Read Alur Ezekiel 40 Bible Online

Ezekiel 40 - Alur bible

Ezekiel 40

¹I rundi pier ario wi abije mi ng’eca mwa, i thekri mi rundine, i ceng’ mir apaje mi dwi, i rundi apar wi ang’wende yo ng’ei goyo adhura, i ceng’ maeno nino, cing Yehova ni i wia, man etera kuca.

²I ginmawokiwang’ pa Mungu etera i ng’om Israel, man eketha piny wi got ma wiu dit, ka ma giratada mir adhura ni i wie yor ariwa ma piny.

³Man etera kuca; man, nen, dhanu nuti, ma nenne calu nen mi mola, ku thol mi pamba i cinge, ku bol mi poropiny; man ecungo i dhugang’.

⁴E dhanune wacu ira kumae, Wod dhanu, nen ku weng’i, man iwinj ku ithi, man iketh cwinyi kum gin ceke m’abinyutho iri; kum jukeli kuni kara anyuthgi iri: yer gin ceke m’ineno ni ot mir Israel.

⁵Man nen, gang’kidi m’utiekn ot yo woko gbur, man bol mi poropiny ni i cing’ ng’atuca ma kaborne bot abusiel, fili bot man laccing’ kubang’e kubang’e: kum kumeno eporo kalac mi ot, bot acel; man kadongone, bot acel.

⁶Elund ebino ba dhugang’ ma nen yo nyangu, man cidho giratadane: man eporo riu mi dhugang’, kalacne bol acej; man riu mucelo, kalacne bol acel.

⁷Man kusika mi kur kubang’e kubang’e kaborne bol acel, man kalacne bol acel; man ka ma thwolo i kind kusika mi kur bot abic; man riu mi dhugang’ i ng’et pondot yo ba ot en e bol acel.

⁸Eporo pondot bende mi dhugang’ yo ba ot, bol acel.

⁹Elund eporo pondot mi dhugang’, bot abora; man mbegine, bot ario; man pondot mi dhugang’ eni yo ba ot.

¹⁰Man kusika mi kur mi dhugang’ yo nyangu gin adek i ng’ete ma yo kucel, man adek i ng’ete mucelo; gin adek gi mi por acel: man mbegine gi mi por acel i ng’ete ma yo kucel, man i ng’ete mucelo.

¹¹Man eporo kalac mi kamondo mi dhugang’, bot apar; man kabor mi dhugang’, bot apar wi adek;

¹²man apoka, i wang’ kusika mi kur, bot acel i ng’ete acel man apoka, bot acel i ng’ete mucelo; man kusika mi kur, bot abusiel i ng’ete kucel, man bot abusiel i ng’ete mucelo.

¹³Man eporo dhugang’ ugambre kum dhu wi ot mi kusika mi kur acel utundo kum dhu wi ot mi mucelo, kalacne bot pier ario wi abic; dhugola kum dhugola.

¹⁴Etimo mbegi bende, bot pier abusiel; man lelagang’ utundo kum mbegine, utieko dhugang’ gbur.

¹⁵Man ugambre i wang’ dhugang’ i kamondo utundo i wang’ pondot ma yor i ie mi dhugang’ne en e bol pier abic.

¹⁶Man wang’ot m’ubedo acika ni ba kusika mi kur, man ba mbegine ma yo i dhugang’ gbur, man ba gin m’ugure bende kumeca; man wang’ot ni yor i ie gbur; man thith ni wi mbegi kubang’e kubang’e.

¹⁷Elund etera i lelagang’ ma yo woko; man nen, kusika nuti man ka m’athora, ma jutimo ni lelagang’ gbur: kusika pier adek ni wi ka m’athora.

¹⁸Man ka m’athora ni i ng’et dhugang’, m’ulokre yo ba kabor mi dhugang’, en e ka m’athora ma yo piny.

¹⁹Elund eporo kalacne ugambre i dhugang’ ma yo piny cil kum wang’ lelagang’ ma yor i ie ma yo woko, bot dak acel, yo nyangu man yor ariwa ma malu bende.

²⁰Man dhugang’ mi lelagang’ ma yo woko ma neno yor ariwa ma malu, eporo kaborne ku kalacne.

²¹Man kusikane mi kur gin adek i ng’ete kucel man adek i ng’ete mucelo; man mbegine ku gin m’ugurene lubo tok por mi dhugang’ ma kwong’ane: kaborne bot pier abic, man kalacne bot pier ario wi abic.

²²Man wang’ode, ku gin m’ugurene, ku thithne, gilubo tok por mi dhugang’ ma neno yo nyangu; man giidho malu i bang’e ku giratada abiro; man m’ugurene ni i wang’gi.

²³Man dhugang’ nuti i kum lelagang’ ma yor i ie yo ba dhugang’ mucelo yor ariwa ma malu ku yo nyangu bende; man eporo ugambre kum dhugang’ utundo kum dhugang’ bot dak acel.

²⁴Man etera yor ariwa ma piny, man, nen, dhugang’ nuti m’ulokre yor ariwa ma piny: man eporo mbegine ku gin m’ugurene calku por maeni.

²⁵Man wang’ot ni i ie man i gin m’ugurene gbur, calu wang’ot maeno: kaborne bot pier abic, man kalacne bot pier ario wi abic.

²⁶Man giratada abiro nuti ma idho i bang’e, man gin m’ugurene ni i wang’gi; man ebedo ku thith, acel i ng’ete kucel, man mange, i ng’ete mucelo, wi mbegine.

²⁷Man dhugang’ nuti kum lelagang’ ma yor i ie yor ariwa ma piny: man eporo ugambre i dhugang’ utundo kum dhugang’ ma yor ariwa ma piny bot dak acel.

²⁸Elund etera ba lelagang’ ma yor i ie i ng’et dhugang’ ma yor ariwa ma piny: man eporo dhugang’ ma yor ariwa ma piny calku por maeni;

²⁹man kusika mi kume, ku mbegine, man gin m’ugurene, calku por maeni: man wang’ot ni i ie man i gin m’ugurene, calku por maeni: man wang’ot ni i ie man i gin m’ugurene gbur; kaborne bot pier abic, man kalacne bot pier ario wi abic.

³⁰Man gin m’ugurene nuti gbur, kadongone bot pier ario wi abic, man kalacne bot abic.

³¹Man gin m’ugurene gilokri yo ba lelagang’ ma yo woko; man thith ni wi mbegine: man kaidho i bang’e bedo ku giratada abora.

³²Man etera i lelagang’ ma yor i ie yo nyangu: man eporo dhugang’ calku por maeni;

³³man kusika mi kurne, ku mbegine, ku gin m’ugurene, calku por maeni; man wang’ot ni i ie man i gin m’ugurene gbur; kaborne bot pier abic, man kalacne pier ario wi abic.

³⁴Man gin m’ugurene gini yo ba lelagang’ ma yo woko, man thith ni wi mbegine, i ng’ete kucel, man i ng’ete mucelo: man kaidho i bang’e bedo ku giratada abiro.

³⁵Man etera ba dhugang’ ma yor ariwa ma malu: man epore calku por maeni;

³⁶kusika mi kume, ku mbegine, man gin m’ugurene: man wang’ot ni i ie gbur; kadongone bot pier abic, man kalacne bot pier ario wi abic.

³⁷Man mbegine gini yo ba lelagang’ ma yo woko; man thith ni wi mbegine, wi ng’ete kucel, man wi ng’ete mucelo: man kaidho m’i bang’e bedo ku giratada abora.

³⁸Man kusika ku dhugolane ni i ng’et mbegi kum dhugang’; gilwoko lam m’awang’a keca.

³⁹Man i pondot mi dhugang’ mesa ario nuti i ng’ete kucel, man mesa ario i ng’ete mucelo, kara juthum lam m’awang’a ku lam mi dubo ku lam mi kier i wie.

⁴⁰Man i ng’ete acel yo woko, i kaidho mi kamondo mi dhugang’ yor ariwa ma malu, mesa ario nuti; man mesa ario ni i ng’ete mucelo, ma mi pondot mi dhugang’.

⁴¹Mesa ang’wen ni i ng’ete kucel, man mesa ang’wen ni i ng’ete mucelo, i ng’et dhugang’; mesa abora, ma githumo lam i wie.

⁴²Man mesa ang’wen nuti mi lam m’awang’a, mi kidi m’apaya, kaborne bot acel ku katumbla, man kalacne bot acel ku katumbla, man kadongone bot acel; ka ma giketho i wie jamthum mi lam m’awang’a ku lam,

⁴³Man gol, kadongone laccitig’, jung’abu yor i ie gbur: man ring’o mi girathiera ni wi mesane.

⁴⁴Man kusika mi juwer ni i lelagang’ ma yor i ie yo woko, ni i dhugang’ ma yor i ie, ma ni i ng’et dhugang’ ma yor ariwa ma malu; man gineno yor ariwa ma piny; acel i ng’et dhugang’ ma yo nyangu ma neno yor ariwa ma malu.

⁴⁵Man ewacu ira kumae, Kusika maeni, ma neno yor ariwa ma piny, en e mi julam, jugwok mi kur mi ot,

⁴⁶man kusika ma neno yor ariwa ma malu, en e mi julam, jugwok mi kur mi pemblam: maeni gi wot Zadok, ma kud i kind wot Lawi gibino ceng’ni ba Yehova kara gitim ire.

⁴⁷Man eporo lelagang’, kaborne bot dak acel, man kalacne bot dak acel, ng’ete ang’wen rom rom; man pemblam ni i nyim ode.

⁴⁸Elund etera ba pondot mi ode, man eporo mbegi mi pondot kubang’e kubang’e, bot abic i ng’ete kucel, man bot abic i ng’ete mucelo: man kalac mi dhugang’ en e bot adek i ng’ete kucel, man bot adek i ng’ete mucelo.

⁴⁹Kabor mi pondode bot pier ario, man kalacne bot apar wi acel: en e ku raidh ma giidho ko malu i bang’e: man mbegi ma dit ni i ng’et mbegi, acel i ng’ete kucel, man i ng’ete mucelo.