Read Alur Ezekiel 30 Bible Online

Ezekiel 30 - Alur bible

Ezekiel 30

¹Lembe pa Yehova bino i bang’a kendo, m’uwacu kumae,

²Wod dhanu, cu, man iwac kumae, Rwoth Yehova wacu kumae: Wugoi nduru kumae, Can wi ceng’ maeno mire!

³Kum cenge ni ceng’ni, en e ceng’ pa Yehova m’eni ceng’nine; ebibedo ceng’ mir afuru nindo mi thek.

⁴Man palamularu bibino wi Misiri, man ndiba bibedo wi Ethiopia, kinde ma ju ma junego podho i Misiri; man gibiyaku udul pare cen, man jubirwombo thepiny pare piny.

⁵Ethiopia, man Put, ku Lud, man dhanu m’ajeba ceke, ku Kub, man nyithindho m’i ng’om m’ubedo ariba, gibipodho karacelo kugi ku palamularu.

⁶Yehova wacu kumae: Gin bende ma gijengo Misiri gibipodho; man kuhaya mi tego pare bipei piny; ugambre kum odkur mi Sevene gibipodho i ie ku palamularu, Rwoth Yehova wacu.

⁷Man gibibedo lii i kind ng’om m’ubedo kende; man adhura pare bibedo i kind adhura ma judwoko ni uvuru.

⁸E gibing’eyo nia an a Yehova, kinde m’acwinyo mac i Misiri, man jukony pare ceke nyothre.

⁹I ceng’ maeca jukwenda biwok woko i wang’a i combo kara ginyai lworo i Juethiopia ma paru lembe ngo; man ndiba bibedo i wigi, calu i ceng’ mi Misiri; kum, nen, ebino.

¹⁰Rwoth Yehova wacu kumae: Abijigo wi udul mi Misiri bende, ku cing’ Nebukadrezar m’ubimo mi Babeli.

¹¹En ku dhanu pare gikugi, en e jang’oindiri mi thek, jubikele i ie kara enyoth ng’ombe; e gibitworo palamularu migi kum Misiri, man gibipong’o ng’om ku ju ma junego.

¹²Man abidwono kulo, man abiloko ng’ombe i cing’ dhanu ma rac; e abidwoko ng’ombe ni uvuru, ku gin ceke ma ni i ie, ku cing’ juwirok: an, an a Yehova, ayero maeni.

¹³Rwoth Yehova wacu kumae: Abinyotho mungu m’araga bende, man abijigo wi ayi gin m’acwia kud i Memfis; man jaditmawijo bibedo mbe kendo kud i ng’om Misiri; man abiketho lworo i ng’om Misiri.

¹⁴Man abidwoko Pathros ni uvuru, man abiketho mac i Zoan, man abitimo lembapoka wi No.

¹⁵Man abikonjo kwinyo para wi Sin, ma en e ka ma tek mi Misiri; man abikabu udul woko ku ba No.

¹⁶Man abiketho mac i Misiri; ndiba ma dit bibedo wi Sin, man jubing’enyo No tung’ tung’; man Memfis bibedo ku jusend i nindo mi dieceng’.

¹⁷Awobi mir Aven man mi Pi-beseth bipodho ku palamularu; man adhura maeni bicidho i ng’eca.

¹⁸Tehafnehes bende ceng’ bidoko gire ni mudho, kinde m’aturo mberembere mi Misiri kuca, man kuhaya mi tego pare bijik i ie: pire, afuru biume, man nyige bicidho i ng’eca.

¹⁹Abitimo lembapoka i kum Misiri kumeca; e gibing’eyo nia an a Yehova.

²⁰Man etimbre i rundi apar wi acende, i dwi ma kwong’ane, i ceng’ mir abirone mi dwije, nia lembe pa Yehova bino i bang’a, m’uwacu kumae,

²¹Wod dhanu, aturo bot Farao m’ubimo mi Misiri; man nen, jutwie ngo, kara juketh yath mi cang, kara juketh bongu m’atwia nitwie, kara ebed tek mi maku palamularu.

²²Ka kumeno Rwoth Yehova wacu kumae: Nen, an a jadhu Farao m’ubimo mi Misiri, man abituro bote, en e bot ma tek, ku maeno ma juturo; man abiketho palamularu upodh kud i cinge.

²³Man abilalu Jumisiri i kind thek, man abilalugi i kind ng’om tung’ tung’.

²⁴Man abimio tego ni bot ubimo mi Babeli, man abiketho palamularu para i cinge: ento abituro bot Farao, man ebicur acura i wang’e ku cur mi dhanu ma jutong’o lero i kume mi tho.

²⁵Man abiting’o bot mir ubimo mi Babeli malu; man bot Farao bipodho piny; e gibing’eyo nia an a Yehova, kinde m’abiketho palamularu para i cing ubimo mi Babeli, man ebirieye wi ng’om mi Misiri.

²⁶Man abilalu Jumisiri kind thek, man abilalugi i kind ng’om tung’ tung’; e gibing’eyo nia an a Yehova.