Read Alur Ezekiel 29 Bible Online

Ezekiel 29 - Alur bible

Ezekiel 29

¹I rundi mir apaje, i dwi mir apaje, i ceng’ apar wi arionde mi dwije, lembe pa Yehova bino i bang’a, m’uwacu kumae,

²Wod dhanu, keth weng’i kum Farao m’ubimo mi Misiri, man ieu lembe i kume, man kum Misiri ceke;

³yer, man iwac kumae, Rwoth Yehova wacu kumae: Nen, an a jadhogi, Farao m’ubimo mi Misiri, thwol ma dit m’uvuto i die kulo pare, m’uwacu kumae, Kulo para en e para gira, man atime ira gira.

⁴Man abiketho gol i lwokni, man abiketho rec mi kulo peri umok kum apoka peri; man abiwodhi woko kud i die kulo peri, karacelo ku rec ceke mi kulo peri m’umoko kum apokani.

⁵Man abibei i langa, in ku rec ceke mi kulo peri: ibipodho i thim ma ngbeng’; jubikeli karacelo ngo, kadok acoka de; amii ni cemo mi yedi m’i ng’om man ni winyo ma kor polo.

⁶Man ju m’ubedo i Misiri ceke gibing’eyo nia an a Yehova, kum gibedo ni uluth mir usi ni ot mir Israel.

⁷Kinde ma gimeki ku cing’gi, itur, man iyeco gokgi ceke; man kinde ma gijengri i kumi, itur, man iketho piergi ceke miel.

⁸Ka kumeno Rwoth Yehova wacu kumae: Nen, abikelo palamularu i wii, man abitong’o dhanu ku lim kud i kumi.

⁹Man ng’om Misiri bibedo ni nyoth man ni uvuru; e gibing’eyo nia an a Yehova. Kum ewacu kumae, Kulo en e para, man atime an;

¹⁰ka kumeno, nen, an a jadhogi, man jadhu kulo peri, man abidwoko ng’om mi Misiri ni uvuru ma vii man nyoth, ugambre odkur mi Sevene cil kum kieu mir Ethiopia.

¹¹Tiend dhanu moko mbe ma bikadhu kud i ie, kadi tiend lei de bikadhu kud i ie ngo, kadi jubibedo i ie ngo mi rundi pier ang’wen.

¹²Man abidwoko ng’om mi Misiri ni nyoth i die ng’om ma gibedo ni nyoth; man adhura pare kind adhura ma judwoko ni uvuru bibedo ni nyoth rundi pier ang’wen; man abilalu Jumisiri i kind thek, man abilalugi i kind ng’om.

¹³Kum Rwoth Yehova wacu kumae: I kajik rundi pier ang’wen abicoko Jumisiri ku ba kodhidhanu ma julalugi i ie;

¹⁴man abidwoko ng’eca mi Misiri, man abiketho gidwogo i ng’om Pathros, i ng’om ma junyologi i ie; man gibibedo kuca ni ker ma ng’ic.

¹⁵Ebibedo ker ma ng’ic ma the wadi; kadi ebitingre gire malu wi thek kendo ngo: man abijwigogi kara ku gibim kendo wi thek.

¹⁶Man ebibedo genogen mi ot mir Israel kendo ngo, m’eketho jupoi pi kier, kinde ma gilokri kara ginen tokgi: e gibing’eyo nia an a Rwoth Yehova.

¹⁷Man etimbre rundi pier ario wi abirone, i dwi ma kwong’ane, i ceng’ ma kwong’ane mi dwije, lembe pa Yehova bino i bang’a, m’uwacu kumae,

¹⁸Wod dhanu, Nebukadrezar m’ubimo mi Babeli ketho njuru asikari pare utim tic ma dit kum Turo: wie kubang’e kubang’e judwoke wang’, man gok kubang’e kubang’e dido; ento fodi ebedo ku sukulia ngo, kadi njuru asikari pare, ku ba Turo, kum tic m’etimo i kume.

¹⁹Ka kumeno Rwoth Yehova wacu kumae; Nen, abimio ng’om Misiri ba Nebukadrezar m’ubimo mi Babeli; man ebiyaku udul pare, man ebigamu ayeki pare, man ebigamu amaci pare; e ebibedo ni sukulia ni njuru asikari pare.

²⁰Amio ng’om Misiri ire ni sukulia pare kum tic m’etimo, kum gitimo ira, Rwoth Yehova wacu.

²¹I ceng’ maeca abiketho tung kudo ni ot mir Israel, man abimio iri ng’amudhok i kindgi; e gibing’eyo nia an a Yehova.