Read Alur Ezekiel 45 Bible Online

Ezekiel 45 - Alur bible

Ezekiel 45

¹Mange ke, kinde ma wubipoko ng’om ku gagi ni aba, wubithiero girathiera ni Yehova; ng’etng’om ma leng’; kaborne bibedo kabor mi bol rubanga pier ario wi abic, man kalacne bibedo bol rubanga apar: ebibedo leng’ i kieune ceke gbur.

²Kamaleng’ bibedo nuti i ng’om maeni ma kaborne bol dak abic kalacne de bol dak abic, ma ng’ete rom rom; ka ma thwolo i ng’ete gbur bot pier abic.

³Man mi por maeni ibiporo kaborne bol rubanga pier ario wi abic, man kalacne bol rubanga apar: man kamaleng’ ma en e leng’ m’usagu, bibedo i ie.

⁴En e ng’et ng’om ma leng’; ebibedo mi julam, ma jutim mi kamaleng’, m’ubino ceng’ni kara gitim ni Yehova; man ebibedo ni ka udi migi, man kamaleng’ mi kamaleng’.

⁵Man kaborne bol rubanga pier ario wi abic, kalacne ke bol rubanga apar, bibedo ni Julawi, ma jutim m’i ot, ni piny igi gigi, mi kusika pier ario.

⁶Man wubikiewo piny mir adhura kalacne bol rubanga abic, man kaborne bol rubanga pier ario wi abic, man ebibedo i ng’et girathiera ni makapiny ma leng’: ebibedo mi ot mir Israel dho.

⁷Man gin ma tek pa jaditmawijo bibedo i ng’ete kucel man i ng’ete mucelo mi girathiera ma leng’ man mi piny mir adhura, i wang’ girathiera ma leng’ man i wang’ piny mir adhurane, i ng’ete ma yo reto yo reto, man i ng’ete ma yo nyangu yo nyangu; man kaborne calku makapiny acel, ugambre i kieu ma yo reto cil kum kieu ma yo nyangu.

⁸I ng’ombe ebibedo ire ni piny i Israel: man judongomawijo bisendo dhanu para kendo ngo; ento gibimio ng’ombe ni ot mir Israel calku suru migi.

⁹Rwoth Yehova wacu kumae: Wek eromwu, E judongomawijo mir Israel: wukab rop kud ayeki, man wutim pokolembe ku bedopwe; wukab kuvuga mu ku ba dhanu para, Rwoth Yehova wacu.

¹⁰Wubibedo ku kiro ma pwe, man kukunju ma pwe, man ajiku ma pwe.

¹¹Kukunju kud ajiku bibedo mi por acel, kara ajiku copo bedo kud apajpiny mi dero, man kukunju copo bedo kud apajpiny mi dero: porne bibedo calku dero.

¹²Man cekel bibedo gera pier ario; cekel pier ario, cekel pier ario wi abic, cekel apar wi abic, bibedo sente mu.

¹³Maeni girathiera ma wubithiero: ng’et piny mir abusiende mi kukunju m’uai i dero mi nganu; man wubimio ng’et piny mir abusiende mi kukunju m’uai i dero mi nganu ma tung’;

¹⁴Man ng’et piny ma jung’olo mi mo, mir ajiku mi mo, ng’et piny mir apaje ma i ajiku kud i dak, ma en e ajiku apar, en e dero (kum ajiku apar en e dero);

¹⁵man nyathi rombo acel ma kind udul lim, ku kind dak ario, m’uai kud i kwac ma lep lep mir Israel; mi lam mi mogo, man mi lam m’awang’a, man mi lam mi kwiocwiny, kara utim adunya pigi, Rwoth Yehova wacu.

¹⁶Dhanu ceke m’i ng’ombe bimio kum girathiera maeni ni jaditmawijo mir Israel.

¹⁷Man ebibedo tic pa jaditmawijo nimio lam m’awang’a, ku lam mi mogo, man lam m’amadha, i agba, man i dwi ma por, man i ceng’ sabatu, i agba ceke ma juketho mi ot mir Israel: ebiyiko lam mi dubo, ku lam mi mogo, man lam m’awang’a, ku lam mi kwiocwiny, kara utim adunya ni ot mir Israel.

¹⁸E Rwoth Yehova wacu kumae: I dwi ma kwong’ane, i ceng’ ma kwong’ane mi dwije, ibigamu thwon dhiang’ m’aradu ma mulima mbe i kume; man ibidwoko kamaleng’ leng’.

¹⁹Man jalam bigamu kum rimo mi lam mi dubo, man ebikethe wi ng’et dhugola mi ot, man wi gui ang’wen mi dhu pemblam, man wi mbegi mi dhugang’ mi lelagang’ ma yor i ie.

²⁰Man ibitimo kumeca i ceng’ mir abirone mi dwi pi dhanu ceke kubang’gi kubang’gi m’ukier, man ni ng’atu ma cobo: e wubitimo adunya pi ot kumeca.

²¹I dwi ma kwong’ane, i ceng’ apar wi ang’wende mi dwije, wubibedo ku kadhukuwijo, en e agba mi ceng’ abiro; jubicamu kwen ma thobi mbe i ie.

²²Man i ceng’ maeca jaditmawijo biyiko thwon dhiang’ mi lam mi dubo ire gire man ni dhanu ceke mi ng’ombe.

²³Man i ceng’ abiro mir agba ebiyiko lam m’awang’a ni Yehova, en e thwoni dhiang’ abiro ku nyogi rombe abiro ma mulima mbe i kumgi ku ba rupiny ku ba rupiny mi ceng’ abiro; man nyog diel ku ba rupiny ku ba rupiny ni lam mi dubo.

²⁴Man ebiyiko lam mi mogo, kukunju mi thwon dhiang’, man kukunju mi nyog rombo, man amorpi mi mo mi kukunju.

²⁵I dwi mir abirone, i ceng’ apar wi abije mi dwije, i agba ebitimo kumeca i ceng’ abiro; calku lam mi dubo, calku lam m’awang’a, man calku lam mi mogo, man calku mo.