Read Alur Ezekiel 31 Bible Online

Ezekiel 31 - Alur bible

Ezekiel 31

¹Man etimbre i rundi apar wi acende, i dwi mir adege, man i ceng’ ma kwong’ane mi dwije, nia lembe pa Yehova bino i bang’a, m’uwacu kumae,

²Wod dhanu, yer ni Farao m’ubimo mi Misiri, man ni udul pare kumae: In i calu ng’a i dit peri?

³Nen, Jaascuri naka en e musonge i Lebanon ku jange ma ber, man ku tipopiny ma calu luli, man ku kadongone ma wiu; man wie ni kind afuru.

⁴Pi gwoke, man nam uketho edongo: kulone molo gbur kum podhone; man eoro kulo pare ceke ba yedhi ceke m’i podhone.

⁵Ka kumeno kadongone dodre malu wi yedhi ceke m’i thim; man jange medre, man jange wobo, ni kum pi ma dupa, kinde m’elodhogi.

⁶Winyo ceke ma kor polo utimo odgi wi jange; man lei ceke m’i thim ginyolo nyithindhgi the jange; man thek ma dit ceke gibedo the tipone.

⁷Ka kumeno e ber i dit pare, i kabor mi jange; kum ulage ni ng’et pi dupa.

⁸Musonge i podho pa Mungu copo kane ngo; sipre calu jange ngo, man yenduyelo gi calu jange ngo; kadi yen moko mbe i podho pa Mungu ma calu en i leng’ne.

⁹Adwoke ber ni kum udul mi jange, ketho nia yedhi ceke m’i Aden, ma ni i podho pa Mungu, ngiri negogi i kume.

¹⁰Ka kumeno Rwoth Yehova wacu kumae: Kum idodri wiu, man eketho wie i kind afuru, man adundene tingre malu i kadongo pare;

¹¹abimie i cing’ ng’atu acel ma jarukara mi thek; ebitimo i kume andha; arieme woko kum dubo pare.

¹²Man juwirok, jung’oindiri mi thek, ging’ole cen, man giweke: jange podho wi gudi man wi poga ceke, man jange tur ni kum kulo ceke m’i ng’om; man kodhidhanu ceke m’i ng’om giloro piny ku ba tipopinyne, e giweke.

¹³Winyo ceke ma kor polo bibedo wi uvurune, man yedi ceke m’i thim bibedo wi jange;

¹⁴kara yedhi moko ma kind yedhi ceke ma dhu kulo ku gidodri gigi ni kum kadongo migi, kadok ku giketh wigi kum jang’ wagi ma ngbii, kadi ju ma tek migi ku gicung malu i kadongo migi, en e ceke ma gimadhu pi: kum jumiogi ceke ni tho, yo ba ng’et ng’om ma yo piny, i kind nyithindho mi dhanu, karacelo ku ju m’uloro piny i vur.

¹⁵Rwoth Yehova wacu kumae: I ceng’ kinde m’eloro piny ba liel aketho ywak: a umo nam pire, man acero kulo ma ditne; e pi ma dit ujik; man aketho Lebanon uywak pire, man yedhi ceke m’i thim gicur pire.

¹⁶Aketho thek uyengre kum badwal mi podho pare m’epodho, kinde m’aredhe piny ba liel karacelo ku ju m’uloro piny i vur; man yedhi ceke mir Aden, ma jufoyo man m’usagu mi Lebanon, ceke m’umadhu pi, jujukogi i ng’et ng’om ma yo piny.

¹⁷Gin bende giloro piny i liel karacelo kude ba ju ma junego ku palamularu; eyo, gi ju ma naka ju bote, m’ubedo the tipopinyne i kind thek.

¹⁸In i calu ng’a kumeno i dwong’ man i dit i kind yedhi mir Adeni? ento jubikeli piny karacelo ku yedhi mir Aden ba ng’et ng’om ma yo piny: ibivuto i kind ju ma yaa mbe i kumgi, karacelo ku ju ma junego ku palamularu. Maeni en e Farao kud udul pare ceke, Rwoth Yehova wacu.