Read Alur Ezekiel 47 Bible Online

Ezekiel 47 - Alur bible

Ezekiel 47

¹Man edwoka ba dhugola mi ot; man nen, pi wok woko ku the riu mi ot yo nyangu (kum yo dhu ot ni yo nyangu); man pi mol piny kud i there, kud i ng’et ot ma yor acwi, i ng’et pemblam ma yor ariwa ma piny.

²Elund etera woko ku yor i dhugang’ ma yor ariwa ma malu, man edhoka kud i yo ma yo woko ba dhugang’ ma yo woko, kud i yo mi dhugang’ ma neno yo nyangu; man nen, pi mol woko i ng’ete ma yor acwic.

³Kinde ma dhanu wok woko yo nyangu ku thol i cinge, eporo bot rubanga acel, man eketho akadhu kud i pi, pi ma tundo kum ngbolongbolo.

⁴Eporo rubanga acel kendo, man eketho akadhu kud i pige, pi ma tundo wi cong. Eporo rubanga acel kendo, man eketho akadhu kud i pige, pi ma tundo i pier.

⁵Yo ku ng’eye eporo rubanga acel; man en e kulo ma dit m’acopo kadhu kud i ie ngo; kum pige dongo, en e pi ma jukwang’ i ie akwang’a, en e kulo ma dit ma jucopo kadhu ngo.

⁶Man ewacu ira kumae, Wod dhanu, ineno maeni? Elund etera, man eketho adwogo dhu kulo ma ditne.

⁷Nie kinde m’adwogo, nen, yen dupa nuti wi dhu kulo ma dit i ng’ete kucel man i ng’ete mucelo.

⁸Elund ewacu ira kumae, Pi maeni mol yor i ng’om ma yo nyangu, man gibicidho piny i Araba; man gibicidho yor i nam; pi ma juketho uwok woko bicidho i nam; e jubicangu pige.

⁹Man ebitimbre, nia ku ba gin ma kwo ceke ma nyai, i ka ceke kubang’e kubang’e ma kulo ma dit utundo i ie, gibibedo kwo; man udul rec ma dit hai bibedo nuti; kum pi maeni tundo kuca, man jubicangu pi mi nam, man gin ceke bibedo kwo i ka ceke ma tek kulo ma ditne tundo i ie.

¹⁰Man ebitimbre, nia jujak rec bicungo i ng’ete: ugambre En-gedi utundo Eneglaim ka ciko voi bibedo nuti; rec migi bibedo ku kwonde ku kwonde, calu rec mi nam ma dit, dupa dupa,

¹¹Ento ka codhone, ku ka kutotolune, jubicangu ngo; jubimiogi mi kadu.

¹²Man dhu kulo ma dit wi ng’ete, wi ng’ete kucel man wi ng’ete mucelo, yen mi cemo bitwi kubang’e kubang’e, ma ithe biner ungo, kadok nyinge de birem ungo: ebicego nyinge ma nyen ku ba dwi ku ba dwi, kum pige wok woko kud i kamaleng’; man nyinge bibedo mi cemo, man ithe mi cangu.

¹³Rwoth Yehova wacu kumae: Maeni bibedo kieu, ma wubipoko ko ng’om ni aba calku suru apar wi ario mir Israel: Yusuf bibedo ku makapiny ario.

¹⁴Man wubigamu ni aba, ng’atuman ku wadi; kum akwong’o ya abimie ni kwaruwu: man ng’om maeni bipodho iwu ni aba.

¹⁵Man maeni bibedo kieu mi ng’ombe: I ng’ete ma yor ariwa ma malu, ugambre kum nam ma dit, yor i yo mi Hethlon, cil kum kamondo mi Zedad;

¹⁶Hamath, ku Berotha, man Sibraim, ma ni i kind kieu mi Dameski ku kieu mi Hamath; Hazerhatikon, ma ni i ng’et kieu mi Hayuran.

¹⁷Man kieu m’ugambre i nam, bibedo Hazarenon i kieu mi Dameski; man yor ariwa ma malu ma malu kieu mi Hamath nuti. Maeni ng’ete ma yor ariwa ma malu.

¹⁸Man i ng’ete ma yo nyangu, i kind Hayuran ku Dameski man Gilead man ng’om Israel, bibedo Yordan; wubiporo gambre kum kieu ma yor ariwa ma malu, cil kum nam ma yo nyangu. Maeni ng’ete ma yo nyangu.

¹⁹Man ng’ete ma yor ariwa ma piny bibedo gambre Tamar cik i pi mi Meriba-kadec, ba kulo mi Misiri, kum nam ma dit. Maeni en e ng’ete ma yo piny yo piny.

²⁰Man ng’ete ma yo reto bibedo nam ma dit, ugambre kum kieu ma yor ariwa ma piny kum kieu m’ulokre kum kamondo mi Hamath. Maeni ng’ete ma yo reto.

²¹E wubipoko ng’om maeni kumeni iwu calku suru mir Israel.

²²Man ebitimbre, nia wubipoke ku gagi ni aba iwu man ni juwirok m’ubedo ni umondo i kindwu, ma binyolo nyithindho i kindwu; man gibibedo iwu calu jung’om i kind nyithindho mir Israel; gibibedo kud aba karacelo kudu i kind suru mir Israel.

²³Man ebitimbre, nia i suru ma jawirok ubedo i ie ni umondo, wubimio ire aba pare keca, Rwoth Yehova wacu.