Read Alur Ezekiel 41 Bible Online

Ezekiel 41 - Alur bible

Ezekiel 41

¹Man etera ba hekalu, man eporo mbegi, kalacne bot abusiel i ng’ete kucel, man kalacne bot abusiel i ng’ete mucelo, ma en e kalac mi hema.

²Man kalac mi kamondo en e bot apar; man ng’et kamondo en e bot abic i ng’ete kucel, man bot abic i ng’ete mucelo: man eporo kaborne, bot pier ang’wen, man kalacne, bot pier ario.

³Elund emondo yor i ie, man eporo mbegi kubang’e kubang’e mi kamondo, bot ario; man kamondo, bot abusiel; man kalac mi kamondo, bot abiro.

⁴Man eporo kaborne, bot pier ario, man kalacne, bot pier ario, i wang’ hekalu: man ewacu ira kumae, Maeni kamaleng’ m’usagu.

⁵Man eporo kor ode, bot abusiel; man kalac mi kusika mi ng’ete kubang’e kubang’e, bot ang’wen, kum ot gbur mi ng’ete kun ku kun.

⁶Man kusika mi ng’ete ni wi wadi adek, acel wi wadi acel wi wadi, man pier adek i kakare; man gimondo i kor ot ma mi ot mi kusika m’i ng’ete gbur, kara gimoki, man ku gimok i kor ode.

⁷Man kusika m’i ng’ete medo lacne ka gitieko ode ku malu ku malu; kum tiek mi ode cidho malu ku malu gbur kum ode: ka kumeno kalac mi ode cikumedre ku malu; e kumeno juidho malu ugambre kum kusika ma yo piny cil kum ma malu ku kusika m’i diere.

⁸Aneno bende nia ode bedo ku there m’utingre malu gbur: the kusika mi ng’ete en e bol dho mi bot abusiel ma dit.

⁹Ka thuth mi kor ode, ma en e mi kusika mi ng’ete, yo woko, en e bot abic; man maeno m’udong’ en e ka mi kusika mi ng’ete ma mi ode.

¹⁰Man i kind kusika kaka nuti mi bot pier ario m’utieko ot gbur kun ku kun.

¹¹Man dhugola mi kusika mi ng’ete ni yo ba ka m’udong’, dhugola acel yor ariwa ma malu, man dhugola acel yor ariwa ma piny: man kalac mi ka m’udong’ en e bot abic gbur.

¹²Man giragoma ma ni i wang’ ka m’ukoc i ng’ete ma yo reto kalacne bot pier abiro; man kor giragomane kathuthne bot abic gbur, man kaborne bot pier abung’wen.

¹³Kum kumeno eporo ode, kaborne bot dak acel; man ka m’ukoc, ku giragoma, ku kore, kaborne bot dak acel;

¹⁴kalac mi nyim ode bende, man mi ka m’ukoc yo nyangu, bot dak acel.

¹⁵Man eporo kabor mi giragoma i wang’ ka m’ukoc ma ni i ng’eye, man pondo de ma ku malu i ng’ete kucel man i ng’ete mucelo, bot dak acel; man hekalu ma yor i ie, ku pondot mi lelagang’;

¹⁶riu, man wang’ot m’ubedo acika, man pondot ma ku malu gbur wi ot ma malune adek, yo kum riune, ma jumwono ku yen gbur, man ugambre i ng’om cil kum wang’ot ma malu (nie wang’otne bedo auma),

¹⁷cil kum ka ma malu wi dhugola, en e kum ot ma yor i ie, man yo woko, man kum kor ode ceke gbur yor i ie man yo woko, ku por.

¹⁸Man jutime ku kerubi man ku thith; man thith ni i kind kerubi ku kerubi, man kerubi kubang’e kubang’e man ubedo ku wang’e ario;

¹⁹ketho nia wang’ dhanu ni yo ba thith i ng’ete kucel, man wang’ nyathin umvor m’aradu ni yo ba thith i ng’ete mucelo. Jutime kumeca i ot ceke gbur:

²⁰ugambre i ng’om utundo malu wi dhugola jutimo kerubi man thith; kor hekalu bedo kumeni.

²¹Pi hekalu, jutimo dhu ng’et dhugolane rom rom; man pi wang’ kamaleng’, nenne calu nen mi hekalu.

²²Pemblam en e mi yen, kadongone bot adek, man kaborne bot ario; man gunde, ku kaborne, ku kore, en e mi yen: man ewacu ira kumae, Maeni mesa ma ni i wang’ Yehova.

²³Man hekalu ku kamaleng’ ubedo ku dhugola ario.

²⁴Man dhugolane bedo ku bau ario ario, bau ario ma lokre: bau ario mi dhugola kucel, man bau ario mi dhugola mucelo.

²⁵Man jutimo i wie, i wi dhugola mi hekalu, ayi kerubi ku thith, calu ma jutimo wi kor ode; man riu mi yen ni wi wang’ pondot yo woko.

²⁶Man wang’ot m’ubedo acika ku thith ni i ng’ete kucel man i ng’ete mucelo, i ng’et pondode: kusika mi ng’et ode, man riu ubedo kumeni.