Read Alur Ezekiel 27 Bible Online

Ezekiel 27 - Alur bible

Ezekiel 27

¹Lembe pa Yehova bino i bang’a kendo, m’uwacu kumae,

²Man in, wod dhanu ting’ ywak wi Turo;

³man iwac ni Turo kumae, E in m’ibedo i kamondo mi nam, m’i jakuloka mi kodhidhanu ba cula dupa, Rwoth Yehova wacu kumae: In, E Turo, iwacu kumae, Abedo ndhu cu i leng’.

⁴Kieu peri ni i adunde nam; jugom peri gidwoko leng’ni ndhu cu.

⁵Gitimo bau peri ceke kum yen sipre m’uai Senir; gigamu musonge kud i Lebanon kara utim mbegi mi combo iri.

⁶Gitimo upol peri ku bongu mi Bacan; gitimo kom peri ku yend atego ma jumwono lakliec i ie, m’uai i cula mi Kitim.

⁷Bongu combo peri mi yamu en e mi bongu ma nwang’ ma ber ku tic mi kwoc mi ruko m’uai i Misiri, kara ebed iri ni abera; bongu m’apedha peri en e m’ulweku ku m’uluga m’uai i cula mir Elica.

⁸Dhanu m’ubedo i Sidon kud Arvad naka gi jukieu piny peri: jurieko peri, E Turo, naka gini ii, naka gi jutwiny combo peri.

⁹Naka judongo mi Gebal ku juriekone gini ii ni juyik the combo peri: naka combo ceke mi nam ku dhanune de gini ii kara gilok jamkuloka peri.

¹⁰Ajemi ku Lud man Put naka gini i njuru asikari peri, gi dhanu peri mir ali; ging’abu ban ku jamgwokmiwic i ii; ginyutho beroni.

¹¹Naka dhanu mir Arvad giku njuru asikari peri gini wi gang’kidi peri gbur, man dhanu ma jukero gini i odkur peri; ging’abu ban migi wi gang’kidi peri gbur; gidwoko leng’ni ndhu cu.

¹²Tarcic naka jakuloka peri ni kum udul lonyo ma kwonde tung’ tung’; ku mola ma tar, man nyunyu, ku lunjanja, man risasi, giloko ni piny peri.

¹³Javan, ku Tubal man Mecek, gin gi jukuloka peri; giloko kwo mi dhanu man agulu mi mola ni jamkuloka peri.

¹⁴Ju m’i ot mi Togarma giloko riuni man riuni mir ali ku kana ni piny peri.

¹⁵Dhanu mi Dedan gi jukuloka peri; cula dupa gi katali mi cingi: gikelo iri tung mi lakliec ku rith ni giramia.

¹⁶Cami en e jakuloka peri ni kum udul giratima peri: giloko kidi ma calu lum, man m’uluga, ku tic mi kwoc mi ruko, ku bongu ma nwang’ ma ber, ku kidi ma tar ma the nam, ku kidi ma kwar ngbo, ku piny peri.

¹⁷Yuda, ku ng’om mir Israel, naka gi jukuloka peri: giloko nganu mi Minith, ku gin ma lim lim, man kic, ku mo, man yath mi mo, giloko ni jamkuloka peri.

¹⁸Dameski en e jakuloka peri, kum udul tic mi cingi, kum udul lonyo ma kwonde tung’ tung’ ceke, ku pigulok mi Helbon, man yuk rombo ma tar.

¹⁹Vedan ku Yavan giloko thondh yuk rombo ni piny peri: nyunyu ma jutimo, kud apoka yen ma lim lim, man kolo, gini i kind jamkuloka peri.

²⁰Dedan en e jakuloka peri i bongu ma pire tek mi woth.

²¹Arabia, ku judongomawijo mi Kedar, gi jukuloka mi cingi; i nyithi rombe, man nyogi rombe, ku diegi, i maeni gi jukuloka peri.

²²Jukuloka mi Ceba ku Rama, gi jukuloka peri; giloko yath ma jwa jwa ceke ma cu, ku kidi ma pire tek ceke, ku mola ma kwar, ni piny peri.

²³Haran ku Kane man Aden, ma jukuloka mi Ceba, Ascur man Kilmad, gi jukuloka peri.

²⁴Maeni gi jukuloka peri i piny ma pire tek, i giraboya m’ulweku man tic mi kwoc m’aruka, man i sanduk mi kendi mi lonyo, ubedo atwia ku thol ma jutimo ku musonge, i kind jamkuloka peri.

²⁵Combo mi Tarcic gi piro mi jamkuloka peri: man ipong’, man judwoki dwong’ hai i adunde mi nam.

²⁶Jukieu peri gikeli i pi ma dit: yamu ma yo nyangu thori i adunde mi nam.

²⁷Lonyo peri, ku piny peri, ku jamkuloka peri, man junam peri, ku jutwiny combo peri, ku jumwon the combo peri, ku jukuloka mi jamkuloka peri, ku dhanu mir ali peri ceke, ma gini ii, ku njuru dhanu peri ceke ma ni i kindi, gibipodho i die nam i ceng’ mi nyoth peri.

²⁸Ni badwal mi ywak mi jutwiny combo peri pacu mi ng’ete biyengre.

²⁹Man dhanu ceke m’umaku upol, ma junam, ku jutwiny combo ceke mi nam, gibiloro piny kud i combo migi; gibicungo wi ng’om,

³⁰man gibiketbo dwandgi winjre i wii, man gibiywak ni can, man gihiketho utur i wigi; gibirudri gigi i vuru,

³¹man gibiwang’u wigi gigi piri, man gibitwiri gigi ku gonia, man gibiywak piri i kec mi ng’eyong’ec ku kec mi ywak.

³²Man i goyonduru migi gibiting’o ywak piri, man gibiywak i wii, ma gibiwacu ko kumae, Ng’a ma calu Turo, calu en ma judwoke ling’ i die nami?

³³Kinde ma piny peri wok woko kud i nam, ipong’o kodhidhanu dupa; ilonyo ju m’ubimo m’i ng’om kud udul lonyo peri man mi jamkuloka peri.

³⁴I nindo m’itur ku nam i pi ma thuth, jamkuloka peri ku njuru dhanu peri ceke podho i kindi.

³⁵Dhanu m’ubedo i cula ceke igi wang’ lii i kumi, man lworo nego ju m’ubimo migi dit; cwinygi ng’abre i wang’gi.

³⁶Jukuloka gicei i kind kodhidhanu; idoko ni ndiri, man ibibedo nuti kendo ngo mi nja.