Read Alur Ezekiel 25 Bible Online

Ezekiel 25 - Alur bible

Ezekiel 25

¹Man lembe pa Yehova bino i bang’a, m’uwacu kumae,

²Wod dhanu, keth weng’i yo ba nyithindho mir Amon, man ieu lembe i kumgi:

³man iwac ni nyithindho mir Amon kumae, Wuwinj lembe pa Rwoth Yehova: Rwoth Yehova wacu kumae, Kum iwacu kumae, Aha, kum kamaleng’ para, kinde ma jucide; man kum ng’om mir Israel, kinde ma judwoke ni uvuru; man kum ot mi Yuda, kinde ma gicidho i ng’eca:

⁴ka kumeno, nen, abimii ni piny ni nyithindho ma yo nyangu, man gibiketho hema migi ii, man gibitimo kabedo migi ii, gibicamu nying’ piny peri, man gibimadhu cak peri.

⁵Man abidwoko Raba ni dwol mi ngamia, man nyithindho mir Amon ni kavuto mir udul rombe: e wubing’eyo nia an a Yehova.

⁶Kum Rwoth Yehova wacu kumae: Kum iteng’o cingi, man iguro tiendi, man anyong’a negi kud adegi ceke mi ng’eyong’ec peri kum ng’om mir Israel;

⁷ka kumeno, nen, arieyo cinga i wii, man abimii ni ayeki ni thek; man abikebi woko ku ba kodhidhanu, man abirwinyi kud i ng’om: abinyothi; e ibing’eyo nia an a Yehova.

⁸Rwoth Yehova wacu kumae: Kum Moab ku Seir giwacu kumae, Nen, ot mi Yuda e calu mi thek ceke;

⁹ka kumeno, nen, abiyabu ng’et Moab ku bang’ adhura, ku bang’ adhura pare ma ni wi kieu pare, en e dwong’ mi ng’om, Beth-yecimoth, ku Bal-meyon, man Kiriathaim,

¹⁰abiyabu ni nyithindho ma yo nyangu, kara gicidh kum nyithindho mir Amon; man abimiogi ni piny, kara ku jupoi pi nyithindho mir Amon kendo kind thek:

¹¹man abitimo lembapoka wi Moab; e gibing’eyo nia an a Yehova.

¹²Rwoth Yehova wacu kumae: Kum Edom utimo kum ot mi Yuda ku culo kwor, man ekier dit, man eculo kwor ire gire i kumgi;

¹³ka kumeno Rwoth Yehova wacu kumae, Abirieyo cinga wi Edom, man abikabu dhanu ku lim woko kud i bang’e; man abidwoke ni uvuru gambre Teman; cil kum Dedan gibipodho ku palamularu.

¹⁴Man abiketho culokwor para wi Edom ku cing’ dhanu para Israel; man gibitimo kum Edom calku ng’ecwiny para man calku kwinyo para; e gibing’eyo culokwor para, Rwoth Yehova wacu.

¹⁵Rwoth Yehova wacu kumae: Kum Jufilisti gitimo ku culokwor, man giculo kwor kud adegi mi ng’eyong’ec kara unyoth kud adegi mi nja;

¹⁶ka kumeno Rwoth Yehova wacu kumae, Nen, abirieyo cinga wi Jufilisti, man abikabu Jukerethi, man abinyotho donge m’udong’ mi dhu wath.

¹⁷Man abiculo kwor ma dit i wigi ku jukojuk mi kwinyo; e gibing’eyo nia an a Yehova, kinde m’aketho culokwor para i kumgi.