng’ecwiny para man i kwinyo para kumeca, e abikethowu keca, man abilenyowu.

²¹Eyo, abicokowu, man abivuko wiwu ku mac mi kwinyo para, man wubilenyi diere.

²²Calu mola ma tar lenyi dier uka, e wubileny kumeca i diere; e wubing’eyo nia an a Yehova akonjo kwinyo para i wiwu.

²³E lembe pa Yehova bino i bang’a m’uwacu kumae,

²⁴Wod dhanu, wac ire kumae, in i ng’om ma fodi judwoki leng’ ungo, kadi koth de cwi i wii ngo i ceng’ mi ng’ecwiny.

²⁵Jubilane giripo lembe mi rop i kinde, calu umvor m’uberundo m’eyeco ko yec: gicamu ng’eyong’ec; gimaku piny m’akana ku gin ma pire tek; giketho mon ma coggi tho doko dupa i kinde,

²⁶Julamne gitimo rop kum cik para, man gicido gin ma leng’ para: giketho gin ma leng’ ubedo tung’ ungo ku gin ma sai, kadi giketho dhanu de ya ung’i kind gin m’ucido ku gin ma leng’ de ngo, man gipanu wang’gi ni ceng’ sabatu para, man acidra i kindgi.

²⁷Judongomawijone gi calu urudi m’ubeyeco yec i kinde, mi cwiro rimo, man mi nyotho ng’eyong’ec; kara ginwang’ kuloka mi gondri.

²⁸Man jubilane gifuyo pigi kud uza, ma gineno ko ginmawokiwang’ mi ndra, ku ewo girang’eya mi ndra igi, ma giwacu ko kumae, Rwoth Yehova wacu kumae, ma Yehova ke kuwacu ngo.

²⁹Dhanu m’i ng’om gitimo rop, man gitimo ayeki; eyo, gisendo jacan ku jacanpiny, man gitimo umondo rac ma lembe mbe.

³⁰Man ayenyo dhanu i kindgi, ma bigomo gang’kidi, ma bicungo i ka m’urwombre de i wang’a pi ng’ombe, kara kud anyothe; ento anwang’u moko ngo.

³¹Ka kumeno akonjo ng’ecwiny para i wigi; ajigo wigi ku mac mi kwinyo para: akelo yo migi gigi i wigi, Rwoth Yehova wacu.