Read Alur Ezekiel 38 Bible Online

Ezekiel 38 - Alur bible

Ezekiel 38

¹Man lembe pa Yehova bino i bang’a, m’uwacu kumae,

²Wod dhanu, keth weng’i yo ba Gog, i ng’om mi Magog, en e jaditmawijo mi Roc, man Mecek, man Tubal, man ieu lembe i kume,

³man iwac kumae, Rwoth Yehova wacu kumae: Nen, an a jadhogi, E Gog, m’i jaditmawijo mi Roc, ku Mecek, man Tubal:

⁴man abiloki cen, abiketho gol i lwoknini de, man abiwodhi woko, ku njuru asikari peri ceke, riuni man weg riuni, kagi ceke m’uronjre ku jambali kwa, njuru dhanu ma dit ku thungu man ban, kagi ceke ma gimaku palamularu,

⁵Ajemi, man Kuc, ku Put karacelo kugi, kagi ceke ku ban, man gali m’i wie;

⁶Gomer, kud udul pare ceke; ot mi Togarma i ng’et ng’om ma wi tung’ mi yor ariwa ma malu, kud udul pare ceke; en e kodhidhanu dupa karacelo kudi.

⁷Bed ayika, eyo, yikri giri, in, ku njuru dhanu peri ceke m’ucokri i beng’i, man ibed jagwok migi.

⁸Yo ng’ei nindo dupa jubiliewi: i rundi ma cen ibibino i ng’om ma judwoko ku ba palamularu, ma jucoko ku kind kodhidhanu dupa, wi gudi mir Israel, ma bedo ni uvuru thiri thiri; ento juwodhe woko ku kind kodhidhanu, man gibibedo museme, kagi ceke.

⁹Man ibiidho malu, ibibino calu wavuvu, ibibedo calu afuru ma umo ng’om, in, kud udul peri ceke, man kodhidhanu dupa karacelo kudi.

¹⁰Rwoth Yehova wacu kumae: Ebitimbre i ceng’ maeca, nia gin moko biwok i pidoii, man ibiporo lembapora ma rac:

¹¹man ibiwacu kumae, Abiidho malu ba ng’om mi pacu ma gang’kidi mbe kude; abicidho ba ju m’uyom, m’ubedo museme, kagi ceke m’ubedo ma gang’ umbe, man m’ubedo kud utwindi kadi dhugang’ de ngo;

¹²kara uyak ayeki man kara ugam amaci; kara ilok cingi ka mir uvuru ma jubedo i ie kawono, man kum dhanu ma jucoko kud i thek, m’ulimo lim ku piny, man m’ubedo i die ng’om.

¹³Ceba, man Dedan, ku jukuloka mi Tarcic, karacelo ku nyithindh umvor m’aradune ceke, gibiwacu iri kumae, Ibino kara iyak ayeki? icoko njuru dhanu peri kara igam amaci? kara igam mola ma tar ku mola ma kwar, kara igam lim ku piny, kara iyak ayeki ma diti?

¹⁴Ka kumeno, wod dhanu, cu lembe, man iwac ni Gog kumae, Rwoth Yehova wacu kumae: I ceng’ maeca kinde ma dhanu para Israel ubedo museme, ibing’eyo maeni ngo?

¹⁵Man ibiai ku i kakeri kud i ng’et ng’om ma wi tung’ mi yor ariwa ma malu, in, ku kodhidhanu dupa wu kugi kagi ceke ma giwotho ku wi riuni, njuru dhanu ma dit ku njuru asikari ma tek;

¹⁶man ibibino malu kum dhanu para Israel, calu afuru m’uumo ng’om: ebitimbre i nindo ma cen, nia abikeli kum ng’om para, kara thek ung’eya, kinde m’adwokra leng’ ni kumi, E Gog, i wang’gi.

¹⁷Rwoth Yehova wacu kumae: In i ng’atu m’ayero pire i nindo ma con ku dhu jutic para ma jubila mir Israel, m’uewo lembe i nindo maeca mi rundi dupa nia abikeli i kumgi?

¹⁸Man ebitimbre i ceng’ maeca, kinde ma Gog bibino kum ng’om mir Israel, Rwoth Yehova wacu, nia kwinyo para bibino malu i odiuma.

¹⁹Kum i nyeko para man i mac mi kwinyo para ayero kumae, Andha i ceng’ maeca yengri ma dit bibedo nuti i ng’om mir Israel;

²⁰ketho nia rec m’i nam, ku winyo ma kor polo, man yedi m’i thim, ku gin ceke ma lak wi ng’om, ku dhanu ceke ma gini wi wang’ ng’om, kumgi bimiel yor i wang’a, man jubiredho gudi piny, ka ma lung’ de bipodho, man gang’kidi ceke kubang’e kubang’e bipodho i ng’om.

²¹Man abilwong’o palamularu ubin ba gudi para ceke i wie, Rwoth Yehova wacu: palamularu ceke kubang’e kubang’e man bibedo kum umin mire.

²²Man abimondo i pokolembe kude ku thong’om man ku rimo; man abicoro koth i wie, man wi udul pare, man wi kodhidhanu dupa ma gini kude, koth m’ucore ma dit, ku pei ma dit, man mac, ku muganga.

²³Man abiyungra gira, man abidwokra gira leng’ e abiketho ang’eira i wang’ thek dupa; e gibing’eyo nia an a Yehova.