Read Alur Ezekiel 37 Bible Online

Ezekiel 37 - Alur bible

Ezekiel 37

¹Cing’ Yehova ni i wia, man ewodha woko i Tipo pa Yehova, man eketha piny i die poga; man epong’ ku cogo.

²Man eketho awira i ng’etgi gbur: man, nen, cogone gi dupa dupa i podho ma ng’beng’; man nen, githwo dit.

³Man ewacu ira kumae, Wod dhanu, cogo maeni copo bedo kwo? Man aloko lembe kumae, E Rwoth Yehova, ing’eyo.

⁴Ewacu ira kumae kendo, Cu lembe wi cogo maeni, man iwac igi kumae, E wu cogo m’uthwo, wuwinj lembe pa Yehova.

⁵E Rwoth Yehova wacu kumae ni cogo maeni: Nen, abiketho yuyo mondo i iwu, e wubibedo kwo.

⁶Man abiketho ler ma tar i kumwu, man abikelo ring’kum i kumwu, man abiumo wu ku dendkum, man abiketho yuyo i iwu, e wubibedo kwo; e wubing’eyo nia an a Yehova.

⁷Kum kumeno aewo lembe calu jung’olo ira: man kan aewo lembe, badwal nuti, man, nen, digidi nuti; e cogone bino karacelo, cogo ku ba cogo wagi.

⁸Man aneno, man, nen, ler ma tar ni i kumgi, man ring’kum ubino malu, man dendkum uumogi ku malu: ento yuyo moko mbe i igi.

⁹Elund ewacu ira kumae, Cu lembe ni yamu, cu lembe, wod dhanu, man iwac ni yamu kumae, Rwoth Yehova wacu kumae: E yuyo, ai ku ba yamu ang’wen, man iyui wi ju ma junego maeni, kara gibed kwo.

¹⁰Kum kumeno aewo lembe calu eng’olo ira, man yuyo bino i igi, e gibedo kwo, man gicungo malu wi tiendgi, njuru asikari ma dit apila.

¹¹Elund ewacu ira kumae, Wod dhanu, cogo maeni gi ot mir Israel dho, nen, giwacu kumae, Cogo mwa tal, man genogen mwa rwinyo; jung’olowa kot.

¹²Ka kumeno cu lembe, man iwac igi kumae, Rwoth Yehova wacu kumae: Nen, abiyabu liel mu, man abiketho wuai malu kud i liel mu, E dhanu para; man abikelowu i ng’om mir Israel.

¹³Man wubing’eyo nia an a Yehova, kinde m’ayabu liel mu, man aketho wuai malu kud i liel mu, E dhanu para.

¹⁴Man abiketho Tipo para i iwu, e wubibedo kwo, man abikethowu i ng’om mu ma dhe: e wubing’eyo nia an, an a Yehova, ayero maeni man atime, Yehova wacu.

¹⁵Lembe pa Yehova bino kendo i bang’a, m’uwacu kumae,

¹⁶E in, wod dhanu, gam iri yen acel, man igor i wie kumae, Pi Yuda, man pi nyithindho mir Israel ma ging’io kugi: ilund igam yen mange, man ikieu i wie kumae, Pi Yusuf, yen pa Efraim, man pi ot mir Israel ceke ma wedine:

¹⁷Man iribgi iri acel kum wadi gibed yen acel, kara gidok acel i cingi.

¹⁸Man kinde ma nyithindho mi juthu biweco i beng’i, biwacu kumae, Ibinyutho iwa thelembe mi gin maeni ngo?

¹⁹wac igi kumae, Rwoth Yehova wacu kumae: Nen, abigamu yen pa Yusuf, ma ni i cing Efraim, man suru mir Israel ma wedine; man abikethogi karacelo kude, karacelo ku yen pa Yuda, man abidwokogi yen acel, e gibidoko acel i cinga.

²⁰Man yen m’igoro i wie bibedo i cingi i wang’gi.

²¹Man iwac igi kumae, Rwoth Yehova wacu kumae: Nen, abigamu nyithindho mir Israel kud i kind thek, ka ma gicidho i ie, man abicokogi i ng’et ceke kun ku kun, man abikelogi i ng’om migi ma dhe:

²²man abidwokogi ni thek acel i ng’om, wi gudi mir Israel; man ubimo acel bibedo ubimo migi ceke; e gibibedo thek ario kendo ngo, kadi gibipokri ker ario kendo ki ngo;

²³kadi gibicidri gigi kendo ngo ku mungu m’araga migi, kadi ku gin migi ma judagu, kadi ku dubo migi moko; ento abibodhogi kud i kabedo migi ceke, ka ma gidubo i ie, man abidwokogi leng’: kum kumeno gibibedo dhanu para, man abibedo Mungu migi.

²⁴Man jatic para ma Daudi bibedo ubimo i wigi; man kagi ceke gibibedo ku jakwac acel: gibiwotho i lembapoka para bende, man gibiworo cik para, gibitimogi de.

²⁵Man gibibedo i ng’om m’amio ni Yakobo ma jatic para, ka ma kwaruwu bedo i ie; e gibibedo i ie, gin, ku nyithindho migi, man nyithindho mi nyithindho migi, mi nja: man Daudi ma jatic para bibedo jaditmawijo migi mi nja.

²⁶Mange ke abitimo lembariba mi kwiocwiny kugi: ebibedo lembariba mi nja kugi; man abikethogi, abimedogi de, man abiketho kamaleng’ para i kindgi mi nja.

²⁷Hema para bende bibedo karacelo kugi; man abibedo Mungu migi, man gibibedo dhanu para.

²⁸E thek bing’eyo nia an a Yehova m’udwoko Israel leng’, kinde ma kamaleng’ para bibedo i kindgi mi nja.