Read Alur Ezekiel 7 Bible Online

Ezekiel 7 - Alur bible

Ezekiel 7

¹Mange ke lembe pa Yehova bino i bang’a m’uwacu kumae,

²Man in, wod dhanu, Rwoth Yehova wacu kumae ni ng’om mir Israel, Kajik, kajik uwok wi gund ng’om ang’wen.

³Kawono kajik ni i wii, man abioro ng’ecwiny para i wii, man abipoko lembe i wii calku lembe peri; man abikelo ginmajudagu peri ceke i wii.

⁴Man wang’a biweki ngo, kadok ngisi de binega ngo; ento abikelo yo peri i wii, man ginmajudagu peri bibedo i kindi: e wubing’eyo nia an a Yehova.

⁵Rwoth Yehova wacu kumae: Lem ma rac, lem ma rac kende; nen, ebino.

⁶Kajik ubino, kajik ubino; eceu i kumi; nen, ebino.

⁷Nindo ma rac peri bino i beng’i, E ng’atu m’ubedo i ng’om: nindo bino, ceng’ ni ceng’ni, en e ceng’ mi yakni, man mi kok mi mutoro ngo, wi gudi.

⁸Kawono a ceng’ni ku konjo kwinyo para i wii, man ku daru ng’ecwiny para i kumi, man abipoko lembe i wii calku yo peri; man abikelo ginmajudagu peri ceke i wii.

⁹Man wang’a biweko ngo, kadok ngisi de binega ngo: abikelo i wii calku yo peri; man ginmajudagu peri bibedo i kindi; man wubing’eyo nia an, an a Yehova, agoyo.

¹⁰Nen, ceng’, nen, ebino: nindo ma rac peri wok woko; uluth uthiwo, kuhaya kudo.

¹¹Rop ucungo ni uluth mi dubo; moko mbe m’i kindgi ma bidong’, kadi mir udul migi, kadi mi lonyo migi: kadok goyonduru pigi de bibedo mbe i kindgi.

¹²Nindo bino, ceng’ ucoro ceng’ni: anyong’a kud uneg jang’ieu piny, kadi jalok piny de kud uywaki; kum kwinyo ni wi udulne ceke.

¹³Kum jalok piny bidok ba gin ma juloko ngo, kadok fodi gibedo kwo: kum ginmawokiwang’ en e pir udulne dho, ebuokre cen ungo; kadok ng’atu moko de mbe ma bitegre gire i kier mi kwo pare.

¹⁴Gikudho agwara, man giyiko ceke; ento moko mbe m’ucidho ba lwiny; kum kwinyo para ni wi udulne ceke.

¹⁵Palamularu ni yo woko, man thong’om ku ndru ni yor i ie: ng’atu ma ni thim bitho ku palamularu: man ng’atu ma ni i adhura, ndru ku thong’om bicame.

¹⁶Ento ju m’i kindgi m’uboth gibiboth, man gibibedo wi gudi calu akuru m’i poga, kagi ceke ma gicur acura, kubang’gi kubang’gi ng’atuman i kier pare.

¹⁷Cing’ ceke bibedo lebelebe, man cong ceke bibedo ng’ic calu pi.

¹⁸Gibitwiri gigi ku gonia bende, man ndiri biumogi; lewic bibedo wi wang’ ceke, man wie m’uwang’ wi wigi ceke.

¹⁹E gi’oibayu mola ma tar migi i gengi, man mola ma kwar migi bibedo calu gin m’ucido; mola ma tar migi ku mola ma kwar migi bicopo bodhogi ngo i ceng’ mi kwinyo pa Yehova: gibiyeng’o ng’eyong’ec migi ngo, kadok cindic migi de gibipong’o ngo; kum ebedo ni gin ma redho jo mi kier migi.

²⁰Pi leng’ mi giraruka pare, ekethe i dwong’; ento gitimo ayi gin m’acwia migi mi ginmajudagu migi ku gin ma rac migi i ie: ka kumeno adwoke igi calu gin m’ucido.

²¹Man abimie i cing’ juwirok ni amaci, man ni judubo mi ng’om ni ayeki; man gibicide.

²²Abiloko wang’a bende kud i bang’gi, man gibicido ka m’amung’a para; man weg ayeki bimondo i ie, e gibicide.

²³Tim nyoro; kum ng’om upong’ ku lembapoka mi rimo, man adhura pong’ ku rop.

²⁴Kum kumeno abikelo thek ma rac m’usagu, man gibimwonyo udi migi: abiketho kuhaya mi tego bende jik; man jubicido kamaleng’ migi.

²⁵Nyoth ubino; e gibiyenyo kwiocwiny, man ebibedo mbe.

²⁶Lem ma rac bibino wi lem ma rac, man rwonglembe bibedo wi rwonglembe; man gibiyenyo ginmawokiwang’ pa jabila; ento cik birwinyo ku ba jalam, man lembapora ku ba judongo.

²⁷Ubimo biywak, man jaditmawijo bironjre ku nyoth, man cing’ dhanu m’i ng’om bisendre: abitimo i kumgi calku yo migi, man abipoko lembe migi calku lembapoka migi; e gibing’eyo nia an a Yehova.