Read Alur Ezekiel 32 Bible Online

Ezekiel 32 - Alur bible

Ezekiel 32

¹Man etimbre i rundi apar wi arionde, i dwi apar wi arionde, i ceng’ ma kwong’ane mi dwije, nia lembe pa Yehova bino i bang’a, m’uwacu kumae,

²Wod dhanu, ting’ ywak wi Farao m’ubimo mi Misiri, man iwac ire kumae, Jupori ku nyathin umvor m’ara du mi thek; ento in i calu thwol m’i nam; man idhenjri ku kulo ma dongo peri, man idhenyo pi ku tiendi, icido kulo ma dongone de.

³Rwoth Yehova wacu kumae: Abipedho voi para i wii ku njuru dhanu mi kodhidhanu dupa; e gibikeli malu i voi para.

⁴Man abiweki wi ng’om, abibei i thim ma ngbeng’, man abiketho winyo ceke m’i polo ging’ino i wii, man abiketho yedi m’i ng’om dho yeng’ kudi.

⁵Man abiketho ring’kumi wi gudi, man abipong’o poga ku kadongoni.

⁶Abikonjo rimo peri bende wi ng’om m’ikwang’ i ie, cil kum gudi; man die kulo bipong’ kudi.

⁷Man kinde m’abideri, abiumo polo, man abidwoko cerone ni mudho; abiumo ceng’ kud afuru, man dwi bimio deroe ngo.

⁸Der ceke m’i polo m’urieny abiketho gidoko ni mudho i wii, man abiketho mudho wi ng’om peri. Rwoth Yehova wacu.

⁹Abiketho adunde kodhidhanu dupa dieng’ bende, kinde m’abikelo nyoth peri kind thek, i ng’om ma fodi ing’eyo ngo.

¹⁰Eyo, abiketho i kodhidhanu dupa wang’ lii i kumi, man lworo m’apila binego ju m’ubimo migi i kumi, kinde m’abitworo palamularu para i wang’gi; man kumgi bimiel ku ba kinde ku ba kinde, ku ba dhanu ku ba dhanu ng’atuman pi kwo pare gire, i ceng’ mi podho peri m’ipodho.

¹¹Kum Rwoth Yehova wacu kumae: Palamularu p’ubimo mi Babeli bibino i wii.

¹²Abiketho udul dhanu peri bipodho ku palamularu mi jurukara; kagi ceke gi jundiri mi thek: man gibidwoko kuhaya mi Jumisiri ni gin mananu, man udulne ceke binyothre.

¹³Abinyotho yedine ceke bende i ng’et pi dupa; kadok tiend dhanu de bisendogi kendo ngo, kadi utweng yedi de bisendogi ngo.

¹⁴Abilund dwoko pi migi terere, man abiketho kulo migi ma dongo mol calu mo, Rwoth Yehova wacu.

¹⁵Kinde m’abidwoko ng’om mi Misiri lic man ni uvuru, ng’om m’ubedo mbe gin ma naka epong’ kudo, kinde m’abigoyo dhanu ceke m’ubedo i ie, gibilund ng’eyo nia an a Yehova.

¹⁶Maeni ywak ma gibiywak kudo; nyig thek biywak kudo; wi Misiri, man wi udul pare ceke, gibiywak kudo, Rwoth Yehova wacu.

¹⁷Etimbre bende i rundi apar wi arionde, i ceng’ apar wi abije mi dwije, nia lembe pa Yehova bino i bang’a, m’uwacu kumae,

¹⁸Wod dhanu, Ywak pir udul mi Misiri, man iredhgi piny, en e en, ku nyig thek ma pigi yik, ba ng’et ng’om ma yo piny, karacelo ku ju m’uloro piny i vur.

¹⁹Isagu ng’a i leng’kumi? lor piny, man ivut karacelo ku ju ma yaa mbe i kumgi.

²⁰Gibipodho i kind ju ma junego ku palamularu: jumie ba palamularu; ywaye cen kud udul pare ceke.

²¹Jutego i kind jurukara biyero i bang’e kud i die liel karacelo ku ju m’ukonye: giloro piny, givuto ling’, en e ju ma yaa mbe i kumgi, ma junego ku palamularu.

²²Ascur ni kuca ku njuru dhanu pare ceke; liende gini kume gbur; kagi ceke ma junego, ma gipodho ku palamularu;

²³ma liel migi juketho yor i ng’et vur ma borne, man njuru dhanu pare ni kum liel pare gbur; kagi ceke ma junego, m’upodho ku palamularu, m’unyayu ndiri i ng’om mi ju ma kwo.

²⁴Elam nuti kud udul pare ceke m’utieko kum liende gbur; kagi ceke ma junego, ma gipodho ku palamularu, m’uloro piny ma yaa mbe i kumgi i ng’et ng’om ma yo piny, m’unyayu ndiri migi i ng’om mi ju ma kwo, man m’uyeyo lewic migi karacelo ku ju m’uloro piny i vur.

²⁵Giketho kavuto ire i kind ju ma junego karacelo kud udul pare ceke; liel pare ni kume gbur; kagi ceke ma yaa mbe i kumgi, ma junegogi ku palamularu; kum junyayu ndiri migi i ng’om mi ju ma kwo, man giyeyo lewic migi karacelo ku ju m’uloro piny i vur: jukethe i kind ju ma junego.

²⁶Mecek, man Tubal ginuti, kud udul migi ceke; liendgi ni ng’etgi gbur; kagi ceke ma yaa mbe i kumgi, ma junego ku palamularu; kum ginyayu ndiri migi i ng’om mi ju ma kwo.

²⁷Man gibivuto ku jurukara ngo m’upodho ma yaa mbe i kumgi, m’uloro piny ba liel ku jamtho migi mir ali, man m’uketho palamularu migi the wigi, man kier migi ni wi cogo migi; kum gi ndiri ni jurukara i ng’om mi ju ma kwo.

²⁸Ento ibitur i kind weg yaa ngo, man ibivuto karacelo ku ju ma junego ku palamularu.

²⁹Edom nuti, ju m’ubimo pare ku judongomawijo pare ceke, ma kum tego migi ceke juketho karacelo ku ju ma junego ku palamularu: gibivuto karacelo ku weg yaa ngo, man karacelo ku ju m’uloro piny i vur.

³⁰Judongomawijo ma yor ariwa ma malu gi nuti, kagi ceke, ku Jusidoni ceke, m’uloro piny giku ju ma junego; kum ndiri ma ginyayu ku tego migi juketho lewic i wigi; man givuto ma gi weg yaa ngo ku ju ma junego ku palamularu, man giyeyo lewic migi karacelo ku ju m’uloro piny i vur.

³¹Farao binenogi, man ebijukre kum udul pare ceke, en e Farao ku njuru asikari pare ceke, ma junego ku palamularu, Rwoth Yehova wacu.

³²Kum aketho ndiri pare i ng’om mi ju ma kwo; man jubikethe i kind weg yaa ngo, karacelo ku ju ma junego ku palamularu, en e Farao kud udul pare ceke, Rwoth Yehova wacu.