Read Alur Ezekiel 33 Bible Online

Ezekiel 33 - Alur bible

Ezekiel 33

¹Lembe pa Yehova bino i bang’a, m’uwacu kumae,

²Wod dhanu, yer ni nyithindho mi dhanu peri, man iwac igi kumae, Kinde m’akelo palamularu wi ng’om, man dhanu m’i ng’ombe gigamu dhanu kud i kindgi, man gikethe ni jakur migi;

³tek, kinde m’eneno palamularu wok wi ng’ombe, ekudho agwara, man epoyo dhanu;

⁴e ng’atu ma tek uwinjo badwal mir agwarane, man eworo poine ngo, tek palamularu bino, man ekabe cen, rimo pare bibedo i wie gire.

⁵Ewinjo badwal mir agwara, man eworo poine ngo; rimo pare bibedo i wie; ento tek eworo poiiie, kuno di ebodho ng’eyong’ec pare.

⁶Ento tek jakur uneno palamularu bino, man ekudho agwara ngo, e jupoyo dhanu ngo, man palamularu bino, man ekabu ng’atu moko kud i kindgi; jukabe cen i kier pare, ento rimo pare abilwong’o i cing jakur.

⁷Kum kumeno in, wod dhanu, akethi ni jakur mi ot mir Israel; ka kumeno winj lembe i dhoga, man ipoigi kud i bang’a.

⁸Kinde m’awacu ni jadubo kumae, E ng’atu ma jadubo, ibitho andha, man iyero ngo kara upoi jadubo kud i yo pare; ng’atu maeno ma jadubo bitho i kier pare, ento rimo pare abilwong’o i cingi.

⁹Ento, tek ipoyo jadubo i yo pare ya elokrei ie, man elokre ngo kud i yo pare; ebitho i laer pare, ento ibodho ng’eyong’ec peri.

¹⁰Man in, wod dhanu, wac ni ot mir Israel kumae: Wuyero kumeni, wuwacu kumae, Kier mwa ku dubo mwa ni i wiwa, man wamwony i ie; wacopo bedo kwo nenedi?

¹¹Wac igi kumae, Calu abedo kwo, Rwoth Yehova wacu, anyong’a nega ngo kum tho pa jadubo; ento ya jadubo lokre kud i yo pare man ebed kwo: wulokru, wulokru kud i yo mu ma rac; kum wubitho nedi, E ot mir Israeli?

¹²Man in, wod dhanu, wac ni nyithindho mi dhanu peri kumae, Bedopwe pa ng’atu ma pwe bibodhe ngo i ceng’ mi kier pare; man pi dubo pa jadubo ebipodho kudo ngo i ceng’ m’elokre kud i dubo pare; kadok ng’atu ma pwe de bicopo kwo kudo ngo i ceng’ m’edubo i ie.

¹³Kinde m’awacu ni ng’atu ma pwe, nia ebikwo andha; tek egeno bedopwe pare, man etimo kier, jubipoi ungo kum tic pare moko ma pwe; ento i kier pare m’ekier, ebitho i ie.

¹⁴Kendo, kinde m’awacu ni jadubo kumae, Ibitho andha; e tek eai ba dubo pare, man etimo gin ma cik uyio man atira;

¹⁵tek jadubo dwoko mukwatu, emio kendo gin m’emaku kud ayeki, ewotho i cik mi kwo, m’etimo kier moko ngo; ebikwo andha, ebitho ngo.

¹⁶Dubo pare moko m’edubo jubipoi pigi ngo i kume: etimo gin ma cik uyio man atira; ebibedo kwo andha.

¹⁷Ento nyithindho mi dhanu peri giwacu kumae, Yo pa Rwoth rom rom ungo; ento gin, yo migi rom rom ungo.

¹⁸Kinde ma ng’atu ma pwe lokre cen ku bedopwe pare, man etimo kier, ebitho i ie.

¹⁹Man kinde ma jadubo lokre cen ku dubo pare, man etimo gin ma cik uyio man atira, ebibedo kwo kudo.

²⁰Ento wuwacu kumae, Yo pa Rwoth rom rom ungo. E ot mir Israel, abipoko lembe mu kubeng’wu kubeng’wu ng’atuman calku yo pare.

²¹Man etimbre i rundi apar wi arionde mi ng’eca mwa, i dwi mir apaje, i ceng’ mir abije mi dwije, nia ng’atu acel m’uboth kud i Yerusalem bino i bang’a, m’uwacu kumae, Jugoyo adhura.

²²Nie cing’ Yehova bedo i kuma uthieno, ma fodi ng’atu m’uboth ku bino ngo; man eyabu dhoga, maram ebino ko i bang’a kugweno; e dhoga yabre, man abedo ajuba kendo ngo.

²³Man lembe pa Yehova bino i bang’a, m’uwacu kumae,

²⁴Wod dhanu, ju m’ubedo i ka mir uvuru i ng’om mir Israel giyero, giwacu kumae, Ibrahim en e acel, man emaku ng’ombe ni aba: ento wan wa dupa; ng’om bimire iwa ni aba.

²⁵Kum kumeno wac igi kumae, Rwoth Yehova wacu kumae: Wucamu ku rimo, man wuting’o weng’wu malu ba mungu m’araga mu, man wucwiro rimo: man wubibedo ku ng’ombe ni pinyi?

²⁶Wucungo wi palamularu mu, wutimo ginmajudagu, man wucido kubeng’wu kubeng’wu ng’atuman dhaku pa wadi: man wubibedo ku ng’ombe ni pinyi?

²⁷Ibiwacu igi kumae, Rwoth Yehova wacu kumae: Calu abedo ku kwo, andha ju ma ni i ka mir uvuru gibipodho ku palamularu; man ng’atu ma ni i thim ma ngbeng’ abimio ni yedi gicam; man ju ma gini i ka ma tek man i odng’om gibitho ku thong’om.

²⁸Man abidwoko ng’om ni nyoth man ni wang’uic; man kuhaya mi tego pare bijik; man gudi mir Israel bibedo ni uvuru, ketho nia ng’atu moko bikadhu kud i ie ngo.

²⁹Gibilund ng’eyo nia an a Yehova, kinde m’adwoko ng’om ni uvuru man ni wang’uic, kum ginmajudagu migi ceke ma gitimo.

³⁰Man in, wod dhanu, nyithindho mi dhanu peri giweco piri ng’et gang’kidi man i dhugola mi udi, man giyero man ni wadi man ni wadi, ku ba dhanu ceke ng’atuman ni umin mire, giwacu kumae, Wubin, akwayuwu, man wuwinj lembang’o m’uai ba Yehova.

³¹Man gibino i beng’i calu dhanu bino, man gibedo i weng’wu calu dhanu para, man giwinjo lembe peri, ento gitimogi ngo; kum ginyutho mer ma dit ku dhoggi, ento adundegi cidho tok kuloka migi.

³²Man, nen, kuno ibedo igi calu wer mi mer pa ng’atu ma dwande ber, ma copo goyo adungu ber de; kum giwinjo lembe peri, ento gitimogi ngo.

³³Man kinde ma maeni timbre kakare (nen, ebino), gibilund ng’eyo nia jabila bedo i kindgi.