Read Alur Ezekiel 28 Bible Online

Ezekiel 28 - Alur bible

Ezekiel 28

¹Lembe pa Yehova bino i bang’a kendo, m’uwacu kumae,

²Wod dhanu, wac ni jaditmawijo mi Turo kumae, Rwoth Yehova wacu kumae: Kum adundeni tingre malu, man iwacu kumae, An a mungu, abedo wi kom pa Mungu, i die nam; ento in i dhanu, man Mungu ngo, kadok iketho adundeni calu adunde Mungu;

³nen, i riek ma sagu Daniel; lembamung’a moko mbe m’upandre iri;

⁴ilimo lonyo iri ku rieko peri man ku ng’eyothelembe peri, man igamu mola ma kwar ku mola ma tar i piny m’akana peri;

⁵ku rieko peri ma dit man ku kuloka peri inyayu lonyo peri, man adundeni tingre kum lonyo peri;

⁶kum kumeno Rwoth Yehova wacu kumae, Kum iketho adundeni calu adunde Mungu,

⁷ka kumeno, nen, abikelo juwirok i wii, jundiri mi thek; man gibiwodho palamularu migi kum leng’ mi rieko peri, man gibicido rieny peri.

⁸Gibiteri piny ba vur; man ibitho tho mi ju ma junego i die nam.

⁹Ibiwacu asu i wang’ ng’atu m’unegi kumae, An a Mungu, ento in i dhanu, Mungu ngo, i cing’ ng’atu m’utong’o lero i kumi.

¹⁰Ibitho tho mi ju ma yaa mbe i kumgi ku cing’ juwirok: kum ayero maeni, Rwoth Yehova wacu.

¹¹Man ke lembe pa Yehova bino i bang’a, m’uwacu kumae,

¹²Wod dhanu, ting’ ywak wi ubimo mi Turo, man iwac ire kumae, Rwoth Yehova wacu kumae: Imwono ayi kum wel, pong’ ku rieko, man ndhu cu i leng’.

¹³Naka ini i Aden, podho pa Mungu; kidi ma pire tek kubang’e kubang’e ubedo ni girauma peri, en e kidi ma kwar ngbo, man kidi ma ie nen calu lum, man kidi ma ie nen ma rieny hai, man kidi ma col calu nam, man kidi ma tek ma kite tung’ tung’, man kidi ma ju kite ma pii pii, man kidi ma tek ma ie nen uluga, man kidi ma col calu lum, man kidi ma kwar calu mac, man mola ma kwar: man tic mir umbukulumbu peri kud adungu peri ni ii; juyikogi i ceng’ ma jucwii i ie.

¹⁴In i malaika ma juwiro m’uumo: man akethi, ketho nia ibedo wi got ma leng’ pa Mungu; iwotho malu ku piny i kind kidi mi mac.

¹⁵Ibedo ndhu cu i yo peri ugambre i ceng’ ma jucwii i ie, cil ma gondri nwangre i ii.

¹⁶Gipong’o kindi ku rop ku dit mi kuloka peri, e idubo: ka kumeno abei kud i got pa Mungu calu gin m’ucido; man anyothi, E malaika m’uumo, ku kind kidi mi mac.

¹⁷Adundeni tingre kum leng’kumi; inyotho rieko peri kum rieny peri: abei i ng’om; akethi i wang’ ju m’ubimo, kara gineni.

¹⁸Icido kamaleng’ peri kud udul kier peri, i gondri mi kuloka peri; ka kumeno awodho mac kud i kindi; eweng’i, man eloki ni vuru wi ng’om i wang’ dhanu ceke m’uneni.

¹⁹Dhanu ceke m’ung’ei i kind kodhidhanu igi biwang’ lii i kumi: idoko ni ng’oyondiri, man ibibedo mbe kendo mi nja.

²⁰Man lembe pa Yehova bino i bang’a, m’uwacu kumae,

²¹Wod dhanu, keth weng’i yo ba Sidon, man ieu lembe i kume,

²²Man iwac kumae, Rwoth Yehova wacu kumae: Nen, an a jadhogi, E Sidon; man jubiyunga i kindi; e gibing’eyo nia an a Yehova, kinde m’atimo lembapoka i ie, man kinde ma judwoka leng’ i ie.

²³Kum abioro thong’om i ie, man rimo i gengi pare; man ju ma jutong’o lero i kumgi gibipodho i kinde, ku palamularu i kume i ng’ete kun ku kun; e gibing’eyo nia an a Yehova.

²⁴Man ukudho ma cobo bibedo mbe kendo ni ot mir Israel, kadi ukudho ma remo kum mi jumoko m’utiekogi gbur, ma timo rop i kumgi; e gibing’eyo nia an a Rwoth Yehova.

²⁵Rwoth Yehova wacu kumae: Kinde m’abicoko ot mir Israel ku kind kodhidhanu ma julalugi i ie, man kinde ma jubidwoka leng’ ni kumgi i wang’ thek, gibilund bedo i ng’om migi ma dhe m’amio ni jatic para ma Yakobo.

²⁶E gibibedo museme i ie; eyo, gibigomo udi, man gibipidho podho mir ulok, e gibibedo museme, kinde m’atimo lembapoka kum dhanu ceke m’utimo rop i kumgi i ng’etgi gbur; e gibing’eyo nia an a Yehova Mungu migi.