Read Alur Ezekiel 42 Bible Online

Ezekiel 42 - Alur bible

Ezekiel 42

¹Elund etera woko i lelagang’ ma yo woko, yo ba yor ariwa ma malu: man etera i kusika ma ni yor i wang’ ka m’ukoc, man ma ni yor i wang’ giragoma yor ariwa ma malu.

²I wang’ kabor mi bot dak acel en e dhugola ma yor ariwa ma malu, man kalacne en e bot pier abic.

³I wang’ bot pier ario ma mi lelagang’ ma yor i ie, man ma yor i wang’ ka m’athora ma mi lelagang’ ma yo woko, ni i kum pondode ma ku malu i wang’e adek.

⁴Man yo ma kalacne bot apar ni i wang’ kusika yor i ie, en e yo mi bot acel; man dhugolane gini yor ariwa ma malu.

⁵Nie kusika ma yo malune gin adundo moko; kum ponde ma ku malu gikabu ku ba maeni, ma sagu ma ba ma piny ku m’i diere, i giragomane.

⁶Kum gini i ode ma malu adek, man gibedo ku mbegi ngo calu mbegi mi lelagang’: ka kumeno ma malu bedo diny ma sagu ma yo piny ku m’i diere ugambre i ng’om.

⁷Man gang’ ma ni yo woko kum ng’et kusika, yo ba lelagang’ ma yo woko i wang’ kusika, kaborne bot pier abic.

⁸Kum kabor mi kusika ma ni i lelagang’ ma yo woko en e bot pier abic: man, nen, bot dak acel ni i wang’ hekalu.

⁹Man ku the kusika maeni kamondo nuti i ng’ete ma yo nyangu, ka jumondo i igi kud i lelagang’ ma yo woko.

¹⁰Kusika nuti i kathuth mi gang’ mi lelagang’ yo nyangu, i wang’ ka m’ukoc, man i wang’ giragoma.

¹¹Man yo mi wang’gi en e calu nen mi yo mi kusika ma ni yor ariwa ma malu; calku kaborne e kalacne de bedo kumeca: man kawokne gi calu ayine, man calu dhugolane.

¹²Man calku dhugola mi kusika ma ni yor ariwa ma piny e dhugola nuti i wi yo, en e yo ndhu i wang’ gang’ ma yo nyangu, ka jumondo i igi.

¹³Elund ewacu ira kumae, Kusika ma yor ariwa ma malu, man kusika ma yor ariwa ma piny, ma ni i wang’ ka m’ukoc, gi kusika ma leng’, ka ma julam ma ni ceng’ni kum Yehova bicamu ie gin ma leng’ m’usagu: gibiketho gin ma leng’ m’usagu kuca, ku lam mi mogo, man lam mi dubo, man lam mi kier; kum kakeca e leng’.

¹⁴Kinde ma julam gimondo, gibilund wok woko kud i kamaleng’ i lelagang’ ma yo woko ngo, ento gibiketho kendi migi ma gironyo ka gitimo giratima kuca: kum gi leng’: man gibironyo kendi mange, man gibibino ba gin ma mi dhanu.

¹⁵Nie kinde m’edaru poro ot ma yor i ie, ekela woko ba dhu yo mi dhugang’ ma neno yo nyangu, man epore gbur.

¹⁶Eporo ng’ete ma yo nyangu ku bol mi por upodho bol dak abic, ku bol mi por gbur.

¹⁷Eporo ng’ete ma yor ariwa ma malu bol dak abic ku bol mi por gbur.

¹⁸Eporo ng’ete ma yor ariwa ma piny bol dak abic ku bol mi por.

¹⁹Elokre ba ng’ete ma yo reto, man eporo bol dak abic ku bol mi por.

²⁰Epore i ng’ete ang’wen: ebedo ku gang’kidi gbur, kaborne bol dak abic, man kalacne de bol dak abic, kara utim apoka i kind gin ma leng’ ku gin ma sai.