Read Alur Ezekiel 26 Bible Online

Ezekiel 26 - Alur bible

Ezekiel 26

¹Man etimbre i rundi apar wi acende, i ceng’ ma kwong’ane mi dwi, nia lembe pa Yehova bino i bang’a, m’uwacu kumae,

²Wod dhanu, kum Turo wacu kum Yerusalem kumae, Aha, etur ma naka e dhugang’ mi kodhidhanu; elokre i bang’a; abipong’, kawono kum judwoke ni uvuru:

³ka kumeno Rwoth Yehova wacu kumae, Nen an a jadhogi, E Turo, man abiketho thek dupa idho malu i kumi, calu nam ketho mukurane idho malu.

⁴Man gibinyotho gang’kidi mi Turo, man gibirwombo odkur pare piny: abigweno uturne bende kud i kumi, man abidwoke ni cana ma temble.

⁵Ebibedo ni ka pedho voi i kind nam; kum ayero maeni, Rwoth Yehova wacu; e ebidoko ni ayeki ni thek.

⁶Man jubinego nyige ma ni i podho ku palamularu: e gibing’eyo nia an a Yehova.

⁷Kum Rwoth Yehova wacu kumae, Nen, abikelo Nebukadrezar m’ubimo mi Babeli, en e ubimo mir ubimo, ku yor ariwa ma malu, karacelo ku riuni, man ku magali, ku weg riuni, ku njuru dhanu, ku dhanu ma dit, wi Turo.

⁸Ebinego nyigi i thim ku palamularu; man ebitimo ot ma tek mir ali i kumi, man ebidhuro ng’om i kumi, man ebiting’o thungu i kumi.

⁹Man ebiketho jamb rwombo piny pare kum gang’kidi peri, man ebituro odkur peri piny ku lei pare.

¹⁰Ni kum dit mi riuni pare utur migi biumi: gang’kidi peri biyengre ni kum badwal mi weg riunine, man mir ukobre, man mi magali, kinde m’ebimondo i dhugang’ peri, calu dhanu mondo i adhura ma jurwombo piny i ie.

¹¹Ebinyono gengi peri ceke piny ku tiend riuni pare; man ebinego dhanu peri ku palamularu; man mbegi mi tego peri biloro piny i ng’om.

¹²Man gibidwoko lonyo peri ni ayeki, man gibidwoko kuloka peri ni amaci; man gibirwombo gang’kidi peri piny, man ginyotho udi peri ma beco; man gibiketho kidi peri ku yen peri kud utur peri i die pi.

¹³Man abiketho badwal mi wer peri jik; man jubiwinjo badwal mir adungu peri kendo ngo.

¹⁴Man abidwoki ni cana ma temble; ibibedo ni kapedh voi; jubigomi kendo ngo: kum an a Yehova ayero maeni, Rwoth Yehova wacu.

¹⁵Rwoth Yehova wacu ni Turo kumae: Cula biyengre kum badwal mi podho peri m’ipodho ngo, kinde ma ju ma jutong’o lero i kumgi bicur acura, kinde ma junego nek i kindi?

¹⁶Judongomawijo ceke mi nam biloro piny ku wi komker migi, man gibiwanyu kendi migi cen, man gibiwanyu kendi migi ma juruko: gibironjri gigi ku mielkum; gibibedo wi ng’om, e kumgi bimiel ku ba kinde ma nyathigi, man igi biwang’ lii i kumi.

¹⁷E gibiting’o ywak i wii, man gibiwacu iri kumae, Inyothri mire, in ma naka junam bedo ii, en e adhura ma pire yik, m’ubedo tek i nam, en ku ju m’ubedo i ie de, m’uketho ndiri migi bed wi dhanu ceke m’ubedo kuca!

¹⁸Kawono cula kumgi bimiel i ceng’ mi podho peri; eyo, cula ma ni i nam cwinygi bing’abre kum ai peri.

¹⁹Kum Rwoth Yehova wacu kumae: Kinde m’abidwoki ni adhura m’uvuru, calu adhura ma jubedo i ie ngo; kinde m’abikelo nam i wii, man pi ma dit biumi;

²⁰abilund teri piny ku ju m’uloro i vur, ba dhanu mi nindo ma con, man abiketho ibedo i ng’et ng’om ma yo piny, i ka ma judwoko ni uvuru con, ku ju m’uloro piny i vur, kara kud ibed ma dhanu ni ii, man abiketho dwong’ i ng’om mi ju ma kwo.

²¹Abidwoki ni ndiri, man ibibedo nuti kendo ngo; kadok juyenyi, ento jubinweng’i kendo ngo, Rwoth Yehova wacu.