Read Alur Ezekiel 6 Bible Online

Ezekiel 6 - Alur bible

Ezekiel 6

¹Man lembe pa Yehova bino i bang’a, m’uwacu kumae,

²Wod dhanu, keth weng’i yo ba gudi mir Israel, man ieu lembe i kumgi,

³man iwac kumae, Wu gudi mir Israel, wuwinj lembe pa Rwoth Yehova: Rwoth Yehova wacu kumae ni gudi man ni ungulu gudi ni ka pi man ni poga: Nen, an, en e an, abikelo palamularu i wiwu, man abinyotho ka mu ma wiu.

⁴Man pemblam mu bidoko ni uvuru, man ayi gin m’acwia mu mi ceng’ bitur; man abiredho dhanu mu ma junego i wang’ mungu m’araga mu.

⁵Man abiketho avuj nyithindho mir Israel i wang’ mungu m’araga migi; man abilalu cogowu ba pemblam mu gbur.

⁶I kabedo mu ceke jubidwoko adhura ni susu, man ka ma malu bidoko ni uvuru; kara judwok pemblam mu ni susu man ni uvuru, man kara jutur mungu m’araga mu man gijiki, man kara jung’ol ayi gin m’acwia mu mi ceng’ piny, man kara tic mu kabre woko.

⁷E ju ma junego bipodho i kindwu, e wubing’eyo nia an a Yehova.

⁸Ento abiweko donge m’udong’, kum wubedo ku jumoko m’uboth ni palamularu i kind thek, kinde ma jubilaluwu i kind ng’om.

⁹Man ju m’i kindwu m’uboth bipoi pira i kind thek ka ma juterogi i ie ni ng’eca, maram atur ko ni kum adundegi mir asara, m’ukier kud i bang’a, man ku wang’gi, ma timo tarwang’ tok mungu m’araga migi: man gibidagri gigi i wang’gi gigi, kum lem ma rac ma gitimo i ginmajudagu migi ceke.

¹⁰E gibing’eyo nia an a Yehova: awacu mananu ngo ya abitimo lem ma rac maeni i kumgi:

¹¹Rwoth Yehova wacu kumae: Goi ku cingi, man inyon ku tiendi, man iwac kumae, A! kum ginmajudagu ma rac ceke mi ot mir Israel; kum gibipodho ku palamularu, ku ndru, man ku thong’om.

¹²Ng’atu ma ni bor bitho ku thong’om; man ng’atu ma ni ceng’ni bipodho ku palamularu; man ng’atu m’udong’ ma jutieke kud ali bitho ku ndru: abitimo kwinyo para i kumgi kumeni.

¹³Man wubing’eyo nia an a Yehova, kinde ma dhanu migi ma junego ubedo i kind mungu m’araga migi i vut pemblam migi gbur, wi ungulu gudi ma wiu kubang’e kubang’e, wi usimbru gudi ceke, man the en m’uluk kubang’e kubang’e, man the ongu m’uluk kubang’e kubang’e, en e ka ma githiero ie ng’wic mido ma ng’ar ni mungu m’araga migi ceke.

¹⁴Man abirieyo cinga i wigi, man abidwoko ng’om ni uvuru man ni susu, ugambre i langa yo ba Dibla, cil i kabedo migi ceke; e gibing’eyo nia an a Yehova.