Read Alur Ezekiel 34 Bible Online

Ezekiel 34 - Alur bible

Ezekiel 34

¹Man lembe pa Yehova bino i bang’a, m’uwacu kumae,

²Wod dhanu, cu lembe kum jukwac mir Israel, cu, man iwac igi, en e ni jukwac kumae, Rwoth Yehova wacu kumae: Can ni i wi jukwac mir Israel m’ukakri gigi ku cemo! maku jukwac gikak rombe ku cam ungo?

³Wucamu mio, man wuronjru ku yukrombe, wunego lim m’ucwe; ento wukaku rombe ku cemo ngo.

⁴Ma tho ni kume wumio tego ngo ire, kadi wucangu maeno ma kume lith de ngo, kadi wutwio gin m’utur de ngo, kadi wudwoko maeno ma juriemo cen de ngo, kadi wuyenyo maeno m’urwinyo de ngo; ento wubimo i wigi ku tego man ku kero.

⁵E gilal, kum jakwac umbe; man gidoko ni cemo ni yedi ceke m’i thim, e gilal.

⁶Rombe para wire kud i gudi ceke, man wi ungulu gudi kubang’e kubang’e; eyo, rombe para lal wi wang’ ng’om ceke; e ng’atu moko mbe m’uyenyo kadi m’usayu tokgi.

⁷Ka kumeno, wu jukwac, wuwinj lembe pa Yehova:

⁸Calu abedo kwo, Rwoth Yehova wacu, andha kum rombe para doko ni amaci, man rombe para doko ni cemo ni yedi ceke m’i thim, kum jakwac umbe, kadi jukwac para yenyo rombe para ngo, ento jukwac gikakri gigi ku cemo, man gikaku rombe para ku cemo ngo;

⁹ka kumeno, wu jukwac, wuwinj lembe pa Yehova:

¹⁰Rwoth Yehova wacu kumae: Nen, an a jadhu jukwac; man abilwong’o jukwac para i cing’gi, man abiketho giweko kaku rombe ku cemo; kadok jukwac de gibikakri gigi ku cemo kendo ngo; man abibodho rombe para kud i dhoggi, kara ku gibed ni cemo igi.

¹¹Kum Rwoth Yehova wacu kumae: Nen, an gira, en e an, abisayu rombe para man abiyenyo gi.

¹²Calu jakwac yenyo udul rombe pare i ceng’ m’eni i kind rombe pare m’ulal mba mba, abiyenyo rombe para kumeca; man abibodhogi kud i ka ceke ma gilal i ie i ceng’ mir afuru ma col de.

¹³Man abiwodhogi kud i kind kodhidhanu, man abicokogi kud i ng’om, abikelogi de i ng’om migi ma dhe; man abikakugi ku cam wi gudi mir Israel, dhu pi, man i ka ceke mi ng’om ma jubedo i ie.

¹⁴Abikakugi ku kakwae ma ber; man dwol migi bibedo wi gudi mi ka m’utingre mir Israel: gibivuto kuca i dwol ma ber; man gibicamu i kakwac ma mio wi gudi mir Israel.

¹⁵An gira abibedo jakwac mi rombe para, man abiketho givuto piny, Rwoth Yehova wacu.

¹⁶Abiyenyo maeno m’urwinyo, man abidwoko maeno ma juriemo woko, man abitwio maeno m’utur, man abimio tego ni maeno ma kume lith; ento m’ucwe ma jutego de abinyotho; abikakugi ku pokolembe.

¹⁷Man wun, E udul rombe para, Rwoth Yehova wacu kumae: Nen, abipoko lembe i kind rombe ku rombe, nyogi rombe ku nyogi diegi.

¹⁸Ebedo iwu ni gin ma noki ya w’ucamu i kakwac ma ber, ento w’ukow’unyono piny be ku tiendwu dong’ kakwac m’udong’i? man ya wumadhu pi ma terere, ento wukowunyotho donge m’udong’ be ku tiendwu?

¹⁹Man pi rombe para, gicamu gin ma wunyono ku tiendwu, man gimadhu gin ma wunyotho ku tiendwu.

²⁰Ka kumeno Rwoth Yehova wacu igi kumae: Nen, an, en e an, abipoko lembe kind rombe m’ucwe ku rombe m’umok.

²¹Kum wucwalu ku ng’et man ku gok, man wugudo ma weg tho ceke ku tungwu, maram wulalu kogi mba mba:

²²ka kumeno abibodho udul rombe para, man gibibedo ni amaci kendo ngo; man abipoko lembe kind rombe ku rombe,

²³Man abiketho jakwac acel i wigi, e e’oikakugi ku cam, en e jatic para ma Daudi; ebikakugi ku cemo, man ebibedo jakwac migi.

²⁴E an, an a Yehova, abibedo Mungu migi, man jatic para Daudi bibedo jaditmawijo i kindgi; an, an a Yehova, ayero maeni.

²⁵Man abitimo lembariba mi kwiocwiny kugi man abiketho yedi ma kwiny ujik kud i ng’om; e gibibedo museme i langa, man gibinindo i luli.

²⁶Man abidwokogi ni mugisa ku ka mi ng’et ungulu got para gbur; man abiketho koth m’ucore ucwi i nindone; koth m’ucore mi mugisa bibedo nuti.

²⁷Man yen m’i thim bicego nyinge, ng’om de bicego nyaine, e gibibedo museme i ng’om migi; man gibing’eyo nia an a Yehova, kinde m’aturo utwindi mi mberembere migi, man abodhogi kud i cing’ ju m’udwokogi ni ng’eca.

²⁸Man gibibedo amaci ni thek kendo ngo, kadok yedi m’i ng’om de bicamugi kendo ngo; ento gibibedo museme, man ng’atu moko mbe ma binyayu lworo i igi.

²⁹Man abiting’o igi podho mi yung, man ndru m’i ng’om bidarugi kendo ngo, kadi thek biketho lewic i kumgi kendo ngo.

³⁰E gibing’eyo nia an, an a Yehova Mungu migi, wanuti wakugi, man nia gin, ot mir Israel, gi dhanu para, Rwoth Yehova wacu.

³¹E wun wu rombe para, rombe mi kakwae para, wu dhanu, man an a Mungu mu, Rwoth Yehova wacu.