Read Alur Ezekiel 4 Bible Online

Ezekiel 4 - Alur bible

Ezekiel 4

¹In bende, wod dhanu, gam iri biriki, man ikethe i weng’i, man ikieu adhura i wie, en e Yerusalem:

²man iketh atiek i kume, man igom ka ma tek mir ali i kume, man idhur ng’om i kume; keth hema bende i kume, man iketh jamb rwombo piny i kume gbur.

³Man igam iri atangla mi nyunyu, man ikethe ni gang’ mi nyunyu i kindwu wukud adhurane: man iketh weng’i yor i bang’e, e ebibedo i atiek, man ibicere kud atiek. Maeni bibedo ni giranyutha ni ot mir Israel.

⁴Mange ke ivut wi ng’eti ma yor acam, man iketh kier mi ot mir Israel i wie; ibiyeyo kier migi, calu wel ceng’ m’ibivuto ieiwie.

⁵Kum aketho rundi mi kier migi ubed iri ni wel mi ceng’, en e ceng’ dak adek ku pier abung’wen: e ibiyeyo kier mi ot mir Israel kumeno.

⁶Man kendo, kinde m’idaru maeni, ibivuto wi ng’eti ma yor acwic, man ibiyeyo kier mi ot pa Yuda: ceng’ pier ang’wen, ceng’ kubang’e kubang’e mi rundi, akethe iri.

⁷Man ibiketho weng’i yo bang’ atiek mi Yerusalem, ku boti ma ngbeng’; man ibiewo lembe i kume.

⁸Man, nen, aketho twic i kumi, man ibilokri ngo wi ng’eti kucel ba mucelo, maram ibidaru ko ceng’ mir atiek peri.

⁹Gam iri nganu bende, ku nganu ma tung’ man ng’or, ku nyamunguk, man bel, ku kal, man ikethgi i agulu acel, man itim kudo kwen iri; ibicamu kume moko, calku wel ceng’ m’ibivuto ie wi ng’eti, en e ceng’ dak adek ku pier abung’wen.

¹⁰Man cemo peri m’ibicamu bibedo apora, cekel pier ario mi ceng’ acel: ibicame ku ba nindo ku ba nindo.

¹¹Man ibimadhu pi ku mukero, ng’ete mir abusiende ma i alibi: ibimadhe ku ba nindo ku ba nindo.

¹²Man ibicame calu kwen m’apada mi nganu ma tung’, man ibitede i wang’gi ku ceth dhanu.

¹³Man Yehova wacu kumae, Nyithindho mir Israel bicamu kwen migi m’ecido kumeni, i kind thek m’abiriemogi i ie.

¹⁴Alund awacu kumae, A Rwoth Yehova! nen, ng’eyong’ec para fodi ucidre ngo; kum ugambre i aradu para cil kawono fodi acamu kum gin m’utho kende gire ngo, kadi ma yedi yeco; kadok ring’o ma judagu de mondo i dhoga ngo.

¹⁵Elund ewacu ira kumae, Nen, amio iri weyo dhiang’ ka ceth dhanu, man ibiyiko kwen peri i wie.

¹⁶Mange ke ewacu ira kumae, Wod dhanu, nen, abituro jamjeng’ mi kwen i Yerusalem: man gibicamu kwen apora, man ku lworo; man gibimadhu pi ku mukero, man kud ang’abacwiny:

¹⁷kara can kwen uneggi ku pi de, man kara cwinygi ng’abre man ku wadi man ku wadi, man githum woko i kier migi.