Read Alur Ezekiel 39 Bible Online

Ezekiel 39 - Alur bible

Ezekiel 39

¹Man in, wod dhanu, cu lembe kum Gog, man iwac kumae, Rwoth Yehova wacu kumae: Nen, an a jadhogi, E Gog, jaditmawijo mi Roc, ku Mecek, man Tubal:

²man abiloki cen, man abitelo wii, man abiketho iidh malu ku ba ng’et ng’om ma wi tung’ mi yor ariwa ma malu; man abikeli wi gudi mir Israel;

³man abigoyo atum peri kud i cingi ma yor acam, man abiketho athero peri upodh kud i cingi ma yor acwic.

⁴Ibipodho wi gudi mir Israel, in, kud udul peri ceke, man kodhidhanu ma gini kudi: abimii ba winyo ma kwonde tung’ tung’ ma gi lwal, man ba yedi m’i thim kara gicemi.

⁵Ibipodho wi thim ma ngbeng’: kum ayero maeni, Rwoth Yehova wacu.

⁶Man abioro mac wi Magog, man wi ju m’ubedo museme i cula; e gibing’eyo nia an a Yehova.

⁷Man abiketho nyinga ma leng’ ung’eire i kind dhanu para Israel; kadi abiyio jucido nyinga ma leng’ kendo ngo: thek bing’eyo nia an a Yehova, Ng’atu Maleng’ mir Israel.

⁸Nen, ebino, man ebitimbre, Rwoth Yehova wacu; maeni ceng’ m’ayero pire.

⁹Man ju m’ubedo i adhura mir Israel biwok woko, man gibitimo mac ku jamblwiny man gibiwang’ugi, ban ku thungu bende, atom kud athero, man yen mi cing’, ku tong’, man gibitimo kugi mac rundi abiro;

¹⁰ketho nia gibigamu yen moko ngo kud i thim, kadi gibing’olo moko ngo kud i luli; kum gibitimo mac ku jamblwiny; e gibimayu ju m’umayu i bang’gi, man gibiyaku ju m’uyakugi, Rwoth Yehova wacu.

¹¹Man ebitimbre i ceng’ maeca, nia abimio ka mi yik i Israel ni Gog, en e poga mi ju m’ukadhu yo ng’et nam ma yo nyangu; man ebijigo ju m’ukadhu akadha: e gibiyiko Gog kud udul pare ceke keca; man gibilwong’e Poga mi Hamon-gog.

¹²Man dwi abiro bikadhu ma ot mir Israel ubeyikogi i ie, kara gidwok ng’om leng’.

¹³Eyo, dhanu ceke m’i ng’ombe biyikogi; man ebibedo igi ni yung i ceng’ m’ayungra gira i ie, Rwoth Yehova wacu.

¹⁴Man gibikoyo dhanu mi tic ma thiri thiri ma bikadhu kud i ng’ombe, man, karacelo ku ju m’ukadhu akadha, gi ju m’uyiko ju m’udong’ wi wang’ ng’om, kara udwoke leng’; yo ng’ei kajik mi dwi abiro gibiyenyo ayenya.

¹⁵Man ju m’ukadhu kud i ng’ombe gibikadhu akadha; man kinde ma ng’atu moko neno cogo dhanu, ebilund ketho giranyutha i kume, maram juyik uyike ko i poga mi Hamon-gog.

¹⁶Man Hamona bende bibedo nying adhura. Gibidwoko ng’ombe leng’ kumeni.

¹⁷Man in, wod dhanu, Rwoth Yehova wacu kumae: Yer ni winyo ma kwonde tung’ tung’, man ni lim ceke kubang’e kubang’e m’i thim kumae, Wucokru giwu, man wubin; wucokru giwu kun ku kun ba lam para m’alamu piwu, en e lam ma dit wi gudi mir Israel, kara wucam ring’o man wumadh rimo.

¹⁸Wubicamu ring’o mi jutego, man wubimadhu rimo mi judongomawijo m’i ng’om, mi nyogi rombe, mi nyithi rombe, man mi diegi, mi thwoni dhiang’, kagi ceke lim ma mio mi Bacan.

¹⁹Man wubicamu mio maram wuyeng’ ko, man wubimadhu rimo maram wumer ko, mi lam para m’alamu piwu.

²⁰Man wubiyeng’ dhu mesa para ku riuni man magali, ku jutego, man ku dhanu ceke mir ali, Rwoth Yehova wacu.

²¹Man abiketho dwong’ para i kind thek; man thek ceke bineno lembapoka para m’atimo, man cinga m’aketho i kumgi.

²²Kum kumeno ot mir Israel bing’eyo nia an a Yehova Mungu migi, ugambre i ceng’ maeno ku m’ucikulube.

²³E thek bing’eyo nia ot mir Israel ucidho i ng’eca kum kier migi; kum gidubo ira, man apanu wang’a igi: kum kumeno amiogi i cing’ jusendgi, man gipodho kagi ceke ku palamularu.

²⁴Atimo igi calku cilo migi man calku dubo migi; man apanu wang’a igi.

²⁵Ka kumeno Rwoth Yehova wacu kumae: Kawono abidwoko ng’eca pa Yakobo, man kisa binega kum ot mir Israel dho; man nyeko bitima kum nyinga ma leng’.

²⁶Man gibiyeyo lewic migi, ku dubo migi ceke ma gidubo ko ira, kinde ma gibibedo museme i ng’om migi, man ng’atu moko mbe ma binyayu lworo i igi;

²⁷kinde m’awodhogi ku kind kodhi dhanu adwokogi, man acokogi kud i ng’om mi judegi migi, man adwokra leng’ ni kumgi i wang’ thek dupa.

²⁸E gibing’eyo nia an a Yehova Mungu migi, kum aketho gicidho i ng’eca i kind thek, man acokogi ba ng’om migi ma dhe; man abiweko moko m’i kindgi kuca kendo ngo;;

²⁹kadi abipanu wang’a kendo ngo igi; kum akonjo Tipo para wi ot mir Israel, Rwoth Yehova wacu.