Read Alur Ezekiel 24 Bible Online

Ezekiel 24 - Alur bible

Ezekiel 24

¹Kendo, i rundi mir abung’wende, i dwi mir apaje, i ceng’ mir apaje mi dwije, lembe pa Yehova bino i bang’a, m’uwacu kumae,

²Wod dhanu, kieu nying’ ceng’, en e ceng’ maeni nini: ubimo mi Babeli eoro ceng’ni ba Yerusalem i ceng’ maeni nini.

³Man iyer lembabola ba ot mi jai, man iwac igi kumae, Rwoth Yehova wacu kumae, Keth ajiku ma dit, kethe, man ikonj pi i ie bende:

⁴cok wadhe i ie, en e wath ma ber kubang’e kubang’e, bamb, ku gok: pong’e ku cogo ma jufoyo.

⁵Gam kum udul rombe ma jufoyo, man yen moko bende pi cogo ther ajiku ma dit; keth ewali ber; eyo, wek cogone wali i kinde.

⁶Kum kumeno Rwoth Yehova wacu kumae: Can wi adhura mi rimo, ni ajiku ma dit ma munyaline ni i ie, man munyali kuwok ungo kud i ie! kab wath ku wath woko kud i ie; gagi moko mbe m’upodho i wie.

⁷Kum rimo pare ni i kinde; ekethe wi cana ma lelele; ekonje wi ng’om ungo, kara eume kud utur.

⁸Kara eketh kwinyo idh malu mi culokwor, aketho rimbe wi cana ma lelele, kara ku juume.

⁹Kum kumeno Rwoth Yehova wacu kumae: Can wi adhura mi rimo mire! an bende abidhuro udhuro ma dit.

¹⁰Dhur yen, dwok mac lieth, ted ring’o cu, man dwok cwe nwang’, man wek cogo wang’.

¹¹Ilund ikethe ma ie nanu wi cukmaje, kara ebed lieth, man molane wang’, kara cilone lenyi ie de, kara munyaline wang’.

¹²Eole gire ku mule ku tic; ento munyaline ma dit uwok woko ngo kud i ie; munyaline wok woko ku mac ungo.

¹³Tarwang’ ni i cilo peri: kum adwoki leng’ e idoko leng’ ungo, jubidwoki leng’ kendo ngo ni cilo peri, cil m’aketho ko kwinyo para yom yor i beng’i.

¹⁴An, an a Yehova, ayero maeni: ebitimbre kakare, man abitimo maeni; abidok cen ungo, kadi kisa de binega ngo, kadi abilokra de ngo; calku yo peri, man calku giratima peri, gibipoko lembe i wii, Rwoth Yehova wacu.

¹⁵Lembe pa Yehova bende bino i bang’a, m’uwacu kumae,

¹⁶Wod dhanu, nen, akabu yeny ma weng’i yenyo kud i beng’i ku goc: ento kud igoi nduru kadi ywak de, kadi piweng’i de kud umol piny.

¹⁷Gam cwinyi, ento ling’ ling’, kud itim ywak pi ng’atu m’utho; twi jamtwic peri m’i wie i wii, man iroi wara peri i tiendi man kud ium dendhogi, man kud icam kwen mi dhanu.

¹⁸E ayero ni dhanu kugweno; e uthieno dhaku para tho; man atimo kugweno calu jung’olo ira.

¹⁹Man dhanu wacu ira kumae, Ibiyero maeni iwa ngo maram gin maeni bedo ko iwa, ketho itimo kumeni?

²⁰Alund awacu igi kumae, Lembe pa Yehova bino i bang’a, m’uwacu kumae,

²¹Yer ni ot mir Israel kumae, Rwoth Yehova wacu kumae: Nen, abicido kamaleng’ para, kuhaya mi tego mu, yeny ma weng’wu yenyo, man gin ma ngisi nego ng’eyong’ec mu i kume; e wotwu ku nyigwu ma wuweko yor i ng’eiwu bipodho ku palamularu.

²²E wubitimo calu atimo: wubiumo dendhogwu ngo, kadi wubicamu kwen mi dhanu de ngo.

²³Man jamtwic m’i wie mu bibedo i wiwu, wara mu de wi tiendwu: wubigoyo nduru ngo kadi ywak de; ento cwinywu bing’abre i kier mu, man wubicur acura man ku wadi man ku wadi.

²⁴E Ezekiel bibedo iwu ni giranyutha kumeni; calku gin ceke m’etimo e wubitimo kumeca: kinde ma maeni bino, wubilund ng’eyo nia an a Rwoth Yehova.

²⁵Man in, wod dhanu, ebibedo ngo i ceng’ m’akabu ie tego migi, kud anyong’a mi dwong’ migi, man yeny ma wang’gi yenyo, ku gin ma giketho cwinygi i kume, wotgi man nyiggi,

²⁶nia i ceng’ maeca ng’atu m’uboth bibino i beng’i, kara eketh iwinj maeni ku ithi?

²⁷I ceng’ maeca dhogi biyabre ni ng’atu m’uboth, man ibiyero, man ibibedo ajuba kendo ngo: e ibibedo ni giranyutha igi kumeni; man gibing’eyo nia an a Yehova.