Read Alur Ezekiel 35 Bible Online

Ezekiel 35 - Alur bible

Ezekiel 35

¹Mange ke lembe pa Yehova bino i bang’a, m’uwacu kumae,

²Wod dhanu, keth weng’i kum got Seir, man ieu lembe i kume,

³man iwac ire kumae, Rwoth Yehova wacu kumae; Nen, an a jadhogi, E got Seir, man abirieyo cinga i kumi, man abidwoki ni uvuru man ni wang’uic.

⁴Abidwoko adhura peri ni uvuru man ibibedo ma juweki; e ibing’eyo nia an a Yehova.

⁵Kum ibedo kud adegi ma thum ungo, man imio nyithindho mir Israel ba tego wi palamularu i nindo mi ruvwa migi, i nindo mi kier mi kajik;

⁶ka kumeno, calu abedo kwo, Rwoth Yehova wacu, abiyiki ni rimo, man rimo bilubo toki: kum idagu rimo ngo, ka kumeno rimo bilubo toki.

⁷Ka kumeno abidwoko got Seir ni wang’uic man ni uvuru; man abikabu kud i bang’e ng’atu m’ukadhu kud i ie man ng’atu m’udwogo.

⁸Man abipong’o gudine ku ju ma junego pare: i ungulu gudi peri man i poga peri man dhu pi peri ceke gibipodho ma junego ku palamularu.

⁹Abidwoki ni uvuru ma thum ungo, man jubibedd i adhura peri de ngo; e wubing’eyo nia an a Yehova.

¹⁰Kum iwacu kumae, Thek ario maeni man ng’om ario maeni gibibedo para, e wabimwonye; ento Yehova ni kuca:

¹¹ka kumeno, calu abedo kwo, Rwoth Yehova wacu, abitimo calku ng’ecwiny peri, man calku kumira peri m’inyutho ku i adegi peri i kumgi; man abiketho ang’eira igi kinde m’abipoko lembe i wii.

¹²E ibing’eyo nia an, an a Yehova, awinjo cac peri ceke m’iyero kum gudi mir Israel, m’iwacu kumae, Judwokogi ni uvuru, jumiogi iwa ya wanyothi.

¹³Man wutingru giwu i kuma ku dhogwu, man wumedo lembe mu i kuma: awinjo maeni.

¹⁴Rwoth Yehova wacu kumae: Kinde ma anyong’a nego ng’om dho, abidwoki ni uvuru.

¹⁵Calu anyong’a negi kum aba mi ot mir Israel, kum ebedo ni uvuru, abitimo kumeca i kumi: ibibedo ni uvuru, E got Seir, kud Edom ceke, en e kare ceke; e gibing’eyo nia an a Yehova.