Read Alur Ezekiel 43 Bible Online

Ezekiel 43 - Alur bible

Ezekiel 43

¹Yo ku ng’eye ekela ba dhugang’, en e dhugang’ ma neno yo nyangu.

²Man nen, dwong’ pa Mungu mir Israel uai yo nyangu: man badwande calu badwal mi pi dupa; man ng’om urieny ku dwong’ pare.

³Man en e calu nen mi ginmawokiwang’ m’aneno, en e calku ginmawokiwang’ m’aneno kinde m’abino ninyotho adhura; man ginmawokiwang’ne gi calu ginmawokiwang’ m’aneno dhu kulo Kebar; man apodho arieba wang’a.

⁴E dwong’ pa Yehova bino i ot i yo mi dhugang’ ma neno yo nyangu.

⁵Man Tipo ting’a malu, man etera i lelagang’ ma yor i ie; man, nen, dwong’ pa Yehova pong’o ot.

⁶Man awinjo ng’atu moko m’uweco i bang’a kud i ot; man dhanu cungo i vuca.

⁷Man ewacu ira kumae. Wod dhanu, maeni ka mi komker para, man ka die tienda, ka in’abibedo ie i kind nyithindho mir Israel mi nja. Man ot mir Israel bicido nyinga ma leng’ kendo ngo, kadok gin, kadi ju m’ubimo migi, kud asara migi, man kud avu ju m’ubimo migi i ka ma malu migi;

⁸ku ketho ma giketho ko riu migi i ng’et riu para, man ng’et dhugola migi i vut ng’et dhugola para, man gang’ kende ni i kindwa wakugi; man gicido nyinga ma leng’ ku ginmajudagu migi ma gitimo: kum kumeno adarugi i ng’ecwiny para.

⁹Kawono wek gicor asara migi cen, kud avu ju m’ubimo migi, bor i kuma; man abibedo i kindgi mi nja.

¹⁰In, wod dhanu, nyuth ot maeni ni ot mir Israel, kara lewic uneggi kum kier migi; man wek gipor ayine.

¹¹Man tek lewic unegogi kum gin ceke ma gitimo, keth ging’ei kit ode man ayine, ku wokwokone, man kamondone, kud ayine de ceke, ku lembapokane ceke, man ayine ceke ku cikne ceke; man ikiewe i wang’gi; kara giwor ayine ceke, man lembapokane ceke, man gitimgi.

¹²Maeni cik mi ode: wi usimbru got kieune ceke gbur bibedo leng’ m’usagu. Nen, maeni cik mi ode.

¹³Man maeni por mi pemblam ku bot (bot en e bot ku laccing’): there bibedo bot, man kalacne bot, man ruko mi dhoge gbur laccing’; man maeni bibedo the pemblam.

¹⁴Man ugambre i ng’om utundo kum dhoge ma yo piny en e bot ario, man kalacne bot acel; man ugambre kum dhoge ma nok utundo kum dhoge ma dit bibedo bot ang’wen, man kalacne bot acel.

¹⁵Man pemblam ma yo malu bibedo bot ang’wen; man ugambre kum pemblam ma jukudho ie mac ku malu bibedo tunge ang’wen.

¹⁶Man ka mac mi pemblam kaborne bibedo bot apar wi ario ku kalacne de apar wi ario, ng’ete ang’wen rom rom.

¹⁷Man kabor mi kore bibedo bot apar wi ang’wen ku kalacne de apar wi ang’wen i ng’ete ang’wen; man the ng’ute bibedo katumbla mi bot; man there bibedo bot gbur; ma raidhne bineno yo nyangu.

¹⁸Man ewacu ira kumae, Wod dhanu, Rwoth Yehova wacu kumae; Maeni lembapoka mi pemblam i ceng’ ma jubitime i ie, mi thiero lam m’awang’a i wie, man mi kiro rimo i wie.

¹⁹Ibimio thwon dhiang’ m’aradu ni lam mi dubo, ba julam ma Julawi ma gi nyikwai Zadok, ma gini ceng’ni i kuma, kara gitim ira, Rwoth Yehova wacu.

²⁰Ibigamu kum rimone, man ibikethe wi tunge ang’wen, man wi gunde ang’wen mi kume, man wi ruko gbur: ibidwoke leng’ man ibitimo adunya pire kumeni.

²¹Ibigamu thwon dhiang’ mi lam mi dubo bende, man jubiwang’e i ka mi ot ma juketho, yo woko ku kamaleng’.

²²Man i ceng’ mir arionde ibithiero koni diel ma mulima mbe i kume ni lam mi dubo; man gibidwoko pemblam leng’, calu gidwoke leng’ ku thwon dhiang’.

²³Kinde m’idaru dwoke leng’, ibithiero thwon dhiang’ m’aradu ma mulima mbe i kume, man nyog rombo ku kind udul rombe ma mulima mbe i kume.

²⁴Man ibikelogi ceng’ni wang’ Yehova, man julam bikonjo kadu i kumgi, man gibithierogi malu ni lam m’awang’a ni Yehova.

²⁵Mi ceng’ abiro ibiyiko diel ku ba ceng’ ku ba ceng’ ni lam mi dubo: gibiyiko thwon dhiang’ m’aradu bende, ku nyo g rombo ma kind udul rombe, ma mulima mbe i kume.

²⁶Gibitimo adunya mi ceng’ abiro pi pemblam man gibidwoke leng’; e gibithiere kumeni.

²⁷Man kinde ma gidaru cenge, ebitimbre nia i ceng’ mir aborane, ku m’ucikubino, julam bitimo lam m’awang’a mu wi pemblam, man lam mi kwiocwiny mu; man abijolowu, Rwoth Yehova wacu.