Read Alur Ezekiel 44 Bible Online

Ezekiel 44 - Alur bible

Ezekiel 44

¹Elund edwoka ku yo mi dhugang’ ma yo woko mi kamaleng’, ma neno yo nyangu; man ebedo acika.

²Man Yehova wacu ira kumae, Dhugang’ maeni bibedo acika; jubiyabe ngo, kadok dhanu moko de mbe ma bimondo kudo; kum Yehova, Mungu mir Israel, umondo kude; ka kumeno ebibedo acika.

³Pi jaditmawijo, ebibedo i ie calu jaditmawijo mi camu kwen i wang’ Yehova; ebimondo ku yo mi pondot mi dhugang’, man ebiwok woko ku yoje.

⁴Elund etera ba yo mi dhugang’ ma yor ariwa ma malu i wang’ ode; man aneno, man nen, dwong’ pa Yehova pong’o ot pa Yehova’: man apodho arieba wang’a.

⁵Man Yehova wacu ira kumae, Wod dhanu, keth cwinyi i kume, man inen ku weng’i, iwinj ku ithi de gin ceke m’ayero iri pi lembapoka mi ot pa Yehova, ku cikne ceke; man iketh cwinyi cu kum kamondo mi ode ku wokwoko kubang’e kubang’e mi kamaleng’.

⁶Man ibiwacu ni juco, en e ni ot mir Israel kumae, Rwoth Yehova wacu kumae: E wu ot mir Israel, wek gin mi ginmajudagu mu ceke romwu,

⁷kum wukelo juwirok, ma jutimo yaa kum adundegi ngo man jutimo yaa i ring’kumgi de ngo, ubed i kamaleng’ para, kara ucide, en e ot para, kinde ma wuthiero kwen para, mio man rimo, man gituro lembariba para kara umed kum ginmajudagu mu ceke.

⁸Man wugwoko kur mi gin ma leng’ para ngo; ento wuketho jugwok kur para i kamaleng’ para piwu giwu.

⁹Rwoth Yehova wacu kumae, Jawirok moko mbe, ma jutimo yaa i adundene ngo ma jutimo yaa i ring’kume de ngo, ma bimondo i kamaleng’ para, kind juwirok moko ma ni i kind nyithindho mir Israel.

¹⁰Ento Julawi m’ucidho bor i kuma, kinde ma Israel ukier, m’ukier i kuma tok mungu m’araga migi, gibiyeyo kier migi.

¹¹Ento gibibedo jutim i kamaleng’ para, ma gineno ba dhugang’ mi ot, ma gitimo de i ot: gibithumo lam m’awang’a ku lam de ni dhanu, man gibicungo i wang’gi kara gitim igi.

¹²Kum gitimo igi i wang’ mungu m’araga migi, man gidoko ni cudho mi kier ni ot mir Israel; ka kumeno ating’o cinga i kumgi, Rwoth Yehova wacu, man gibiyeyo kier migi.

¹³Man gibibino ceng’ni an ungo, kara gitim tic pa jalam ira, kadi kara gibin ceng’ni ba gin ma leng’ para moko, ba gin ma gi leng’ m’usagu; ento gibiyeyo lewic migi, ku ginmajudagu migi ma gitimo.

¹⁴Ento abidwokogi ni jukur mi kur mi ot, pi giratimane ceke, man pi gin ceke ma jubitimo i ie.

¹⁵Ento julam ma julawi, ma wot Zadok, ma gwoko kur mi kamaleng’ para kinde ma nyithindho mir Israel ukier kud i bang’a, gibibino ceng’ni an nitimo ira; man gibicungo i wang’a kara githier ira mio ku rimo, Rwoth Yehova wacu:

¹⁶Gibimondo i kamaleng’ para, man gibibino ceng’ni mesa para, kara gitim ira, man gibigwoko kur para.

¹⁷Man ebibedo nia, kinde ma gimondo i dhugang’ mi lelagang’ ma yor i ie, gibibedo aronya ku kendi ma nwang’; man yuk rombe moko biwok i kumgi ngo, kinde ma gitimo i dhugang’ mi lelagang’ ma yor i ie, man i ot.

¹⁸Gibibedo ku jamtwic mi wie mi bongu ma nwang’ i wigi, man gibibedo ku bongu ma nwang’ mi tielo i piergi; gibitwiri ku gin moko ngo ma ng’iero kwok.

¹⁹Man kinde ma giwok i lelagang’ ma yo woko, en e i lelagang’ ma yo woko ba dhanu, gibiwodho kendi migi ma gitimo kudo tim, man gibikethogi i kusika ma leng’; e gibironyo kendi mange, kara ku gidwok dhanu leng’ ku kendi migi.

²⁰Kadi gibigwaru wigi de ngo, kadi yukwigi de gibiyio ngo ya uwobi; gibinyaru yukwigi kende.

²¹Kadi julam moko de bimadhu pigulok ungo, kinde ma gimondo i lelagang’ ma yor i ie.

²²Kadi gibigamu dhaku ma cware tho de ngo ni mon migi, kadi ng’atu ma jucoro cen de ngo; ento gibigamu nyir ma ng’won mi kodhi mi ot mir Israel, kadi dhaku ma cware tho ma en e dhaku ma cware tho pa jalam.

²³Man gibiponjo dhanu para maram gin ma leng’ ku gin ma sai tung’ ko, man gibiketho ging’io kind gin m’ucido ku gin ma leng’.

²⁴Man gibicungo i piem mi lembe kara gipoki; gibipoko maeni calku pokolembe para: man gibigwoko cik para ku lembang’ola para i agba para ceke ma juketho; man gibidwoko ceng’ sabatu para leng’.

²⁵Man gibimondo bang’ avu dhanu ngo kara ucidgi gigi: ento gicopo cidri pi weggi, kadi pi meggi, kadi pi wodgi, kadi pi nyiggi, pir umeggi, kadi pi nyameggi ma fodi cware mbe.

²⁶Man yo ng’ei dwokrileng’ pare, gibikwanu ire ceng’ abiro,

²⁷Man i ceng’ m’emondo i ie i kamaleng’, i lelagang’ ma yor i ie, kara etim i kamaleng’, ebithiero lam mi dubo pare, Rwoth Yehova wacu.

²⁸Man gibibedo kud aba: an a aba migi; man wubimio igi piny ungo i kind Israel; an a piny migi.

²⁹Gibicamu lam mi mogo, ku lam mi dubo, man lam mi kier; man gin ma jukoyo i Israel kubang’e kubang’e bibedo migi.

³⁰Man gin ma kwong’a mi mwoka ceke mi gin ceke kubang’e kubang’e, man lam m’ating’a kubang’e kubang’e mi gin ceke kubang’e kubang’e, mi lam mu ceke, bibedo pa jalam: man wubimio ni julam ng’et kwen mu ma kwong’a, kara uketh mugisa bed wi ot peri.

³¹Julam bicamu gin moko m’utho kende ngo, kadi ma juyeco, kadok en e winyo kadi lim.