Read Alur Ezekiel 5 Bible Online

Ezekiel 5 - Alur bible

Ezekiel 5

¹Man in, wod dhanu, gam iri palamularu ma bith; calu riedi pa jalielwic igam iri, man iketh ekadh i wii man wi tiki: ilund igam iri jampor, man ipok yukwine.

²Ng’ete mir adege ibiwang’u i mac i dier adhura, kinde ma ceng’ mir atiek uthum; man igam ng’ete mir adege, igoi kume ku palamularu gbur; man ng’ete mir adege ibilalu ba yamu, e abiwodho palamularu i toke.

³Man ibigamu kume moko ma nok akwana, man ibitwiogi dhu kendi peri.

⁴Man ibigamu kum maeni kendo, man ibibayugi i kind mac, man ibiwang’ugi i mac; mac biai i bang’e bino i ot mir Israel ceke.

⁵Rwoth Yehova wacu kumae: Maeni Yerusalem; akethci kind thek, man ng’om utieke gbur.

⁶Man ejai kum lembapoka para ku timo dubo ma sagu thek, man kum cik para ma sagu ng’om m’utieke gbur; kum gikwero lembapoka para, man pi cik para, giwotho i igi ngo.

⁷E ka kumeno Rwoth Yehova wacu kumae: Kum wu jurop ma sagu thek m’utiekowu gbur, man wawotho i cik para ngo, kadi wuworo lembapoka para de ngo, kadi wutimo tok lembapoka mi thek de ngo m’utiekowu gbur;

⁸ka kumeno Rwoth Yehova wacu kumae: Nen, an, en e an, an a iadhogi; man abitimo lembapoka i kindi i wang’ thek.

⁹Man abitimo i kumi gin ma fodi atimo ngo, man wadi m’abitimo kendo ngo, kum ginmajudagu peri ceke.

¹⁰Ka kumeno wego bicarou wodo i kindi, man wodo bicamu weggi; man abitimo lembapoka i kumi; man dongi m’udong’ dho abilalu ba yamu ceke.

¹¹Kum kumeno, calu abedo kwo, Rwoth Yehova wacu, andha, kum icido kamaleng’ para ku gin ma rac peri ceke, man ku ginmajudagu peri ceke, ka kumeno abijigo wii bende; kadi wang’a de biweko ngo, man ngisi bende binega ngo.

¹²Ng’eti mir adege bitho ku thong’om, man gibithum i kindi ku ndru; man ng’eti mir adege bipodho ku palamularu i ng’eti gbur; man ng’eti mir adege abiketho ba yamu ceke, man abiwodho palamularu i tokgi.

¹³Ng’ecwiny para bitimbre kumeni, man abiketho kwinyo para ma yor i bang’gi yom, man abijukra: e gibing’eyo nia an, an a Yehova, ayero i ngiri para, kinde m’adaru kwinyo para i kumgi.

¹⁴Mange ke abidwoki ni uvuru man ni cac kind thek m’utieki gbur, i wang’ dhanu ceke m’ukadhu akadha.

¹⁵Kum kumeno ebibedo ni cac man lele, ni ponji man wang’uic, ni thek m’udhoki gbur, kinde m’atimo lembapoka i kumi i ng’ecwiny man i kwinyo, man i juk mi kwinyo (an, an a Yehova, ayero maeni);

¹⁶kinde m’aoro athero ma rac mi ndru i kumgi, ma gi mi nyoth, m’abioro ninyothowu. Man abinyayu ndru i kumwu, man abituro jambjeng’ mi kwen mu;

¹⁷man abioro ndru ku yedi ma rac i wiwu, e gibiyeki; man thong’om ku rimo bikadhu kud i i; man abikelo palamularu i kumi: an, an a Yehova, ayero maeni.