Read Alur Ezekiel 23 Bible Online

Ezekiel 23 - Alur bible

Ezekiel 23

¹Lembe pa Yehova bino kendo i bang’a, m’uwacu kumae,

²Wod dhanu, mon ario nuti, gi nyir pa dhaku acel:

³man gitimo tarwang’ i Misiri; gitimo tarwang’ i aradu migi; judio thunogi kuca, e jumulo thunogi mi sumba migi kuca.

⁴Man nying’gi en e Ohola ma jadit, man Oholiba ma nyamin mire: e gidoko para, man ginyolo nyithindho ma co ku nyithindho ma nyir. Man pi nying’gi, Samaria en e Ohola, man Yerusalem en e Oholiba.

⁵Man Ohola timo tarwang’ kinde m’e para; man eketho cwinye kum jumer pare, kum Juascuri ma judhugola pare,

⁶ma gironjri ku kendi m’ulweku, jego ku jubim, kagi ceke gin awobi ma jufoyo, gi weg riuni m’ubewotho ku wi riuni.

⁷Man epoko asara pare i kumgi, gi dhanu ma jufoyo mir Ascur kagi ceke; man ng’atu ma tek eketho cwinye i kume, e ecidre gire ku mungu m’araga migi ceke.

⁸Kadi eweko asara pare ngo ugambre i nindo mi Misiri; kum i aradu pare givuto kude, man gimulo thunone mi sumba pare; man gikonjo asara migi i kume.

⁹Kum kumeno amie i cing’ jumer pare, i cing’ Juascuri, m’eketho cwinye i kumgi.

¹⁰Maeni giyabu muneru pare; gigamu nyithindho pare ma co, ku nyithindho pare ma nyir; man ginege ku palamularu; man edoko ni koi i kind mon; kum gitimo lembapoka i wie.

¹¹Man nyamin mire ma Oholiba neno maeni, ento enyothre i ketho cwinye ma sagu en, man i asara pare ma sagu asara pa nyamin mire.

¹²Eketho cwinye kum Juascuri, gi jego ku jubim, ma gi judhugola pare, ma gironvo kendi ma ber hai, gi weg riuni ma gibewotho wi riuni, kagi ceke gin awobi ma jumaru.

¹³E aneno nia ecido; gin ario gikwanyu yo acel.

¹⁴E enyayu asara pare; kum eneno dhanu m’akiewa wi gang’kidi, ayi Jukaldayo ma jukiewo ku kitpinv ma kwar,

¹⁵ma gibedo atwia ku thondhpier i piergi, man giratwia m’i wic jwee ni i wigi, kagi ceke gi judongomawijo mir anena, calu ayi Jubabeli i Kaldayo, ma ng’om ma junyologi i ie.

¹⁶Man kinde m’enenogi eketho cwinye i kumgi, man eoro jukwenda i bang’gi i Kaldayo.

¹⁷Man Jubabeli gibino i bang’e i kavuto mi mer, e gicide kud asara migi, man ecidre kugi, man ng’eyong’ec pare koc kugi.

¹⁸Kum kumeno eyabu asara pare, man eyabu muneru pare: e ng’eyong’ec para lund ukoc kude, calu ng’eyong’ec para koc ku nyamin mire.

¹⁹Ento emedo asara pare, m’epoi ko pi nindo mir aradu pare, m etimo ie tarwang’ i ng’om Misiri.

²⁰Man eketho cwinye kum jumer migi, ma ring’kumgi calu ring’kum kana, man gin ma wok migi calu gin ma wok mi riuni.

²¹Ipoi kum asara mir aradu peri kumeni, ku mulo thunoni ma Jumisiri mulo kum thuno mir aradu peri.

²²Ka kumeno, E Oholiba, Rwoth Yehova wacu kumae: Nen, abiting’o jumer peri i kumi, ma ng’eyong’ec peri koc kugi, man abikelogi i kumi kun ku kun:

²³Jubabeli man Jukaldayo ceke, Pekod man Coa man Koa, ku Juascuri, ceke gi kugi gin awobi ma jumaru, jego ku jubim kagi ceke, gi judongomawijo man gi dhanu ma pigi yik, kagi ceke gi dhanu ma giwotho ku wi riuni.

²⁴Man gibibino i kumi ku jambali, man magali, kud ukobre, man ku njuru kodhidhanu; man gibitheri gigi i kumi gbur ku thungu man ban ku jamgwok m’i wie: man abimio pokolembe igi e gibipoko lembe peri calku jamgwok m’i wie: man abimio pokolembe igi, e gibipoko lembe peri calku lembapoka migi.

²⁵Man abiketho nyeko para i kumi, man gibitimo ku kwarcwinyi kumi; gibikabu umi ku ithi cen; man dongi m’udong’ bipodho ku palamularu: gibimaku woti ku nyigi; man dongi m’udong’ biwang’ ku mac.

²⁶Gibiwanyu kendi peri bende, man gibikabu jambruko peri ma ber.

²⁷Abiketho asara peri jik kumeni kud i kumi, man tarwang’ peri m’ibino ko kud i ng’om Misiri; ketho nia ibiting’o weng’i malu i bang’gi ngo, kadi ibipoi kum Misiri kendo ngo.

²⁸Kum Rwoth Yehova wacu kumae: Nen, abimii i cing’ ju m’idagu, i cing’ ju ma ng’eyong’ec peri koc kugi;

²⁹man gibitimo kudi kud adegi, man gibikabu piny ceke m’imuli i kume ku tic, man gibiweki muneru man ngbeng’; man jubiyabu muneru mir asara peri, tarwang’ peri kud asara peri.

³⁰Jubitimo gin maeni i kumi, kum itimo tarwang’ tok thek, man kum icidri ku mungu m’araga migi.

³¹Iwotho i yo pa nyameru; ka kumeno abimio kikombe pare i cingi.

³²Rwoth Yehova wacu kumae: Ibimadhu kum kikombe pa nyameru, ma en e thuth man lac; jubing’ieri hai man jubicei; ma sagu ma jucopo bedo ko.

³³Ibipong’ ku merkong’o man ku can, ku kikombe mi wang’uic ku nyoth, ku kikombe pa nyameru ma Samaria.

³⁴Ibimathe man ibicwiye kot, e ibinwayu thingene, man ibiyeco thunoni; kum ayero maeni, Rwoth Yehova wacu.

³⁵Ka kumeno Rwoth Yehova wacu kumae: Kum wii wil pira, man ibaya yor i ng’ei, ka kumeno yei tarwang’ peri bende kud asara peri.

³⁶Yehova wacu ira kendo kumae: Wod dhanu, ibipoko lembe wi Ohola kud Oholiba? ka kumeno yer igi ginmajudagu migi.

³⁷Kum gidubri swa, man rimo ni i cing’gi; man gidubri swa ku mungu m’araga migi; man giketho wotgi bende, ma ginyolo ira, ukadh kud i mac i bang’gi kara giwang’.

³⁸Mange ke gitimo maeni i bang’a: gicido kamaleng’ para, ceng’ nica, man gicido ceng’ sabatu para.

³⁹Kum kinde ma githumo nyithindhgi ni mungu m’araga migi, gilund gibino cing’ nica i kamaleng’ para kara ucide; man nen, gitimo kumeca i kind ot para.

⁴⁰Man ke wuoro kwenda ba dhanu m’uai bor, ma juoro jakwenda i bang’gi, man nen, gibino; m’ijom giri pigi, imwono weng’i de, man irukri giri ku jambruko,

⁴¹man ijany wi kavuto mi dwong’, ku mesa m’ubedo ayika i wang’e, m’iketho udok ma ng’wice ng’ar para ku mo para i wie.

⁴²Man dwand udul dhanu m’ubedo yo ni karacelo kude: man jukelo dhanu ma mer ku kong’o kud i langa karacelo ku dhanu ma sai; e giketho gwang’ wi cing’gi gin ario, ku jamkermiwic ma ber i wigi.

⁴³Alund awacu pi ng’atu m’ugamu dubre swa con kumae, Kawono gibitimo asara gi kude, man en de kugi.

⁴⁴E gimondo i bang’e, calu gimondo ba won asara: e gimondo bang’ Ohola man bang’ Oholiba de, ma gi mon ma weg tarwang’.

⁴⁵Man dhanu ma pwe, gibipoko lembe i wigi ku pokolembe mi mon ma dubri swa, man ku pokolembe mi mon m’ucwiro rimo; kum gi mon ma dubri swa, man rimo ni i cing’gi.

⁴⁶Kum Rwoth Yehova wacu kumae: Abikelo njuru dhanu i kumgi, man abimiogi kara juthorgi kun ku kun man juyakgi.

⁴⁷Man njuru dhanu bicanyugi ku kidi, man gibithumogi ku palamularu migi; gibinego wotgi ku nyiggi, man gibiwang’u udigi ku mac.

⁴⁸Abijigo tarwang’ kumeni kud i ng’om, kara juponj mon ceke ya ku gitim tok tarwang’ mu.

⁴⁹Man gibiculo tarwang’ mu i wiwu, man wubiyeyo dubo mi mungu m’araga mu; e wubing’eyo nia an a Rwoth Yehova.