Read Alur Ezekiel 36 Bible Online

Ezekiel 36 - Alur bible

Ezekiel 36

¹E in, wod dhanu, cu lembe kum gudi mir Israel, man iwac kumae, Wu gudi mir Israel, wuwinj lembe pa Yehova.

²Rwoth Yehova wacu kumae: Kum jadegi wacu i kumwu kumae, Aha! man kumae, Ka ma malu ma con gi mwa mir amwonya;

³ka kumeno cu lembe, man iwac kumae, Rwoth Yehova wacu kumae: Kum, en e kum gidwokowu ni uvuru, man gimwonyowu kun ku kun, kara wubed ni piny m’amwonya ni dong’ thek m’udong’, man juting’owu malu i dendhu juwec, man rwonglembe ma rac mi dhanu;

⁴ka kumeno, wu gudi mir Israel, wuwinj lembe pa Rwoth Yehova: Rwoth Yehova wacu kumae ba gudi man bang’ ungulu gudi man ba wang’ pi ku ba poga, ba nyoth mir uvuru man bang’ adhura ma juweko, m’udoko ni amaci ku jamng’iero ni dong’ thek m’udong’ gbur;

⁵ka kumeno Rwoth Yehova wacu kumae: Andha i mac mi nyeko para ayero kum dong’ thek m’udong’, man kum Edom ceke, m’upoko ng’om para igi gigi ni piny ku mutoro mir adundegi ceke, kud adegi mi ng’eyong’ec, kara ubaye woko ni amaci.

⁶Ka kumeno cu lembe pi ng’om mir Israel, man iwac ni gudi man ni ungulu gudi, ni wang’pi man ni poga kumae, Rwoth Yehova wacu kumae: Nen, ayero i nyeko para man i kwinyo para, kum wuyeyo lewic mi thek:

⁷ka ku meno Rwoth Yehova wacu kumae: Akwong’o kwong’, m’awacu kumae, Andha thek ma ni ng’etwu gbur, gibiyeyo lewic migi.

⁸Ento wun, E gudi mir Israel, wubilodho jengwu, man wubicego nyingwu ni dhanu para Israel, kum gini ceng’ni ku bino.

⁹Kum, nen, an a jabeng’wu, man abilokra iwu, man wubibedo afura man acoya;

¹⁰man abimedo dhanu i wiwu, en e ot mir Israel ceke, kare ceke calu ebedo; man jubibedo i adhurane, man jubigomo i kar uvuru;

¹¹man abimedo dhanu ku lim i wiwu; gibinyai gibicego nying’gi de; man abiketho jubedo i wiwu calku bedo mu ma kwong’a, man abitimo ber i beng’wu ma sagu i thekri mu: e wubing’eyo nia an a Yehova.

¹²Eyo, abiketho dhanu wotho i wii, en e dhanu para Israel; man gibimwonyi, man ibibedo ni aba migi, man ibikabu nyithindho i bang’gi kendo ngo kawono cil ma cen.

¹³Rwoth Yehova wacu kumae: Kum giwacu iri kumae, In i ng’om in i jacam dhanu, man ibedo janyai can i thek peri;

¹⁴ka kumeno ibicamu dhanu kendo ngo, kadi ibinyayu can i thek peri kendo ngo, Rwoth Yehova wacu;

¹⁵kadi abiweko iwinj lewic mi thek kendo ngo, kadi ibiyeyo cac mi kodhidhanu kendo ngo, kadi ibiketho thek peri kier kendo ngo, Rwoth Yehova wacu.

¹⁶Mange ke lembe pa Yehova bino i bang’a, m’uwacu kumae,

¹⁷Wod dhanu, kinde ma ot mir Israel ubedo i ng’om migi ma dhe, gicide ku yo migi man ku giratima migi: yo migi i wang’a bedo calu cilo pa dhaku i koiri pare.

¹⁸Kum kumeno akonjo kwinyo para i wigi, kum rimo ma gikonjo woko i ng’om, man kum gicide ku mungu m’araga migi;

¹⁹man akethogi i kind thek, e julalugi i kind ng’om mba mba: apoko lembe migi calku yo migi man calku giratima migi.

²⁰Man kinde ma gibino ba thek, ka ma gicidho i ie, gicido nyinga ma leng’; kum dhanu wacu pigi kumae, Maeni dhanu pa Yehova, man giwok woko kud i ng’om pare.

²¹Ento aparu pi nyinga ma leng’, ma ot mir Israel ucido kind thek, ka ma gicidho i ie.

²²Ka kumeno wac ni ot mir Israel kumae, Rwoth Yehova wacu kumae: Atimo maeni ni kumwu ngo, E ot mir Israel, ento kum nyinga ma leng’, ma wucido i kind thek, ka ma wucidho i ie.

²³Man abidwoko nyinga ma dwong’ leng’, m’ucidre i kind thek, ma wucido i kindgi; e thek bing’eyo nia an a Yehova, Rwoth Yehova wacu, kinde m’adwokra leng’ ni kumwu i wang’gi.

²⁴Kum abikabuwu kud i kind thek, man abicokowu kud i ng’om ceke, man abikelowu i ng’om mu ma dhe.

²⁵Man abikiro pi ma leng’ i kumwu, e wubibedo leng’: abidwokowu leng’ ni cilo mu ceke, man ni mungu m’araga mu ceke.

²⁶Abimio iwu adunde ma nyen bende, man abiketho tipo ma nyen yor i iwu; man abikabu adunde mi kidi cen kud i ring’kumwu, man abimio iwu adunde mi ring’kum.

²⁷Man abiketho Tipo para i iwu, man abiketho wuwotho i cik para, man wubiworo lembapoka para, wubitimogi de.

²⁸E wubibedo i ng’om m’amio ni kwaruwu; e wubibedo dhanu para, man abibedo Mungu mu.

²⁹Man abibodhowu ni cilo mu ceke: man abilwong’o cam, abimede de, man abiketho ndru moko i kumwu ngo.

³⁰Man abinyayu nying’ mi yen, ku nyai mi podho, kara ku wujol cac mi ndru kendo kind thek.

³¹Wubilund poi kum yo mu ma rac, ku giratima mu m’ubedo ber ungo; e wubidegru giwu i weng’wu giwu kum kier mu man kum ginmajudagu mu.

³²Atimo maeni ni kumwu ngo, Rwoth Yehova wacu, wung’ei maeni: lewic unegwu man cwinywu ng’abre kum yo mu, E ot mir Israel.

³³Rwoth Yehova wacu kumae: I ceng’ m’adwokowu leng’ i ie ni kier mu ceke, abiketho jubedo i adhura, man jubigomo ka mir uvuru.

³⁴E jubifuro ng’om m’ubedo ni uvuru, kadok naka ebedo ni uvuru i wang’ dhanu ceke m’ukadhu akadha.

³⁵Man gibiwacu kumae, Ng’om maeni ma naka uvuru udoko calu podho mir Aden; man adhura m’unyothre ma ni uvuru ma juweko de judwoko tek jubedo i ie de.

³⁶Thek m’udong’ i ng’etwu gbur gibilund ng’eyo nia an, an a Yehova, agomo ka m’unyothre man apidho gin m’ubedo ni uvuru: an, an a Yehova, ayero maeni, man abitimo maeni.

³⁷Rwoth Yehova wacu kumae: Mange ke, ayio ot mir Israel upenja pi maeni ya atime igi; abinyayugi ku dhanu calu udul lim.

³⁸Calu udul lim mi lam, calu udul lim mi Yerusalem i agbane ma juketho, adhura mir uvuru bipong’ kud udul dhanu kumeca; e gibing’eyo nia an a Yehova.